LECTURAS JUEVES SEMANA 27º DURANTE EL AÑO

LECTURAS JUEVES SEMANA 27º DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Galacia guápe    3, 1-5

Peẽ Galaciagua ñembotavy. Máva piko pene mbotavy ra’e ajeve ramo na pende ñe’ẽ rendúi añeteguáre. Rohechauka porã va’ekue  peẽme mba’echa itépa Jesucristo omano kurusúre.

Aipotánte pembohovaimi chéve ko aporandúva: Oguahẽpa ra’e peẽme Tupã Ñandejára Espíritu tembiapoukapy rupi, térãpa pejerovia haguére pe marandu porãre? Pende tavy eterei piko ndapeikuaái haguã, peñepyrũ rire ramo Espíritu ndive peguahẽseha ko’ágä  hu’ãme yvypóra rehegua reípe? Heta mba’e porã piko pehasa mba’everã?

Aniche va’erã niko mba’everã! Tupã Ñandejára ome’ẽ ramo peẽme Ijespíritu ha ojapo mba’e hechapyrãva, mba’ére ojapo? Ndaha’éi pejapo haguére tembiapoukapy, perovia haguére pe marandu porã pehendu va’ekuénte.

Tupã Ñandejára Ñe’ẽ.

SALMO ÑEMBOHOVÁI   Lc 1, 69-75

Opavave: To ñemomba’e guasu Tupã Ñandejárape.

Péina ombou ñandéve peteĩ Pysyrõhára ipu’akapáva

hembiguái David ñemoñare rógape, omombe’u haguéicha yma guive

imaranduhára marangatu juru rupi. O.

Ñande pe’ataha umi ñande rehe ija’e’ỹva

ha ñande rayhu’ỹva pógui, oiporiahuverekotaha

umi ñande ru ypykuépe ha ndahesarái mo’ãiha iñe’ẽ me’ẽ marangatúgui. O.

Ñe’ẽ ome’ẽ ñande ru Abrahámpe: ohejataha ñandéve jaiko jakyhyje’ỹre, ñande rehe ija’e’ỹva poguype’ỹ,

jaiko haguã ichupe hembijokuái ramo marangatu ha tekojojápe, ñaime haguã henondépe tapiaite. O.

ALELUIA Cf. Hech 16, 14b

Aleluia.

Tupã Ñandejára eipe’a ore korasõ rokẽ,

ikatu haguã rojapyhy nde ra’y Jesucristo ñe’ẽ.

Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha 11, 5-13

Upe ramo Jesús he’i hemimbo’ekuérape:

Peteĩva peẽ gua’u ra’e oguereko peteĩ iñirũ, pyhare pyte ohóva hógape ha he’i ichupe: ‘Che irũ: eiporuka chéve mbohapy mbuja, peteĩ che irũ niko péina oguahẽ mombyrýgui che rógape, ha ndarekói mba’eve ame’ẽ va’erã ichupe. Añetehápe niko ha’e pe kotypy guive nde’i mo’ãi ichupe: ‘Ani che moangekói, che rokẽ oñemboty, ha che ra’y kuéra ha che roñeno hína. Ndaikatúi apu’ã ame’ẽvo ndéve mba’eve.’

Ha’e peẽme, nopu’ãi ramo jepe omba’e me’ẽvo ichupe, iñirũ haguére, ome’ẽne ichupe opa mba’e oikotevẽva anive haguã omoangekói ichupe.

Upévare che ha’e peẽme: “Pejerure, ha Tupã Ñandejára ome’ẽta peẽme. Peheka ha ha’e ojuhukáta peẽme. Pembota Tupã Ñandejára rokẽ ha ha’e oipe’áta peẽme.”

Ojerurévape niko oñeme’ẽ, ohekáva katu ojuhu, ha pe okẽ ombotávape ojepe’a.

Máva peẽva piko, pende ra’y ojerure ramo peẽme pira, peme’ẽta ichupe mbói? Térã ñandu kavaju ojerure ramo ichupe ryguasu rupi’a? Peẽ, pene rembiapo vaíva Tupã Ñandejára renondépe, peme’ẽkuaa ramo iporãva pende ra’y kuérape, ko’yteve pende Ru yvágape oĩva ome’ẽta Espíritu Santo umi ichupe ojerurévape.

Ñandejára Jesucristo Ñe’ẽ.