DOMINGO TRIGÉSIMO SEGUNDO DURANTE EL AÑO

DOMINGO TRIGÉSIMO SEGUNDO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Reyes aranduka peteĩhápe oĩ háicha 17, 8-16

Ñandejára he’i Elíaspe: “Rehota Saréptape, tetã Sidón pegua, ha epyta upépe. Ha’e kuri peteĩ kuñáme imenave’ỹva oikóva upépe, ne mongaru haguã”.

Elías oho Saréptape. Oikévo pe távape ohecha peteĩ kuña imenave’ỹva ombyatýva jepe’a. Ohenói ha he’i ichupe: Erumi chéve y hay’u haguã. Ohóma oguerúvo ha Elías ohenói jevy ha he’i ichupe: Erumi avei chéve peteĩ pan.

Ha’e he’i ichupe: Tupã nde Jára rehe ame’ẽ ndéve che ñe’ẽ, nda rekoiha pan. Peteĩ po renyhẽ trígo ku’i ha ñandyry michĩmínte areko. Ambyaty hína jepe’a aha haguã ambojy che membýpe ha chéve guarã. Ro’úta ha upéi romanóta ñembyahýigui.

Elías he’i ichupe: Ani rekyhyje. Tereho katu ejapo pe eréva. Ejapo raẽ peteĩ pan chéve guarã ha eru chéve, ha upéi rejapóta ndéve ha ne membýpe guarã. Tupã Israel Jára niko he’i ndopa mo’ãiha nde trígo ku’i ha ne ñandyry, Ñandejára omongy jevy peve yvy ári.

Pe kuña oho ha ojapo upe he’i va’ekue ichupe Elías, ha ha’e, imemby ha Elías oguereko hembi’urã heta árape guarã. Ndopái pe trígo ku’i térã pe ñandyry, he’i haguéicha Ñandejára Elías rupi.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 145, 7-10
Opavave: Toñemomba’e guasu Ñandejára
Ñandejára oñemoĩ ojejopy vaíva yke rehe,
ha omongaru iñembyahýivape.
Ñandejára opoi umi iñapytĩmby ojererekóvagui. O.

Ñandejára oheja umi ohecha’ỹvape ohecha jevy,
Ñandejára omopu’ã umi ikangývape,
Ñandejára ohayhu umi heko jojávape,
Ñandejára oñangareko umi mombyry guáre. O.

Ityre’ỹ ha iména manóvape ha’e oipytyvõ.
Heko vaíva rape katu ha’e ohundi.
Ñandejára niko mburuvicha guasu opa ára guarã.
Táva Sión! Ñandejára ne sãmbyhýta opa árape. O.

LECTURA MOKÕIHA:
Ko’ágã ñahendúta kuatiañe’ẽ ojehai va’ekue Hebreoskuérape (9,24-28)

Cristo ndoikéi va’ekue upe Tupao yvypóra rembiapokuépe, pe yvága pegua joguahántevape. Oike katu yvagaitépe, ko’ágã oĩháme Tupã renondépe oñembo’e ñande rehe. Ha ndoikéi oñekuave’ẽ haguã ha’ete voi heta jey, ojapoháicha áño ohasávo jepi pa’i guasu oikéva Tupaópe oikuave’ẽvo tuguy imba’e’ỹva.

Upéicha rire avei, Cristo oikotevẽ vaerã mo’ã omano heta jey oiko ypy guive ko yvy. Cristo katu, ko ára ipaha jave ohóvo, ou peteĩ jey ete ha opa ára guarã, oikuave’ẽvo hekove voi ojeheja rei haguã yvypóra angaipa.

Opavave omano va’erã peteĩ jey ha upéi oñembojovake vaerã. Upéicha avei Cristo oikuave’ẽ hekove peteĩ jey oipe’a haguã heta angaipa. Upéi ha’e ou jeýta, ndaha’e véima angaipa rechávo, osalva haguã katu umi chupe oha’arõvape.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

EVANGELIO
Marandu porã Ñandejára Jesucrísto rekove ha hemimbo’e San Marcos omombe’u háicha 12, 38-44

Upe ramo Jesús ombo’évo he’i: Peñeñangarekóke umi Moisés léi ombo’évagui. Ha’ekuéra niko oñemonde ao porã-porãme. Ha mamo oikoha rupi oipota ñamomaitei chupekuéra ku karai guasúrõ guáicha hikuái. Tupaópe térã karu guasuhápe katu, oĩ porãvetahápe voi oguapy hikuái.

Umi kuña imenave’ỹva róga omonandipa, ha upéi katu oñembo’e puku-puku gua’u hikuái.

Umíva kastiga rasyve vaerã ágã opavavégui. Upéi Jesús oguapy tupaópe upe ofrénda ryru rovái. Omaña hína mba’éichapa ojeju joa, ha ojeity pype pláta. Umi irríkova oheja heta-heta.

Upéi katu oguãhẽ sapy’a peteĩ kuña mboriahumi imenave’ỹva. Ha oheja avei ha’e mokõi níkelmi. Upévo, Jesús ohenói idisípulokuérape, ha he’i chupekuéra: — Ko kuña mboriahumi niko hetaiteve ome’ẽ opavavégui.

Umi ome’ẽva niko ome’ẽ chupekuéra hembývagui. Ha’e katu imboriahu pa’ũme, ome’ẽmba oguerekóva, hembi’u repy rangue jepeve.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesucrísto.