LECTURAS MIÉRCOLES SEMANA 32° DURANTE EL AÑO

LECTURAS MIÉRCOLES SEMANA 32° DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Titope  3, 1-7

Che pehẽngue  ahayhuetéva:

Ne mandu’áke opavavépe to japo mba’érõ sãmbyhyhára ha mburuvichakuérape, ta iñe’ẽ rendu ichupekuéra ha ta ikyre’ỹ ojapo haguã opa iporãva. Ani okaguai avavére, to hayhu py’a guapy, ta imba’e porã ha to jejapo’ỹ avave renondépe.

Ñande avei niko yma ñande výro, ha ñapu’ã reise va’ekue  oimeraẽvare. Ñande rape kañy va’ekue  ha jaiko opaichagua ivai ha iky’áva rembiguáirõ. Ñande reko aña va’ekue  ha jaiko py’a rasýpe, na ñande ja’evéi ojuehe. Tupã Ñandejára ñane pysyrõhára katu, ohechauka ipy’a porã ha imborayhu yvypórape.

Ñande poriahuverekóguinte ha ndaha’éi ñane rembiapo porãgui, ñane pysyrõva, ñane mopotĩvo ýpe ha ombopyahúvo ñande rekove Espíritu Santo rupi.

Jesucristo ñande pysyrõhára rupi niko, Tupã Ñandejára ñane moenyhẽ Espíritu Sántogui, ñanemoĩ porã haguã hendive imborayhu rupi, ha jahupity upe jeikove opa árape guarã ñaha’arõva.

Tupã Ñandejára Ñe’ẽ.

SALMO ÑEMBOHOVÁI   22, 1-6

Opavave: Tupã Ñandejára che rerekua, mba’eve naikotevẽi.

Tupã Ñandejára che rerekua, mba’eve naikotevẽi.

Ñu rovyũ asýpe che mombytu’u,  y satĩ ypýpe che moguahẽ.

Che mombarete jevy, ha tape hekópe guáre che reraha héra rehehápe. O.

Tape hekópe guáre che reraha héra rehehápe.

Ahasa ramo jepe ka’aguy ypytũ rupi, ndakyhyjéi chéne, nde,

che Jára, reimégui che ndive. O.

Nde yvyra jekoha, nde rehe che mbojerovia.

Karu guasu chéve rejapo umi che rayhu’ỹva rovake.

Che akãre reñohẽ mba’e ryakuã asy, ha upe hay’uha remoenyhẽ chovi. O.

Ne mborayhu ha ne mba’e recha kuaa, rehechauka chéve aikove aja pukukue,

ha nde rógape Tupã Ñandejára, aikóne opa árape. O.

ALELUIA 1Tes 5, 18

Aleluia.

Pe aguyjeveme’ë Tupã Ñandejárape opa áraite:

péva hína Tupã Ñandejára oipotáva pende hegui Ñandejára Jesucrísto rupi.

Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha     17, 11-19

Upe ramo ohóvo Jerusalénpe, Jesús ohasa Samaría ha Galiléa pa’ũ rupi. Ha oguahẽ peteĩ tava’ípe, ha upépe osẽ huguãitĩvo 10 kuimba’e ijaipáva. Opyta mombyry ichugui, ha osapukái: Jesús, mbo’ehára, ore poriahuvereko mína!

Ohechávo ichupekuéra, Jesús he’i: Tapeho pa’i rendápe.

Ha oho aja, ipotĩ hikuái imba’asýgui. Peteĩva, ojechávo ipotĩha, ojevy ha sapukáipe oguerohory Tupã Ñandejárape, ha oñesũ Jesús renondépe, ojayvy yvy peve ome’ẽvo ichupe ijaguyje .

Upéva pe kuimba’e Samariagua. Jesús he’i ichupe: Ndaha’éi piko 10 ra’e umi ipotĩ va’ekue  imba’asýgui? Moõ piko oime umi ambue 9? Ko kuimba’e mombyrygua año piko ou oguerohory haguã Tupã Ñandejárape?

Ha he’i upe karia’ýpe: Epu’ã ha tereho. Rejerovia rupi rekuera.

Ñandejára Jesucristo Ñe’ẽ.