MARTES SEMANA XIX TO

Ñahendúta Tupã Ñandejára Ñe’ẽ San Pablo ohai va’ekue Éfeso guápe                         2, 12-22

Che pehẽnguekuéra:

Yma peẽ peiko va’ekue  Cristo rehe’ỹ ha ndaha’éi va’ekue  Tupã Ñandejára retãgua. Tupã Ñandejára ñe’ẽ me’ẽ na pende rupitýi va’ekue  ha avei umi mba’e ha’e he’i va’ekue  ome’ẽtaha hetã guápe.

Peiko va’ekue  ko yvy ári Tupã Ñandejára rehe’ẽ ha mba’eve ndaperekói va’ekue  peha’arõ haguã. Ko’ágã katu, pejoajúvo Cristo ndive, peẽ mombyry peime va’ekue  Tupã Ñandejáragui ko’ágä  peñe moaguĩ, pe huguy ha’e oñohẽ va’ekue  rupi.

Cristo voi niko ogueru ñandéve py’a guapy. Judío ha judío’ỹvagui ojapo peteĩ tetã, ha omano rupi kurusúre, oity pe tápia omomombyrýva ichupe kuéra ojuehegui. Ha’e voi oheja rei umi judío rembiapoukapy. Péicha, judío kuéra ha judío’ỹvagui ojapo peteĩ mba’e ipyahúva ojoaju rupi hendive, ha ogueru ichupe kuéra py’a guapy.

Omano rupi kurusúre, ha’e ohundi pe a’e’ỹ oguereko va’ekue  judío ha judio’ỹva ojuehe ha omoingo porã ichupe kuéra Tupã Ñandejára ndive. Mokõivégui ojapo peteĩ mba’e añónte.

Cristo niko ou va’ekue  omoherakuãvo marandu porã, oguerúva py’aguapy opavavépe: peẽme judio’ỹvape mombyry peiméva Tupã Ñandejáragui, ha judíokuérape aguĩ oĩvape Tupã Ñandejáragui. Cristo rupi niko opavave ikatu ñaguahẽ ñande Túva yvagapegua rendápe peteĩ Espíritu Santo rupi.

Upévare, peẽ ndaha’e véima tetã ambuegua, napeime véima yvy pene mba’e’ỹvape. Ko’ágä  katu peẽ, peteĩ tetãnte Tupã Ñandejára mba’éva ndive, ha Tupã Ñandejára ñemoñare hína peẽ.

Peẽ niko, ku ógaicha oñemopu’ãva ita oñemboguapy va’ekue  ári: umi apóstol ha maranduhára kuéra hína umi ita, ha Jesucristo voi pe ita tuichavéva. Cristo rupi, pe óga opu’ã ha ojoajupa porã ojuehe opa hendápe, opu’ãmba peve ha oiko ichugui  Tupao marangatu oñemboykéva Tupã Ñandejárape.

Cristo rupi avei, peẽ pejoajupa opavave ndive oiko haguã pende hegui peteĩ Tupao Tupã Espíritu oiko haguã.

Tupã Ñandejára Ñe’ẽ.

SALMO ÑEMBOHOVÁI 84, 9ab. 10-14

R. Tupä Ñandejára ome’ẽta py’aguapy hetãme

Ajapysakáta Tupã Ñandejára he’ívare ome’ẽtaha py’aguapy

hetãme ha umi hese ojeroviávape anive haguã ojavy hikuái.

Hi’aguĩ ára oguenohẽvo jejopy vaígui ichupe omomba’évape.

Tupã Ñandejára, nde reko mimbipa ojekuaáne ore yvýpe. R.

Mborayhu ha añete oñuguãitĩne, py’aguapy ha teko joja oñoañuáne.

Añete heñóine upe yvýgui, ha teko joja yvágagui oma’ẽne. R.

Tupä Ñandejára, ha’ete voi ome’ẽta ñandéve iporãva,

ha ko ñande yvy ome’ẽta hi’a.

Teko joja ohóne henonderã, ombosako’ívo ichupe haperã. R.

ALELUIA Lc 21, 36

Aleluia.

Peiko jesarekopýpe ha opa ára peñembo’e.

Péicha peñe mbojovakéta pekyhyje’ÿre

Ñandejára Jesucristo rovake.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                                                       12, 35-38

Upe ramo Jesús he’i hemimbo’ekuérape:

“Peime va’erã umi tembiguáicha, oha’arõva ijárape ou jevy pe karu guasu menda rehe guápe oho haguégui, tataindy rendy reheve, okẽ oipe’a haguã ichupe ombota vove oguahévo.

Ovy’a ite va’erã niko umi tembiguái, ojevývo ijára ojuhúva opáy. Ha’e peẽme, pe ijára voi omboguapytaha ichupe kuéra mesápe ha oñemoĩta ome’ẽ peteĩ teĩme pe tembi’u. Ovy’a iténe ha’e kuéra ojejuhúrõ opáy, ijára oguahẽrõ jepe pyhare pyte térã ko’ẽ mbota.

Ñandejára Jesucristo Ñe’ẽ