JUEVES SEGUNDO DE PASCUA

JUEVES SEGUNDO DE PASCUA

Primera lectura:

Ko’ágä   ñahendúta Tupã Ñandejára ñe’ẽ Apóstol kuéra rembiapokuépe                  

                               5, 27-33

Umi ñorairõharakuéra oñangarekóva koty ypytũre oĩhame Apóstol kuéra, ogueraha ichupe kuéra mbojovakehára rendápe ha pa’i guasu he’i ichupekuéra: Ro’e porã va’ekue peẽme ani haguã peporombo’eve pe kuimba’e reheguávare. Peẽ katu pemoenyhẽ Jerusalén tuichakue pene mbo’epýgui ha hi’arive peityse ore ári pe kuimba’e jejukakue.

Pedro ha apóstolkuéra he’i ichupe: Ore, ore Ñe’ẽ rendu va’erã Tupãme yvypórape rangue. Tupã ñande ru ypykue Jára omoingove jevy va’ekue Jesúspe upe peẽ pejuka va’ekue pemosãingóvo kurusúre. Tupã ohupi ichupe ha omoĩ ijakatúa gotyo, omoingóvo ichupe sãmbyhyhára ha pysyrõha ramo, ikatu haguã Israel retã ojevy Tupã gotyo ha ojeheja rei ichupe iñangaipa.

Ore ko’ã mba’e rechahare, ha avei Espíritu Santo, Tupã ome’ẽva umi iñe’ẽ rendúvape ichupe. Ohendúvo ko’ã mba’e ipochy eterei hikuái ha ojukase mo’ã ichupe kuéra.

Tupã Ñandejára Ñe’ẽ.

SALMO ÑEMBOHOVÁI         33, 2. 9. 17-20

R. Amomba’e guasúta Tupä Ñandejárape opa ára.

O bien:

Aleluia

Amomba’e guasúta Tupä Ñandejárape opa ára,

ichupe aropurahéita tapiaite.

Peha’ã ha pehecha Tupä Ñandejára imba’e porãha.

Ovy’a rasa upe hese ojeroviáva. R.

Heko vaívagui katu ndoikuaaséi mba’eve,

umíva opa va’erã tesaráipe.

Tupä Ñandejára ohendu umi ijohéi pyréva ñembo’e

ha oguenohẽ ichupe kuéra upe ojejopy vai hágui. R.

Tupä Ñandejára oñemboja umi ohasa asývare

ha oguenohẽ umi ikangypávape jejopy vaígui.

Heta mba’e vai rupi imarangatúva ohasa,

ha Tupä Ñandejára oguenohẽ ichupe umívagui. R.

ALELUIA Jn. 20, 29

Aleluia.

“Ko’ágäpa reroviáma Tomás che rechama haguére.

¡Ovy’a ite va’erä umi oroviáva ohecha’ÿre”!,

he’i Ñandejára Jesucristo.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Juan omombe’u háicha. Pejapysaka porãtapa hese?                                           

   3, 31-36

Upe ramo guare Juan Bautista oñe’ẽvo Tupä Ñandejárare, he’i: Pe yvágagui oúva oĩ opa ite mba’e ári. Pe yvy ariguáva niko yvy ári guánte ha oñe’ẽ umi mba’e yvy ári guáre. Pe yvágui oúva katu oĩ opa ite mba’e ári, ha omombe’u umi mba’e ohecha ha pohendu va’ekue.

Péicharõ jepe avave ndogueroviái ichupe. Oĩ ramo ogueroviáva katu, péicha ohechauka Tupã Ñandejára he’íva añeteha. Upe Tupã Ñandejára ombou va’ekue niko omombe’u umi mba’e Tupã Ñandejára he’i va’ekue ichupe, Tupã omoenyhẽgui ichupe Espíritupe. Túva niko ohayhu Ta’ýrape, ha opa ite mba’e ári ichupe omoĩ. Pe ojeroviáva Ta’ýrare oikovéne opa ára.

Pe ojeroviase’ỹva hese katu ndoikove mo’ãi. Ha Tupã Ñandejára oinupã pohýine ichupe.

Ñandejára Jesucristo Ñe’ẽ.