LECTURAS VIERNES SEMANA XIV TO

LECTURAS VIERNES SEMANA XIV TO

Ko’ágã  ñahendúta Tupã Ñandejára ñe’ẽ Oseas arandukápe oĩ háicha  14, 2-10

Peícha he’i Tupä Ñandejára:

Ejevyke Israel Tupã nde Járape, re’a va’ekue  niko ne rembiapo vaikuére!

Tapeho jevy Tupä Ñandejára rendápe ha peje ichupe: Eheja reíkena oréve ore rembiapo vaikue, ha ehendu ore ñe’ẽ.

Asiria nda ikatúi ore pe’a ivaívagui, kavaju ári jepe norokañy mo’ãi.

Ndo ro’e mo’ãvéi “Ore Jára”, mba’eve rojapo va’ekuépe ore po rupi.

Nde mante voi, ore Jára, reporiahuverekóva tyre’ỹme.

Aipohanóta ichupe kuéra heko pu’ãségui.

Ahayhúta ichupe kuéra, iñaña ramo jepe, ojeíma ichugui  kuéra che pochy. Israelpe guarã che ysapýichata, ha ha’e asusénaicha ipotýta, hapo imbaretéta, Líbano yvytýicha. Hakã nguéra ojepysóta, olívo rakã porãicha ha hyakuãta, kuri’y Líbanope guáicha.

Israel che pepo guýpe oñemo’ã jevýta , upérõ ha’e kuéra trígo týicha okakuaáta, parral týicha ipotýta ha herakuã mombyrýta Líbano pegua kaguýicha. Efraín he’íta upérõ: ‘Ndaikuaase véima mba’eve tupã gua’úgui’.

Che voi añangareko che retãguáre ha ahayhu ichupekuéra!

Che pype ojuhúta opa oikotevẽva”.

Umi iñarandúva ha iñakã guapýva, toikuaa ko’ã ñe’ẽ: Tupä Ñandejára rape naikarẽi, ha umi imarangatúva, upe rupi oguata, iñañáva katu upe rupi tuicha oñepysãnga.

Tupã Ñandejára Ñe’ẽ.

SALMO ÑEMBOHOVÁI   50, 3-4. 8-9. 12-14. 17

Opavave: Tupã Ñandejára, che romomba’e guasu va’erã.

Tupã Ñandejára, che poriahuvereko, nde niko ne mba’e porã.

Che poriahuvereko ha eipe’a

che árigui che rembiapo vaikue. O.

Nde rehecha ramo ipy’a porãva,

ha upe ne arandukue che py’a ruguáre opoko.

Che johéi pacholi rykuépe, ta che potĩ,

mandyjúicha ta che morotĩ. O.

Tupã Ñandejára, embopyahu che rekove ha ta imarã’ỹ,

che py’a to ñembopyahu ha ta imbarete.

Anítei che mosẽ ne renondégui,

térã reipe’a che hegui nde pytu marangatu. O.

Embopyahu jevy chéve vy’a

añandúva ajejopy vaihágui che renohẽvo,

ha nde pu’aka marangatu ta che mombarete.

Tupã Ñandejára, che juru eipe’a ha rogueropurahéine. O.

ALELUIA Jn 16, 13a. 14, 26d

Aleluia.

Ou vove ágä pe Espíritu Añetegua,

ha’e pene moingéta opa mba’e añeteguápe,

ha pene momandu’áta umi ha’e va’ekue peëme rehe.

Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 10, 16-23

Upe ramo Jesús he’i hemimbo’ekuérape:

Peikuaáke che pomondoha ku ovecháicha aguara guasu apytépe. Upévare pene arandu va’erã mbóicha ha pende reko  mirĩ va’erã pykasúicha.

Peñangarekóke pende jehe, cháke oĩta pene myakãsãva ha pene moĩva mburuvicha kuéra pópe, ha pene mboepotíva itupaokuéra rupi. Ha che remimbo’e haguére peẽ, pejereraháta sãmbyhyhára ha mburuvicha guasukuéra renondépe. Péicha, peẽ peñe’ẽta che rehe ichupekuéra, ha umi judio’ỹvape avei. Ha pene moĩvo hikuái mburuvicha kuéra pópe, ani pejepy’apy mba’épa térã mba’éichapa peñe’ẽta. Ijávo peẽme peñe’ẽ haguã, Tupã Ñandejára ome’ẽta peẽme mba’épa pejéta. Ha ndaha’e mo’ãi peẽ, peñe’ẽtava. Pende Túva Espíritu oñe’ẽta pende juru rupi.

Oĩta ome’ẽva tyvýra teépe jepe ojejuka haguã, ha oĩta túva ome’ẽva ta’ýrape. Mitã nguéra opu’ãta túva kuérare, ha ojukaukáne. Che remimbo’e haguére peẽ, avave nda ija’e mo’ãi pende rehe. Pe che rehe ojeroviáva ipaha peve katu, oikovéta.

Oĩ ramo pene muñáva peteĩ távagui, tapeho ambuépe. Añetehápe ha’e peẽme nda pe japopa mo’ãiha pene rembiapo táva kuéra Israelgua rupi, che, yvypóraicha aju va’ekue , aju jevy mboyve.

Ñandejára Jesucristo Ñe’ẽ