JUEVES SÉPTIMO DE PASCUA

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha 22, 30; 23, 6-11

Upe ára ambuépe, pe mburuvicha oikuaa porãségui, mba’épa pe ombojáva Israelguáva Pablo rehe, ojora ichupe isãgui ha omboatyka pa’i ruvichakuéra ha opa umi mbojovakehára atyguávape. Upéi oguenohẽ Páblope ha omoĩ henondépekuéra.

Upéi ohecha kuaávo upe atýpe oĩha Saduséokuérava ha oĩha avei Fariséokuérava, Pablo he’i hatã: Che hína Fariséo, hogagua Fariséova, añembojovake hína aha’arõgui jeikove jevy omanóva apytégui.

Pablo he’ívo upéva, Fariséo ha Saduséokuérava oñepyrũ oñoñe’ẽ api, ha oiko joavy guasu upe atýpe. Saduséova niko he’i omanóva ndoikovéi jevyha, ha ndaiporiha Tupã Ñandejára remimbou térã espíritu, Fariséova katu oguerovia opa ko’ã mba’e. Opavave osapukaipa, ha oĩ Moisés rembiapoukapy mbo’eha Fariséova, opu’ãva ha he’íva: Ko kuimba’e ndojapói mba’eve ivaíva.

Oime va’erãko oñe’ẽ ichupe ra’e peteĩ espíritu térã Tupã Ñandejára remimbou. Upe sarambi tuichave ohóvo, ha pe mburuvicha okyhyje ombo’ipárõ guarã hikuái Páblope. Upévare ohenoiuka ñorairõhára kuérape oguenohẽ haguã ichupe upégui ha ogueraha jevy ñorairõhára rógape.

Upe pyhare ambuépe Ñandejára ojechauka Páblope ha he’i ichupe: “Néike Pablo! Che moerakuã haguéicha ko’ã Jerusalénpe, tekotevẽta avei che moerakuã Rómape.”

Tupã Ñandejára Ñe’ẽ.

SALMO ÑEMBOHOVÁI 15, 1-2a. 5. 7-11

Opavave: Tupã, eñangareko kena che rehe, ne rendápe niko aguahẽ.

O bien:

Aleluia.

Tupã, eñangareko kena che rehe, ne rendápe niko aguahẽ.
Ha’e ndéve: “Nde hína Tupã che Jára, nde hína opa mba’e chéve guarã.
Nde pópe oĩ che rekove. O.

Amomba’e guasúta Ñandejárape che resape’áva,
pyharekue jepe che py’a rugua guive che moarandu.
Opa árape Ñandejárare che mandu’a,
ha’e oĩ ramo che ypýpe nda’ái chéne. O.

Upévare, che py’a rory, ovy’a che korasõ ha py’a guapýpe aikóne.
Nda che rejái chéne amano, ndereheja mo’ãi ne irũme yvy kuápe ojeity. O.

Nde rehechaukáne chéve jeikove rape, che moenyhëvo vy’águi ne renondépe,
Ne rendápe aime ramo vy’águi che moenyhẽne.
Nde ypýpe vy’a ndopáiva. O.

ALELUIA Jn 17, 21
Aleluia.
Ñandejára Jesucristo he’i: “To joajupa kena hikuái, nde che Ru, peteĩnte háicha che ndive ha Che ne ndive, péicharõ, opa yvypóra ogueroviáta Nde che mbou hague”.
Aleluia.

EVANGELIO

Marandu porã Ñandejára Jesucristo rekove ha hemimbo’e San Juan omombe’u háicha 17, 1b. 20-26

Upe ramo ohasa mboyvemi Tupã ykére, Ñandejára oma’ẽ yvága gotyo ha péicha oñembo’e: “Nañembo’éi ndéve hesekuéra añónte. Añembo’e avei ndéve umi che rehe ojeroviátavare ohendúvo ichupekuéra. Ajerure ndéve ojoajupa haguã hikuái. Ha ku nde, che Ru, peteĩnte háicha che ndive ha che ne ndive, péicha avei ha’e kuéra peteĩnte haguã ñane ndive. Péicharõ, opa yvypóra ogueroviáta nde che mbou hague.

Che ambotuicha ichupe kuéra nde che mbotuicha haguéicha, peteĩnte haguã ha’e kuéra oñondive, nde ha che peteĩnte háicha. Che aiméta ipypekuéra ha nde che pype, ojoaju porã ha peteĩnte haguã ha’ekuéra oñondive. Péicharõ, opavave ohecha kuaáta nde che mbou hague ha nde rehayhuha ichupe kuéra, chéve che rayhu háicha.

Che Ru, chéve niko reme’ẽ va’ekue, ha aipota ha’e kuéra oĩ che ndive upe aimetahápe. Upépe ohecháta hikuái che reko mimbipa, reme’ẽ va’ekue chéve opa mba’e rejapo mboyve, nde che rayhúgui.

Che Ru Marangatu, umi nde rehe ojerovia’ỹva niko na nde kuaái. Che katu roikuaa, ha ko’ãva oikuaáma avei nde che mbou hague. Aikuaauka ichupekuéra mávapa nde, ha ajapovéta gueteri ahávo. Péicharõ, oĩta ipypekuéra mborayhu che rehe rerekóva, ha che avei aiméta ipypekuéra.”

Ñandejára Jesucristo Ñe’ẽ.