LUNES SEMANA XXXII TO

Ñahendúta Tupã Ñandejára Ñe’ẽ San Pablo ohai va’ekue Titope                                                     1, 1-9

Che, Pablo, Tupã Ñandejára rembiguái ha Jesucristo apóstol, aime aisãmbyhy haguã Tupã Ñandejára rembiporavo kuérape, ikatu haguã oguerovia ha oikuaa pe Tupã Ñandejára rayhu añetegua, ha oha’arõ kuaa jeikove opa’ỹva.

Tupã Ñandejára ijapu’ỹva he’i va’ekue, ojapo mboyve mba’eve, ome’ẽtaha kóva ko jeikove, ha hi’árape ha’e oikuaauka va’ekue  iñe’ẽ. Ha upéva, Tupã Ñandejára ñande pysyrõva, he’i va’ekue  chéve amoerakuã  haguã. Tito che ra’y tee, chéicha avei ogueroviáva, amondo ndéve che kuatiañe’ẽ. Tupã ñande Ru ha Jesucristo ñande pysyrõhára, to hekuavo ipytyvõ ha ipy’aguapy nde ári.

Roheja va’ekue  Crétape remoĩmba haguã hekópe opa mba’e, ha remoĩ haguã umi iglésiape guarã moakãhára, ha’e haguéicha ndéve.

Umíva tapicha joheipyre va’erã, peteĩ jevýnte omenda va’ekue, ta’ýrakuéra Jesucristo reroviaha va’erã, ha ndaipóri va’erã mba’e vai oje’éva hese kuéra, ndaheko vaíri va’erãi ha nopu’ã reiséi va’erãi hapicháre. Pe Jesucristo iglésia moakãhára, Tupã Ñandejára mba’éva rerekua hekópe, heko potĩ va’erã, ndaha’éi va’erã ojejapóva, ipochy reíva, ika’úva, oporonupãséva ha ipláta potáva.

Upéva rangue, omoguahẽ kuaáva va’erã hógape mombyrygua, imba’e porã, iñakã porã, ipojoja, imarangatu ha oiko kuaáva va’erã. Imbarete va’erã Tupä Ñandejára ñe’ẽ ohendu va’ekuépe, ikatu haguã omokyre’ỹ hapichakuérape, jeheko mbo’e añete guápe, ha ogueroviaka kuaa va’erã umi hese oñemoĩvape.

Tupã Ñandejára Ñe’ẽ.

SALMO ÑEMBOHOVÁI    23, 1-6

R. Ko yvy niko Tupä Ñandejára mba’e.

Ko yvy niko Tupä Ñandejára mba’e,

opa mba’e ipype oĩva, ha opa mba’e ipype oikóva.

Ha’e upe yvy omopyenda va’ekue,

yguasu ha ysyry ári omboguapy. R.

Mávapa ojupíne Tupä Ñandejára yvytýpe?

Mávapa opytáne itupao marangatúpe?

Umi ipo ha ipy’a ipotĩva ha ojeíva opa mba’e vaígui,

ta’ãnga omomba’e’ỹva térã Tupã réra oiporu rei rei’ỹva. R.

Umívape ohovasa Tupã Ñandejára,

ha oguenohẽ ichupe kuéra jejopy vaígui.

Upéichako umi Tupä Ñandejárare ojeroviáva,

umi Jacob Tupã rendápe oguahẽva. R.

ALELUIA Flp 2. 15d. 16a

Aleluia.

Pehesapéke umi tesapeha ratáicha yvypóra apytépe,

pehechaukávo Marandu porä orekóva Tekove.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                                                 17, 1-6

Upe ramo Jesús he’i hemimbo’ekuérape:

“Ndaikatúi ojejoko oĩvo heta mba’e oporoitýva teko vaípe, ha to jerekóke umi yvypóra oitýva hapichápe, teko vaípe. Iporãve va’erã oitýrõ ichupe hikuái yguasúpe ita guasu ijajúri, ha’e oity rangue angaipápe peteĩ jepe umi michĩmívape.” Pejererekóke peẽ.

Nde rapicha heko vaírõ, emongavaju ichupe. Ohejárõ heko vaikue katu, eheja rei ichupe. Ta hembiapo vai jepe ra’e nde rehe 7 jevy peteĩ árape. Ha 7 jevy oho ramo he’i ndéve reheja rei haguã ichupe, reheja reí va’erã.

Umi apóstol ojerure Ñandejárape: Eme’ẽve oréve pe jerovia.

Jesús he’i ichupe kuéra: Pende jerovia michĩ ramo jepe oimeraẽ mba’e ra’ỹi michĩve vaicha, pejéta peteĩ yvyra mátape: “Ejehapo’o upégui ha eñemohenda yguasúpe”, ha ojapóne pejéva.

Ñandejára Jesucristo Ñe’ẽ.