JUEVES 8º TIEMPO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Eclesiástico arandukápe oĩ háicha 42, 15-25

Che mandu’áta Tupã Ñandejára rembiapo kuére, pe ahecha va’ekue amombe’úta.

Tupã Ñandejára ñe’ẽ rupi ojejapo opa mba’e, ha hembiapokue ojapo ha’e oipotáva.

Kuarahy iñapysẽvo opa rupi omimbi, Tupä Ñandejára mimbipágui henyhẽ hembiapokue.

Hembijokuái marangatu kuéra jepe ndaikatúi oipapávo opa imba’e rechapyrã.

Ha’e ojepovyvy yguasu ryepýpe ha yvypóra py’apýpe avei, mba’eve nokañýi ichugui, upe Yvatetegua niko oikuaa opa mba’e, árare oma’ẽvo oikuaa upe ojehútáva.

Omombe’u upe oiko va’ekue ha upe ojehútava, ha ojuhukuaa mba’e kañy rapykuere.

Nokañýi ichugui  mba’eveichagua apytu’ũ reñói ha ñe’ẽ ñemi jepe oikuaapa.

Iñarandu rupi ko’ã mba’e omohendapa, ha’e oikógui opa mba’e mboyve, ndaikatúi okakuaávo térã oñemomichĩvévo, ha noikotevẽi imbo’eharãre.

Iporã itéma niko opa ne rembiapokue ha peteï tata pirirínte upe jahecháva!

Opa mba’e oikove ha opyta opa árape guarã, ha iñe’ẽ rendu opa ojapóvape.

Opa mba’e oikoe ojuehegui ha noĩ reíri mba’eve.

Peteĩ ambuégui iporãve, ha máva piko ikane’õta oma’ẽvo hese kuéra?

Tupã Ñandejára Ñe’ẽ.

SALMO ÑEMBOHOVÁI      32, 2-9

Opavave: Tupã Ñandejára ñe’ẽ rupi yvága ojejapo

Pemomba’e guasu Tupã Ñandejárape mbaraka púpe, árpa púpe, pepurahéi ichupe.

Purahéi pyahu pehenduka ichupe.

Pembopu porãke ha peguerosapukái ichupe. O.

Upe Tupä Ñandejára he’íva niko añete, ha opa mba’e ojapo teko jeroviápe.

Ha’e ohecha ramo teko joja ha opa mba’e hendápe ojejapóva.

Yvy niko henyhẽ chovi imborayhúgui. O.

Tupã Ñandejára ñe’ẽ rupi yvága ojejapo, ha ipytu rupi opa mba’e yvágare oĩva.

Yguasukuéra omboatypa kambuchípe guáicha, ha yvy guýre osyrýva omboaty yvy ruguáre. O.

Opavave tomomba’e guasu Tupã Ñandejárape, ha mayma yvy apére oikóva to momba’e ichupe.

Ha’e oñe’ẽ ha opa mba’e ojejapo, he’ínte ha opa mba’e oiko. O.

ALELUIA Jn 8, 12

Aleluia.

Ñandejára Jesucristo he’i: “Che hína pe yvy tuichakue hesapeha;

pe che moirüva orekóta tesapeha Tekovéva”.

Aleluia.

EVANGELIO

Ñahendúta Ñandejára Jesucristo rekove ha hemimbo’e San Marcos omombe’u háicha     10, 46-52

Upe ramo Jesús ha hemimbo’e kuéra oguahẽ Jericópe. Ha Jesús osẽvoma upe távagui, hemimbo’ekuéra ha heta ijaty va’ekue ndive, peteï tupãmba’e jára ohecha’ỹva, hérava Bartimeo, Timeo ra’y, oguapy hína tape ykére. Ha ohendúvo Jesús, Nazaretgua, ohasaha ohóvo, oñepyrũ osapukái:

-Jesús, David ra’y, che poriahuvereko mína!

Heta oĩ oja’óva ichupe okirirĩ haguã, ha’e katu hatãve osapukái: David ra’y, che poriahuvereko mína!

Upévo Jesús opyta ha he’i: Pehenói.

Ohenói hikuái pe ohecha’ỹvape, he’ívo ichupe: Néike, epu’ã. Ne renói niko hína!

Pe ohecha’ỹva omombo ijahoja, opo opu’ã ha oñemboja Jesús rendápe. Ha’e oporandu ichupe: Mba’épa reipota ajapo nde rehe?

Pe ohecha’ỹva he’i ichupe: Mbo’ehára, ahechase.

Jesús he’i ichupe: Ikatúma reho, rejerovia haguére rekuera.

Upepete pe ohecha’ỹ va’ekue ohecha, ha oho Jesús rapykuéri.

Ñandejára Jesucristo Ñe’ẽ.