LECTURAS LUNES DECIMOQUINTA SEMANA

LECTURAS LUNES DECIMOQUINTA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽ Isaías arandukápe oĩ háicha 1, 10-17

Sodoma ruvichakuéra, pehendu Tupã Ñandejára Ñe’ẽ, Tupã remimbo’ére pejapysaka, peẽ Gomorragua. Tupã Ñandejára he’i: “Mba’e piko chéve pene mymbajuka.
Che mbyajúma pende mymbahapy peikuave’ỹháme ovecha mácho ha pende tóro kyrakue, che mongueráima tóro ra’y ha kavara mácho ruguykue, peju ramo peñemboja che rendápe.

Máva piko ojerure peẽme pepyrũmba haguã che korapýre?

Anivéke peru kuave’ẽmby výro reíva, pene insiénso ryakuãngue nahetũséi. Jasy pyahu, pytu’u ára ha ñemboaty. Vy’a guasu oĩháme japu che mbopochy.

Che py’a ite guive ndacha’éi pende jasy pyahu ha aretekuérare. Umívagui oiko mba’e pohýi, ha che mokane’õma. Pende po pehupívo ñembo’épe, amboty che resa, ha peñembo’eve ramo jepe, nahendúi. Pende po tuguy omongy’apa.

Pejepohéi, peñe mopotĩ! Peipe’a che renondégui pene rembiapo ahẽ! Anive pejapo ivaíva!

Pejeheko mbo’e pejapo haguã iporãva, peñe ha’ã pejapo pe heko jojáva, peipytyvõ ojejopy vaívape, pembojovake hekópe tyre’ỹme, pesẽ kuña iména manóva rehehápe, oñeme’ẽ haguã ichupe imba’éva.”

Tupã Ñandejára Ñe’ẽ.

SALMO ÑEMBOHOVÁI 49, 8-9. 16b-17. 21. 23

Opavave: Tupã Ñandejára opa ite ára heko joja

Mba’eve nda rekói ha’e va’erã mymbahapy pejapóva.
Umíva niko opa árape che renondépe pemoguahẽ.
Nda jeruréi peẽme pene rymba tóro,
térã kavara mácho pende korágui. O.

“Mba’éicha rupi che rembiapoukapy nde jurúgui ahendu?
Mba’éicha rupi ne mandu’a che ñe’ẽme’ẽre?
Roheko mbo’e ramo niko mba’eve nde reikuaaséi,
ha che ñe’ẽre nde rejepy’apýi. O.

Opa ko’ã mba’e niko rejapo. Ha piko reipota akirirĩ?
Nde rovakete anohẽta ndéve ne rembiapo vaikue.
Pe che momba’e guasúva ipy’aite guive,
ha oikuave’ẽva chéve upéva, ha’e che momba’e. O.

ALELUIA Mt 5, 10

Aleluia.
Ovy’a va’erä umi oñembohovakéva oikóre teko jojápe ichupekuéra guarã Sambyhy oĩva Yvágape.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese? 10, 34; 11, 1

Upe ramo Jesús he’i hemimbo’ekuérape: Ani peimo’ã che aju hague py’aguapy agueru haguã ko yvy ári. Nda júi agueru haguã py’a guapy, ñorairõ uvei katu. Che aju amoingo vaívo ta’ýra itúva ndive, mitãkuña isy ndive ha tembireko iména sy ndive. Ha péicha, pende rogagua voi pende rerekóta ija’e’ỹha ramo.

Pe itúva térã isýpe ohayhuvéva che hegui, ndaikatúi oiko che remimbo’e ramo. Ha upe ohayhuvéva ta’ýra térã tajýrape che hegui, ndaikatúi oiko che remimbo’e ramo. Ha pe ohupi’ỹva ikurusu ijapére che moirũ haguã, upéva ndaha’éi che mba’e. Pe hekovére hakate’ỹva, omanóta. Pe che rehe ojeroviáva ha hekovére nahakate’ýiva katu, ojuhúta tekovete.

Oimeraẽ peẽme pene moguahẽ porãva, che moguahẽ chéve.

Ha upe chéve che moguahẽva, omoguahẽ avei che mbouharépe. Omoguahẽva maranduhárape, maranduhára haguére ha’e, upéva ohupity va’erã jopói Tupã Ñandejáragui oúva maranduhárakuérape. Ha pe omoguahẽva peteĩ imarangatúvape, imarangatúgui ha’e, upéva ohupity va’erã jopói Tupã Ñandejáragui oúva imarangatúvape. Oimeraẽ ome’ẽva hi’ymínte jepe ko’ã che remimbo’épe, añetehápe ha’e peẽme ndopyta mo’ãiha hekovia’ỹre ichupe.

Ha Jesús oheko mbo’epa rire umi 12 hemimbo’épe, osẽ oho upégui, oporombo’e ha oñemoñe’ẽ haguã umi táva upe rupigua rupi.

Ñandejára Jesucristo Ñe’ẽ