MIÉRCOLES SEMANA XIX TO

Ñahendúta Tupã Ñandejára Ñe’ẽ San Pablo ohai va’ekue Éfeso guápe         3, 2-12

Che pehẽnguekuéra:

Pehendúmane ra’e Tupã Ñandejára imba’e porã rupi, ome’ẽ hague chéve amba’apo haguã pende apytépe. Tupã Ñandejára oikuaauka va’ekue  chéve umi mba’e ha’énte oikuaáva ha ojaposéva, amombe’úma haguéicha peẽme mbykymi.

Upéva pehechávo, pehecha kuaáta che aikuaaha umi mba’e Tupã Ñandejárante oikuaáva Cristo rehegua, ha avavépe ndojekuaaukái va’ekue  araka’eve. Ko’ágä  katu, Tupã Ñandejára oikuaauka umíva umi mba’e, ijapóstol ha imaranduhárakuéra marangatúpe Ijespíritu rupi.

Upe mba’e Tupã Ñandejára ndoikuaaukái va’ekue  niko kóva: Marandu porã Cristo ogueru va’ekue  rupi, Tupã Ñandejára ohenoiuha opaichagua tetã guápe ha ohupityuka ichupekuéra umi ha’e ome’ẽ va’ekue  imba’e teerã Israel guápe, peteĩcha oiko haguã hikuái peteĩ tete rehegua ramo ha opavave ohupity haguã umi mba’e Tupã Ñandjára he’i va’ekue  ome’ẽtaha.

Tupã Ñandejára imba’e porãgui che ndive ha che poriahuverekógui, ipokatu rupi che moĩ hembiguái ramo ko Marandu Porã amosarambi haguã.

Che niko che michĩve umi imichĩvéva apytégui, opa umi Tupã Ñandejára mba’évagui. Ha’e katu ome’ẽ chéve ajapo haguã ko mba’e tuicha itéva: Amoguahẽ haguã judio’ỹvape Marandu porã ha amombe’u haguã umi mba’eta ijojaha’ỹva oúva Crístogui.

Tupã Ñandejára oheja chéve aikuaauka haguã opavavépe mba’éichapa ojehúta pe mba’e ha’e ojaposéva ha ha’énte oikuaáva.

Tupã Ñandejára, opa mba’e apohare, niko oguereko va’ekue  kóva ñemiháme, avave oikuaa’ỹre yma ite guive. Ko’ágä  katu, Cristo iglésia rupi, opa umi yvategua ruvichakuéra oikuaáta mba’éichapa Tupã Ñandejára iñarandu ha upéva ojehechaha opa mba’épe.

Tupã Ñandejára ojapo kóicha ojapose haguéicha opa ára, ha ojapo Ñandejára Cristo Jesús rupi. Ha Cristo rupi ha hese jajeroviágui, jeroviapópe ikatu ñeñemboja Tupã Ñandejára rendápe.

Tupã Ñandejára Ñe’ẽ.

SALMO ÑEMBOHOVÁI   Is 12, 2-6

R. Pepurahéi Tupä Ñandejárape, ojapo haguére mba’e ndaijojaháiva

Ha’e hína Tupã Ñandejára, jejopy vaígui che pe’áva,

hese ajerovia ha ndakyhyjéi.

Che Jára che mo’ã ha che mombarete, opa mba’e vaígui che pe’a. R.

Pembo aguyje  Tupä Ñandejárape, héra pehenói peñe mbo’e jave,

Peikuaauka tetã nguérape imba’e mombe’upyrã,

pero sapukái héra jojaha’ỹ. R.

Pepurahéi Tupä Ñandejárape, ojapo haguére

mba’e ndaijojaháiva, ha opa rupi ete pemoerakuã.

Pesapukái vy’águi Siongua: Tuicha itégui pende apytépe

Israelgua Imarangatúva!” R.

ALELUIA Mt  24, 42a.44

Aleluia.

Peikóke pejesarekohápe ha peñe mbosako’ihápe

Ñandejára Jesucristo ou jevýta pe oñeimo’ä’ÿha jave.

Aleluia.

EVANGELIO

Nandejára Jesucristo rekove ha hemimbo’e San Lucas omombe’u háicha                    12, 39-48

Upe ramo Jesús he’i hemimbo’e kuérape:Perekóke kóva pene akãme: Peteĩ óga jára oikuaa ramo araka’etépa oikéta hógape mondaha, ha’e ndoke mo’ãi ha ndoheja mo’ãi avavépe oike hógape omonda haguã ichupe. Peẽ avei pejesareko va’erã. Peimo’ã’ỹve jave niko che, yvypóraicha aju va’ekue, ajúta.”

Pedro oporandu Jesúspe: Che Jára, ere piko ra’e ko ñe’ẽ mbojoja oréve guarãnte, térãpa opavavépe guarã?

Jesús he’i: Mávapa hína pe tembiguái ijeroviaháva ha imba’e recha kuaáva? Upéva hína pe ijára omoĩva ipo guýpe ambue hembiguái kuéra omongaru haguã oikotevẽ jave. Ovy’a ite va’erãnepa pe tembiguái, ijára oguahẽ vove ojuhúva ojapopaha hekópe hembiapo. Añetete ha’e peẽme, pe óga jára omoĩne ipo guýpe opa oguerekóva.

Pe tembiguái oimo’ã ramo ijára hi’aretaha ha oñepyrũ oñemboharái hapicháre, ha osẽ okaru ha omboy’u umi tekove ka’u ndive. Ha ijára ou jevýne ha’e oimo’ã’ỹve ha oha’arõ’ỹve jave, ha omoangu’íne ichupe teju ruguáipe, oñemboepoti háicha hova mokõivape.

“Pe tembiguái oikuaáva ijára rembipota, ha noñembosako’iri ha naiñe’ẽ rendúi ichupe, oñenupã hetáne. Ha pe tembiguái, oikuaa’ỹre ojapóva ojapo’ỹ va’erã, oñenupã’ivéne. Pe oñeme’ẽ hetávape, heta avei ojejeruréne. Ha pe ojejeroviaveha ndive ojejopyvéne.”

Ñandejára Jesucristo Ñe’ẽ.