JUEVES SEMANA XIX TO

Ñahendúta Tupã Ñandejára Ñe’ẽ San Pablo ohai va’ekue Éfeso guápe                  3, 14-21

Che pehẽnguekuéra:

Añesũ Túva renondépe. Ha’e rupi niko mayma yvágape oĩva ha tetã nguéra yvy arigua oikove. Ajerure Túvape ome’ẽ haguã peẽme imba’e reta tuicha itégui pende py’a omombarete haguã Espíritu Santo rupi, ha avei ajerure, pejerovia rupi Cristo rehe, ha’e oiko haguã pende py’apýpe, ha pende rekove oñembohapo mbarete haguã mborayhúpe.

Péicharõ peikuaáta opa umi Tupã Ñandejára mba’éva ndive mba’éicha ite pevépa tuicha mborayhu Cristo oñandúva pende rehe. Ajerure Tupã Ñandejárape, peñandu haguã peẽ upéva pe mborayhu, tuichavéva opa ite mba’e ikatúvagui jaikuaa. Péicharõ, pene renyhẽtéta Tupã Ñandejáragui.

Ha ko’ágä, to ñemomba’e guasu Tupã Ñandejára ikatúva ojapo heta iteve mba’e ñande ñaimo’ã téra jajerurévagui, ipokatu rupi ñande pype. Cristo iglésia, ha Cristo Jesús rupi to ñemomba’e guasu Tupã Ñandejárape, opa ára. Amén.

Tupã Ñandejára Ñe’ẽ.

SALMO ÑEMBOHOVÁI      32, 1-2. 4-5. 11-12. 18-19

R. Yvy niko henyhẽ chovi Tupä Ñandejára mborayhúgui.

Mayma imarangatúva to momba’e Tupä Ñandejárape.

Omomba’e guasu va’erã voínte ichupe, opa imarangatúva.

Pemomba’e guasu Tupä Ñandejárape mbaraka púpe, árpa púpe, pepurahéi ichupe. R.

Upe Tupä Ñandejára he’íva niko añete, ha opa mba’e ojapo teko jeroviápe.

Ha’e ohecha ramo teko joja ha opa mba’e hendápe ojejapóva.

Yvy niko henyhẽ chovi imborayhúgui. R.

Umi mba’e Tupä Ñandejára ojaposéva katu ndopa reíri chéne araka’eve.

Ovy’a upe tetã oguerekóva Tupãme ijára ramo,

upe tetã ha’e oiporavo va’ekue  imba’e teerã. R.

Tupä Ñandejára katu oñangareko umi ichupe

omomba’évape ha imborayhu rehe ojeroviávape.

Umívape ha’e ndohejái omano.

Omoingove katu ichupe kuéra ñembyahýi guasu ou jave. R.

ALELUIA Flp 3, 8-9

Aleluia.

Opa mba’épe che ahecha yty ramo,

amomba’éma guive Cristope ha aime hendive.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                                                       12, 49-53

Upe ramo Jesús he’i hemimbo’ekuérape:

“Che aju va’ekue  amoendývo tata yvypóra apytépe, ha aipota itépa ojepotáma ra’e hína! Ahasa va’erã peteĩ jehasa asy nde vaívare. Ha mba’éicha itépa aipotáma hína oguahẽ upe ára! Peimo’ã piko che aju hague aru haguã py’aguapy ko yvy ári?

Ha’e peẽme nahániriha, jejoavy uvei. Ko’águi rire, peteĩ ógape oikohápe 5, mbohapy opu’ãta mokõire, ha mokõi mbohapýre. Túva opu’ãta ta’ýrare, ha ta’ýra túvare. Sy opu’ãta imemby kuñáre, ha memby kuña isýre. Ména sy opu’ãta imemby rembirekóre, ha tembireko opu’ãta iména sýre.”

Ñandejára Jesucristo Ñe’ẽ