LECTURAS JUEVES SEMANA 32° DURANTE EL AÑO

LECTURAS JUEVES SEMANA 32° DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Filemónpe  7, 20                

Che pehẽngue  ahayhu etéva:

Che mbovy’a ha che mokyre’ỹ ne mborayhu. Nde niko che pehẽngue, remoenyhẽva py’a pytu’úgui opa Tupã Ñandejára mba’évape.

Upévare, ikatu ramo jepe Cristo apóstol ramo ha’e ndéve rejapo haguã, iporãve chéve ajerure ndéve, mborayhu rérape. Che, Pablo, che tujámava, ha ko’ágã aimeva hína yvyrakuápe Cristo rehehápe, ajerure ndéve rejapomi va’erã che ra’y Onésimo rehe, añeñandúgui itúva ramo, ñande jeroviápe, ko yvyrakuápe.

Ymave, Onésimo ndéve guarã ndaha’éi va’ekue  peteĩ tembiguái mba’everã iporã guasúva. Ha ágã katu iporã ñandéve guarã, chéve guarã ha ndéve guarã avei. Amondo jevy ndéve, ha’e niko che ra’y ahayhúva. Che niko aipota va’erã mo’ã opyta ko’ápe che ndive, che pytyvõ haguã nde rangue, aime aja yvyrakuápe, Cristo marandu rehehápe. Ha niko ndajaposéi mba’eve nde remoneĩ mboyve, ikatu haguã che pytyvõ, ndaha’éi che pytyvõ va’erãgui, che pytyvõséguinte.

Ikatu niko oime Onésimo ojei nde hegui ra’e sapy’ami, rereko haguã ichupe upe rire opa ára guarã, ndaha’e véima tembiguáicha, iporãvéva tembiguáiguima katu, peteĩ ne pehẽngue rehayhúvaicha. Che ahayhu eterei ichupe. Ha nde, rehayhuve va’erã katu ichupe, ha ndaha’éi yvypóraicha añónte. Ne pehẽngue Ñandejára reheguáva ramo katu avei.

Aipórõ, che rereko ramo ne pehẽnguérõ Cristo reroviaha reheguáva ramo, emoguahẽichupe, che moguahẽva ramo guáicha chéve voi. Oime rire ojapo vai nde rehe térã oguereko ohepyme’ẽ va’erã ndéve, che amoengoviáta ndéve.

Che, Pablo, che po rupi amoĩ ko kuatiáre: che ahepyme’ẽta. Nda’éiko ndeve hína nde voi rerekoha rehepyme’ẽ va’erãha chéve nde jehe. Upéicha, che pehẽngue, ajerure ndéve rejapomi haguã ko ajeruréva, Tupã Ñandejára rérape. Emombytu’umi che py’a, Cristo rayhupápe.

Tupã Ñandejára Ñe’ẽ.

SALMO ÑEMBOHOVÁI   145, 7-10

Opavave: Tupã Ñandejára omopu’ã umi ikangývape

Tupä Ñandejára ojapo opa ára he’i va’ekue.

Oñemoĩ uvei ojejopy vaíva ykére, ha omongaru iñembyahýivape.

Tupã Ñandejára opoi umi iñapytímby ojererekóvagui, O.

Tupã Ñandejára oheja umi ohecha’ỹvape ohecha jevy,

Tupã Ñandejára omopu’ã umi ikangývape,

Tupä Ñandejára ohayhu umi heko jojávape,

Tupã Ñandejára ohayhu umi ndaha’éiva hetäguápe. O.

Tupä Ñandejára omboyke umi hembiapo vaíva rape,

ha ityre’ỹ ha iména manóvape ha’e oipytyvõ.

Táva Sión! Ñandejára ne sãmbyhýta opa árape.

To ñemomba’e guasu Tupã Ñandejára. O.

ALELUIA Jn 15, 5

Aleluia.

Ñandejára Jesucristo he’i: “Che hína pe parral ha peẽ umi hakã .

Upe oïva che ndive, ha Che hendive, heta hi’a”.

Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha     17, 20-25

Upe ramo umi fariséo oporandu Jesúspe araka’épa oguahẽ va’erã Tupã Ñandejára orosãmbyhy, ha ha’e he’i ichupekuéra: Tupã Ñandejára sãmbyhy oguahẽvo ndaha’éi opavave ohecha va’erã.

Ndoje’e mo’ãi: ‘Péina ápe’ térã ‘Péina amo’. Tupã Ñandejára sãmbyhy niko oĩma pende apytépe. Ha he’i hemimbo’ekuérape: Oguahẽta ára peẽ pehechasetaha peteĩ ára jepe, pe Tupã Ñandejára ra’y ou va’ekue  yvypóraicha oikoha, ha ndapehecha mo’ãi. Oiméta he’íva: ‘Kóina ápe’, térã ‘Péina amo’.

Ani peho hapykuéri. Pe aratirícha overávo ohesapepáva ára tuichakue, péichata pe Tupã Ñandejára ra’y ou va’ekue  yvypóraicha ou jevyha ára. Tekotevẽnte ohasa asy heta raẽ, ha ojahéi hese yvypóra ko’ágägua.

Ñandejára Jesucristo Ñe’ẽ.