LECTURAS JUEVES SEMANA XV TO

LECTURAS JUEVES SEMANA XV TO

Ko’ágã ñahendúta Tupã Ñandejára ñe’ẽ Isaías arandukápe oĩ háicha               26, 7-9. 12. 16-19

Imarangatúva rape naikarẽi.

Nde rejapo ichupe guarã tape ojojáva.

Ore avei roñeñandu kyhyje’ỹre upe tape remoïvape ne rembiapoukapy rupi, ore Jára.

Nde réra rehe ore mandu’a asy!

Che py’a ite guive nde rehe che ãho pyharekue, ko’ẽ mboyve guive roheka che py’apýpe.

Reporo mbojovake ramo yvy ári, yvypóra oikuaáta mba’épa he’ise teko joja.

Nde, ore Jára, reme’ẽ oréve pytu’u.

Nde rehe ae opa rojapóva osẽ porã oréve.

Ore Jára, rovy’a’ỹ jave rohenói, rosapukái rojejopy jave, ore nupã ramo ne tukumbópe.

Ore Jára, ne renondépe roime kuña imemby potáva, ojepoka ha osapukái rasývaicha.

Ore rye guasu, rojepoka ore memby haguãicha ha yvytúnte ore memby.

Ndoroipe’ái ivaívagui ore retãme, ha ndaipóri mo’ãi yvypóra omoenyhẽtáva ko yvy.

Judagua omano va’ekue  oikove jevýta , hetekue opu’ã jevýta,

yvýpe okéva opáy jevýta  ha osapukái rorýta.

Nde ysapy niko oporomoingove, ha umi omano va’ekue  heñói jevýta  yvýgui.

Tupã Ñandejára Ñe’ẽ.

SALMO ÑEMBOHOVÁI       101, 13-14b. 15-21

Opavave: Tupã Ñandejára oma’ẽ yvýre amo yvatégui

Nde katu che Jára, opa ára reikove, nde rérare maymáva imandu’áne.

Epu’ã, eiporiahuvereko Siónpe,

oguahẽma ára reiporiahuvereko haguã.

Umi nde rehe ojeroviáva ohayhu ijita kuéra, ha ombyasy itapereha. O.

Tupã Ñandejára, tetã nguéra nde réragui okyhyjéne,

mburuvicha guasu kuéra ne momba’éne.

Tupã Ñandejára omopu’ã jevy vove Sión, ha ojechaukávo heko mimbipápe,

ohendúne imboriahúva ñembo’e

ha nomboykéi chéne imba’e jerure. O.

Ko’ã mba’e kuatiápe toñemoĩ, oikuaa haguã umi oútáva,

ha oikove’ỹva gueteri ágã omomba’e guasu Ñandejárape.

Tupã Ñandejára oma’ẽ yvýre amo yvatégui,

upe hekoha marangatu guive oma’ẽ,

ohendu haguã iñapytĩmbýva ñembyasy,

ha umi ojejukátavagui opoi haguã. O.

ALELUIA Mt 11, 28

Aleluia.

Ñandejára Jesucristo he’i:

Peju che rendápe opavave ojepy’apy ha ikane’öva

Che pomombytu’úta.

Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 11, 28-30

Péicha he´i upe ramo Ñandejára:

Peju che rendápe opa peẽ pene kane’õ ha pemba’apo pohýiva, ha che pomombytu’úta. Peheja tamoĩ pende apére che mba’e pohýi, ha pejapo che ha’éva peẽme. Ha peikuaáta che py’a porãha ha nda jejapoiha, ha che ndive pejuhúta pytu’u. Pe mba’e pohýi amoĩtava pende apére niko ivevýita peẽme, ha ndaipohýi mo’ãi upe aipotáva peraha.

Ñandejára Jesucristo Ñe’ẽ