SÁBADO CUARTO DE PASKUA

LECTURA PETEÎHA:

Ko’ágã  ñahendúta Tupã Ñandejára ñe’ẽ Apóstolkuéra rembiapokuépe oĩ háicha    13, 44-52

Pablo oguahẽvo Antioquíape, opa távagua oñemboatypa ohendu haguã Ñandejára Ñe’ẽ. Umi Israelgua katu, ohechávo heta etereiha umi oñembyatýva, ojepicha eterei, ha oñepyrü oe’ẽ  api Páblope ha oñe’ẽ reity ichupe.

Upérõ Pablo ha Bernabé oñe’ẽ kyhyje’ỹre ha he’i ichupe kuéra: “Ore romoerakuã va’erã kuri Ñandejára Ñe’ẽ peẽme raẽ, peĩgui Israelgua. Ko’ágã katu peẽ pemboyke ha ndapeikuaaséigui mba’eve upe jeikove opa’ỹvagui, rohóta Israelgua’ỹvape”. Upéicha niko he’i va’ekue oréva Ñandejára, he’írõ guare:

 ‘Romoĩ tetã nguéra resapehárõ, reraha haguã ñepysyrõ che aguerúva, yvy paha ite peve.’

Ohendúvo kóva, umi Israelgua’ỹva ovy’a ha oñepyrũ he’i Ñandejára Ñe’ẽ iporãha, ha oguerovia umi ojeporavo va’ekuéva ohupitytaha jeikove opave’ỹva.

Upéicha oñemoasãi Ñandejára Ñe’ẽ opa upe tetãpýre. Israelguáva katu oñe’ẽ kuñakarai iñembo’e rayhúva ndive, ha ombohuguy raku ichupe kuéra opu’ã haguã Saulo ha Bernabére, ha omosẽ upégui.

Upérõ ha’ekuéra oityvyro yvy tĩmbo ipýgui, techaukahárõ ichupe kuéra, ha oho hikuái Icóniope. Umi oguerovia va’ekue katu henyhẽmba vy’águi ha Espíritu Sántogui.

Tupã Ñandejára Ñe’ẽ.

SALMO ÑEMBOHOVÁI     97, 1-4

Opavave: Tupã Ñandejára ohechauka ipokatu.

O bien:

Aleluia.

Pepurahéi Tupä Ñandejárape purahéi pyahu,

mba’e hechapyrãva ojapógui ha’e.

Ipyapy mbarete ha imarangatúgui ipu’aka opa mba’ére. O.

Tupã Ñandejára ohechauka ipokatu, tetãnguérape ohechauka heko jojaha.

Imandu’a imborayhu ha heko jeroviaháre

tetã Israel ndive guarã. O.

Yvy jerekuévo ojehecha Tupã ipu’akaha opa mba’ére.

Tojererohory Ñandejára yvy jerekuévo, purahéi rory tosoro ha to jevy’a. O.

ALELUIA Jn 8, 31b-32

Aleluia.

Ñandejára Jesucristo he’i: “Peẽ nda peñe mboykéi ramo che Ñe’ëgui,

oikóta pende hegui che remimbo’e añete ha peikuaáta pe añetegua”.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Juan omombe’u háicha                                                    14, 7-14

Upe ramo ohasa mboyvemi Tupã Ñandejára ykére, Jesús he’i hemimbo’e kuérape: Peẽ che kuaa ramo, che Rúpe avei peikuaáta. Ha ko’agã ite guivéma voi peikuaa ichupe, pehechágui ichupe peikóvo.

Upépe he’i ichupe Felipe: “Ore Jára, ehechauka oréve nde Ru, upéva iporãma oréve”.

Jesús he’i ichupe: “Felipe, aréma niko aiko hague pene ndive, ha piko ne’ĩra che kuaa?

 Upe chéve che recháva, ohecháma che Rúpe. Mba’éicha piko péicharõ ejerure chéve ahechauka haguã peẽme che Ru? Nde reroviái piko che peteĩnteha che Ru ndive, ha che Ru peteĩnteha che ndive? Umi mba’e ha’éva peẽme, nda’éi che jehegui reínte.

Che Ru oĩva che pype, ha’e upe ojapóva opa mba’e. Perovia ha’e ramo peẽme che peteĩnteha che Ru ndive, ha che Ru peteĩnteha che ndive. Che ha’éva rupi nda peroviaséi ramo, perovia umi mba’e ajapóva rupi.

Añetehápe ha’e peẽme: Pe che rehe ojeroviáva ojapóne avei umi mba’e che ajapóva. Ha tuichave mba’e katu ojapóne, che ahátagui che Ru rendápe. Opa mba’e peẽ pejeruréva che rérape, che ame’ẽta peẽme. Ha péicha, che rupi ojehecháta mba’éichapa tuicha che Ru. Che ajapóta oimeraẽ mba’e peẽ pejeruréva chéve che rérape.

Ñandejára Jesucristo Ñe’ẽ.