SÁBADO SEMANA XIV TO

Ko’ágã ñahendúta Tupã Ñandejára ñe’ẽ Isaías arandukápe oĩ háicha               6, 1-8

Upe áño omano haguépe mburuvicha guasu Ozías, ahecha Tupä Ñandejárape guapyha ijyvate etereívape; ijahoja ruguái omoenyhẽ pe tupao. Tekove tata rendýpe ojoguáva oĩ hi’ári ha peteĩ teĩ, 6 ipepo. Mokõi ipepópe ojaho’i hova, mokõime hetyma, ha mokõi hembývape oveve. Ha he’i joa ojupe:

“Imarangatu, imarangatu, imarangatu Tupã Ñandejára ipu’akapáva; yvy tuichakue henyhẽ heko mimbipágui.”

Oñehendúvo ko’ã ñe’ẽ, tupao rokẽnguéra oryryipa ha pe tupao henyhẽ tatatĩgui. Ha che ha’e: “Amanóta! Ahecha niko che resa tee rupi mburuvicha guasu Tupã  Ñandejára ipu’akapávape ha che juru niko naipotĩri añe’ẽ haguã ha aiko tetãgua ijuru potĩ’ỹva apytépe.”

Upérõ peteĩva umi tekove tata rendýpe ojoguáva oveve che aimeha gotyo. Ipópe tatapỹi ohupi va’ekue  altárgui, omboja che juru rehe ha he’i chéve:

“Péina kóva ojáma nde jurúre, ojepe’áma ne angaipa, ha umíva ojeheja reíma ndéve.”

Upérõ ahendu Tupã Ñandejára he’i ramo: “Mávapepa amondóta? Mávatapa ñane rembijokuái?”

Che ha’e: “Ápe aime. Che jokuái chéve.”

Tupã Ñandejára Ñe’ẽ.

SALMO ÑEMBOHOVÁI       92, 1-2. 5

Opavave: Mburuvicha guasu hína Ñandejára, oñeñuã mimbipápe

Mburuvicha guasu hína Tupä Ñandejára.

Ñandejára oñeñuã mimbipápe ha ojeku’akua pokatúpe.

Hatã yvy omohenda, ndoku’éi chéne araka’eve. O.

Upe nde guapyha oĩ ymaite guive, nde katu opa ára reikove.

Ore Jára, umi ne rembiapoukapy niko

mba’e ijeroviapýva hína.

Teko marangatu ombojegua nde tupao opa ára. O.

ALELUIA 1Ped 4, 14

Aleluia.

Pevy’a va’erä pejehova api ramo Cristo réra rayhupápe.

Espíritu sambyhyha pegua, Tupä Ñandejára Espíritu,

oguejy pende ári.

Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 10, 24-33

Upe ramo Jesús he’i hemimbo’ekuérape:

Ndaipóri niko temimbo’e mba’e guasuvéva imbo’eháragui, ha ndaipóri tembiguái mba’e guasuvéva ijáragui. Upévare, peteĩ temimbo’e ovy’a va’erã ohupitýrõ imbo’ehárape, ha peteĩ tembiguái ijárape. Óga járare oje’érõ Beelzebú, piko mba’e ndoje’e mo’ãi umi hóga guáre?

Ani pekyhyje avavégui. Ndaipóri okañýva ojehecha’ỹ va’erã ha oñemíva ojekuaa’ỹ va’erã. Ko che ha’éva peẽme pytũmbýpe, oñehendúne ára sakãme. Ha upe che ha’éva peẽme pende apysápe, peguerosapukái óga ári guive. Ani pekyhyje umi pende reténte ojukávagui, ha ikatu’ỹva ohundi pene ánga. Pekyhyje uvei Tupã Ñandejáragui, ikatúva ohundi pene ánga ha pende rete aña retãme.

Noñeme’ẽi nga’u piko mokõi guyra’imi viru pehẽngue míre. Opáichavo, peteĩnte jepe nomanói pende Túva ndoipotái ramo. Pene akãrague peteĩ teĩ jepe niko ha’e oikuaapa. Aníke aipo ramo pekyhyje, peẽ niko mba’e guasu eteve hína heta guyra’ígui.

Oimeraẽ he’íva opavave renondépe che rehe ojeroviaha, che añe’ẽne hese che Ru, yvágape oĩvape. Ha oimeraẽ he’íva opavave renondépe nda che kuaaiha, che avei ha’éne che Rúpe, yvágape oĩva renondépe, ndaikuaaiha ichupe.

Ñandejára Jesucristo Ñe’ẽ