LECTURAS JUEVES SEMANA XIV TO

LECTURAS JUEVES SEMANA XIV TO

Ko’ágã ñahendúta Tupã Ñandejára ñe’ẽ Oseas arandukápe oĩ háicha  11, 1-4. 8c-9

Péicha oñe’ẽ Tupã Ñandejára:

“Che ahayhu va’ekue Israélpe imitãme, che ra’y niko ha’e, ahenói va’ekue  Egíptogui.

Upeichavérõ jepe aisãmbyhy va’ekue  Efraínpe ha ambo’e oguata haguã, ha’ekuéra katu ndohecha kuaái, cheha upe añangarekóva hese kuéra.

Mborayhu sãme amosã ha agueru che mba’erã, amboja che rováre pe hova, mitã kambúva ramo guáicha, che pópe amongaru ichupe kuéra.

Mba’éicha piko rohejáta, Efraín?

Mba’éicha piko rome’ẽta, Israel?

Rohundíta nga’u piko ahundi haguéicha táva Admá térã piko ajapóta nde hegui, pe ajapo va’ekue  Zeboíngui?

Che py’a niko hyku, roiporiahuvereko etereígui!

Na ñeme’ẽ mo’ãi che pochy rendýpe, nahundi jevy mo’ãi Efraínpe. Che hína Tupã pende Jára, nda ha’éi yvypóra. Che hína imarangatúva, aiméva pende apytépe, ha nda júi porohundívo.

Tupã Ñandejára Ñe’ẽ.

SALMO ÑEMBOHOVÁI  79, 2ac. 3b. 15-16

R. Tupã Ñandejára nde pu’akapáva, eju jevy ore rendápe.

Israel rerekua ore rendu kena.

Nde reisãmbyhýva ha reguapýva umi querubín ári,

ehechauka nde pokatu, ha eju ore pytyvõ. R.

Tupã Ñandejára nde pu’akapáva, eju jevy ore rendápe.

Amo yvága guive emaña ore rehe.

Eju ehecha parralty, nde po ite rupi reñotỹ va’ekue 

ha nde voi remongakuaa va’ekue . R.

ALELUIA Mc 1, 15

Aleluia.

Tupä Ñandejára Sambyhy hi’aguïma.

Pejevy pene rembiapo vaikuégui ha

peguerovia Marandu porä.

Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 10, 7-15

Upe ramo Jesús he’i hemimbo’ekuérape:

Ta peho pemoerakuã hi’aguĩmaha ñesãmbyhy yvágagui oúva. Pemonguera hasýva, pemoingove jevy omanóvape, pemonguera umi hete aipávape ha pemosẽ mba’epochy opavavégui. Peẽme niko oñeme’ẽ rei ko pokatu, ani pejerure hese mba’eve.

Ani peraha viru pende jehe, térã vosa oimeháichagua tapére guarã, térã pende ao pembojopyru haguã, térã pende py rehegua, térã yvyra pende po pegua. Opa omba’apóva niko oñemongaru va’erã voínte.

Peguahẽvo peteĩ távape térã oimeraẽ henda ojeikohápe, peheka ikatu va’erãvare pejerovia ha pepyta hógape, pesẽtaha ára peve. Ha hógape peguahẽvo, pemomaitei umi upépe oikóvape. Ha umi upepegua pene moguahẽ porã ramo, pejerure Tupã Ñandejárape upépe oĩ haguã py’a guapy, péicha’ỹ ramo katu, anínte pejerure. Ha na pene moguahëséi ramo térã na pene renduséi ramo katu, pesë pe óga térã pe távagui, ha peityvyro pende pýgui pe yvytĩmbo. Añetehápe ha’e peẽme, ágäára pahápe ichupe kuéra oñenupã pohyivéta umi táva Sodoma ha Gomórrape oiko va’ekuégui.

Ñandejára Jesucristo Ñe’ẽ