LECTURAS JUEVES CUARTO DE PASCUA

LECTURAS JUEVES CUARTO DE PASCUA

LECTURA PETEÎHA:

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha 13, 13-25

Pablo ha iñirũ nguéra ojupi ygápe Páfospe ha oho Perge Panfilia guápe. Juan katu oheja ichupekuéra ha ojevy Jerusalénpe. Pérgegui ohasa hikuái Antioquía Pisidia guápe.

Upépe, pytu’uha árape oike hikuái umi judíokuéra tupaópe ha oguapy. Omoñe’ẽ rire hikuái tembiapoukapy ha maranduhárakuéra, upépe omoakãva he’i ichupe kuéra: Che pehẽngue kuéra, pereko ramo peje va’erã peporomokyre’ỹ haguã, peje ko’ágã.

Upérõ Pablo opu’ã ha omokirirĩvo ipópe, he’i ichupekuéra: Pehendu peẽ Israelguáva ha avei peẽ mombyryguáva pemboajéva Tupã Ñandejárape. Tupã Israel Jára oiporavo va’ekue ñande rukuéra ypykuépe, ojapo ichuguikuéra tetã guasu, oikórõ gueteri mombyrygua ramo Egíptope, ha upéi ipokatúpe oguenohẽ ichupekuéra upe tetãgui. Tupã Ñandejára ogueropu’aka ijepokuaa vaikuéra yvy ojeiko’ỹháme 40 áño pukukue, ha ohundi 7 tetã Canaán yvýpe ome’ẽ haguã ijyvy kuéra ñanderu kuéra ypykuépe. Opa ko’ã mba’e hi’are 450 áño rupi.

Upéi ome’ẽ umívape tendota kuéra, maranduhára Samuel ára peve. Upérõ ha’e kuéra ojerure peteĩ mburuvicha guasu oisãmbyhy haguã ichupekuéra, ha Tupã Ñandejára 40 áño aja ome’ẽ ichupekuéra mburuvicha guasúrõ Quis ra’y Saúlpe, Benjamín ñemoñaréva.

Upéi Tupã omongúi Saúlpe ha omoĩ mburuvicha guasúrõ Davídpe, ha’e he’i hague: ‘Ajuhu David Jesé ra’y, ha’eha kuimba’e arovy’áva, ha oĩva ojapo haguãicha che rembipota. Peteĩ David ñemoñarévagui, Tupã Ñandejára ombou va’ekue Jesús oipysyrõ haguã Israélpe iñangaipágui, ome’ẽ haguéicha iñe’ẽ.

Jesús ou mboyve, Juan omoerakuã va’ekue iñe’ẽ opa Israel guápe, he’ívo ojevy va’erãha Tupã Ñandejára gotyo ha oñemongaraiuka. Ha Juan, hi’aguĩma ramo hi’ára guahẽ, he’i va’ekue: ‘Che ndaha’éi upe peẽ peimo’ãva: che rire katu ou peteĩ, chéve ija’ỹva ajora ipy reheguánte jepe.’

Tupã Ñandejára Ñe’ẽ.

SALMO ÑEMBOHOVÁI 88, 2-3. 21-22. 25. 27

Opavave: Tupã, opa ára aropurahéita ne mborayhu tuicha iteha.

O bien:

Aleluia.

Tupã, opa ára aropurahéita ne mborayhu tuicha iteha.
Opavavépe aikuaaukáta nde reko jeroviaha.
Aikuaaukáta ne mborayhu mba’e opa’ỹvaha,
nde reko jeroviaha naiñambueivaha yvágaicha. O.

Che rembiguái Davídpe ajuhu
ha añohẽvo iñakãre ñandy ryku marangatu
amoingo mburuvicha guasúrõ.
Ichupe opa ára aipytyvõne ha amombareténe. O.

Ichupe ahayhúne ha namboykéi chéne,
ha che rupi imbaretevéne uvei.
He’íne chéve ha’e: ‘Nde hína che ru, Tupã Ñandejára
che renohẽva jejopy vaígui ha reñangarekóva che rehe.’ O.

ALELUIA Cf. Apoc. 1, 5ab

Aleluia.
Ñandejára Jesucristo nde ningo Hechahare heko jeroviáva,
pe oikove jevy Ypykuéva omanóva apytégui;
ore rayhúva ha ore mopotïva ore angaipágui,
nde ruguy rehe ae.
Aleluia.

EVANGELIO

Marandu porã Ñandejára Jesucristo rekove ha hemimbo’e San Juan omombe’u háicha 13, 16-20

Upe ramo arete Pascua mboyvemi Ñandejára ojohéi ipy hemimbo’ekuérape, ha he’i ichupekuéra: Añetéko ha’e peẽme: ndaipóri tembiguái tuichavéva ijáragui, ha peteĩ ojejokuáiva niko michĩve ijokuaiharégui. Ko’ã mba’e pehecha kuaa ha pejapo ramo, peikóta vy’apópe.

Che nañe’ẽi hína pende rehe, opavavére. Che aikuaa mávapepa aiporavo va’ekue. Ha ojehu mante va’erã Tupã Ñandejára Ñe’ẽme he’i háicha: “Pe che ndive okarúva, ojere che rehe”. Amombe’u hína peẽme ko’ã mba’e ojehu mboyve, ágã ojehu vove perovia haguã Cheha pe Ha’éva. Añetehápe ha’e peẽme: omoguahẽva pe che amondóvape, chéve che moguahẽ hína. Ha chéve che moguahẽva, omoguahẽ avei che mbouharépe.

Ñandejára Jesucristo Ñe’ẽ.