JUEVES 10º TIEMPO DURANTE EL AÑO

JUEVES 10º TIEMPO DURANTE EL AÑO

LECTURA PETEÎHA:

Ñahendúta Tupã Ñandejára Ñe’ẽ San Pablo ohai va’ekue mokõiha Corintos guápe

3, 15 – 4, 1. 3-6

Che pehẽnguekuéra: Ko’ágãite peve, israelita kuéra omoñe’ẽ ramo hikuái Moisés kuatiañe’ẽ nguéra, peteĩ tova aho’iha, ojaho’i ipy’a kuéra. Ha peteĩ yvypóra ojevy ramo Tupä Ñandejára gotyo, upe tova aho’iha ojei ichugui. Tupä Ñandejára niko upe Espíritu, ha oĩháme Ñandejára Espíritu, upépe oĩ sãsõ.

Upévare opavave ñandéva, ndajareko véimava upe ojaho’i va’ekue ñande rova, jajogua peteĩ mba’e jajehechahápe, ohechaukáva Tupä Ñandejára reko mimbipa. Ha oiko ohóvo ñande hegui ijoguaha, jarekovégui jahávo heko mimbipa, ha upéva ojapo Tupä Ñandejára, ha’éva Espíritu.

Upévare nda ore py’a kangýi, Tupã Ñandejára ore poriahuvereko rupi ome’ẽ oréve kotembiapo, ha pe marandu porã romoerakuãva oñemi ramo, upéva umi oñehundívape guarãnte. Ha’ekuéra ndogueroviái, ko yvy arigua tupã gua’u ombohesa ypytũgui ichupe kuéra, ohecha’ỹ haguã Cristo heko mimbipáva, marandu porã hendy jajaipáva. Cristo niko peteĩchante Tupã oikovéva ndive.

Ore noroñe moerakuãi ore jupe, romoerakuã Jesucrísto pente, Ñandejára ramo. Ro’e ore jehe pene rembiguainteha, Jesús rayhupápe. Tupã Ñandejára voi, he’i va’ekue osẽ haguã pytũgui mba’e rendy, omoĩ avei imba’e rendy ore py’apýpe, ikatu haguã roporohesape, roikuaaukávo Tupã Ñandejára reko mimbipa, ojajaipáva Jesucristo rováre.

Tupã Ñandejára Ñe’ẽ.

SALMO ÑEMBOHOVÁI 84, 9ab. 10-14

Opavave: Tupã Ñandejára, nde reko mimbipa ojekuaáne ore yvýpe.

Ajapysakáta Tupã Ñandejára he’ívare,
Ha’e he’i ome’ẽtaha py’aguapy
hetãme ha umi hese ojeroviávape
anive haguã ojavy hikuái. O.

Mborayhu ha añete oñuguaitĩne,
py’aguapy ha teko joja oñoañuáne.
Añete heñóine upe yvýgui,
ha teko joja yvágagui oma’ẽne. O.

Añete heñóine upe yvýgui,
ha teko joja yvágagui oma’ẽne.
Tupã Ñandejára, ha’ete voi ome’ẽta ñandéve iporãva,
ha ko ñande yvy ome’ẽta hi’a. O.

ALELUIA Jn 13, 34

Aleluia.
Ñandejára Jesucrisso he’i: “Ame’ẽ peẽme apoukapy ipyahúva:
pejoayhúke peteïva ambue ndive,
Che pohayhu háicha pejoahu”.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha

5, 20-26

Upe ramo Jesús he’i kóicha hemimbo’ekuérape: Che ha’e peẽme ikatutaha peguahẽ yvágape Tupã Ñandejára oporosãmbyhyhápe, peẽ peñeha’ãve ramo pejapo Tupã Ñandejára rembipota, umi Moisés rembiapoukapýre oporombo’évagui ha fariséo kuéragui.

Peẽ peikuaa yma oje’e hague pende ypy kuérape: “Aníke reporojuka. Pe oporojukáva oñembojovake va’erã.”

Che katu ha’e peẽme: Opavave oñembojovake va’erã ipochy haguére hapicha ndive. Ha oimérõ he’íva hapichápe ‘Nde výro’ upéva ojereraha va’erã karáikuéra renondépe. Ha pe he’íva hapicháre ‘Nde aña ra’y’ upéva ohóta ochyryry aña retãme.

Upévare, rerahakuevo hína ne mba’e kuave’ẽ altárpe ha nemandu’a sapy’a nde rapicha ipy’a vaiha ne ndive, eheja ne mba’e kuave’ẽ pe altar renondépe ha tereho nde rapicha rendápe. Eñemoĩ porã raẽ hendive ha upéi katu eju altárpe ha eme’ẽ ne mba’e kuave’ẽ.

Oimérõ nde rerahaséva ñembojovakehápe, tapére ikatu aja gueteri, eñeha’ã eñemoĩ porã hendive. Upéicha’ỹrõ, pe mbojovakehára ne me’ẽta mburuvichápe, ha mburuvicha ne moingéta yvyrakuápe. Añetehápe ha’e ndéve, upégui neresẽ mo’ãi neremoengoviapái peve viru pehẽngue minte jepe ndéve hembýva.

Ñandejára Jesucristo Ñe’ẽ