JUEVES PRIMERO DE ADVIENTO

Ko’ágä   ñahendúta Tupã Ñandejára ñe’ẽ Isaías arandukápe oĩ háicha                           26, 1-6

Upe árape ojepurahéita péicha Judápe: “Roguereko táva imbaretéva.

Rosẽ haguã jejopy vaígui, Tupä Ñandejára omoĩ tápia jo’a ha óga mbarete.

Peipe’a okẽ nguéra oike haguã tetã marangatu, nopyrũiva iñe’ẽ nguére.

Nde remoingo py’a guapýpe umi ojepytaso kuaávape ojeroviágui nde rehe.

Opa ára pejerovia Tupã Ñandejára rehe.

Ha’e ñangarekoha opa árape guarãva.

Ha’e omongúi va’ekue umi yvate oikóvape ha oity yvýre táva yvate.

Opyrũ haguã hese umi ojeapo’íva, ha ohasa haguã hi’ári umi imboriahúva.”

Tupã Ñandejára Ñe’ẽ.

SALMO ÑEMBOHOVÁI         117, 1. 8-9. 19-21. 25-27a

R. To jehovasa Tupã Ñandejára rérape oúva

Pemomba’e guasu Tupã Ñandejárape, ha’e niko ipy’a porã ha imborayhu ndopái araka’eve.

Iporãve niko jajerovia ramo Tupã Ñandejára rehe yvypóra rehe jajerovia rangue.

Iporãve niko jajerovia ramo Tupä Ñandejára rehe

poguasukuérare jajerovia rangue. R.

Peipe’a chéve tekojoja rokẽ ha taike tamomba’e guasu Tupä Ñandejárape.

Kóva hína Tupã Ñandejára rokẽ, árupi heko jojáva mante oike.

Tupã Ñandejára, ndéve romomba’e guasu, nde che rendúgui ha che renohẽgui jejopy vaígui. R.

Ore Jára, ore renohẽ kena jejopy vaígui!

Ore Jára, to sẽ porã kena oréve opa mba’e!

To jehovasa Tupã Ñandejára rérape oúva.

Ore pohovasa tupao guive.

Tupã hína Ñandejára, ha’e ñande resape. R.

ALELUIA

Aleluia.

Pehekáke Tupã Ñandejára ojejuhúka aja,

pehenói aguï oï aja.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?                                          7, 21. 24-27

Upe ramo Jesús he’i hemimbo’ekuérape: Ndaha’éiko umi chéve he’íva: “Karai, karai”, oikétava yvágape Tupã oporosãmbyhy hápe. Umi ojapóva che Ru yvágape oĩva rembipotánte oikéta.

Upévare, pe ohendúva che Ñe’ẽ ha ojapo upe ha’éva, ojogua ku karai iñakã porãvape hogarã omopu’ã va’ekue ita ári. Upéi ou oky ha okakuaa umi ysyry. Yvytu hatã oipeju ha ojejapipa pe ógare.

Péicharõ jepe ndo’ái, oñemboguapýgui ita ári. Pe che rendúva ha ndojapóiva che ha’éva katu, ojogua ku tekove tavýpe, omopu’ã va’ekue hogarã yvyku’i ári. Upéi ou oky ha okakuaa umi ysyry. Yvytu hatã oipeju ha ojejapipa pe ógare ha upépe ho’a, oñembyaipa ite.

Ñandejára Jesucristo Ñe’ẽ.