JUEVES SEXTO DE PASCUA

JUEVES SEXTO DE PASCUA

LECTURA PETEÎHA:

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha   18, 1-8

Pablo osẽ Aténasgui ha oho Coríntope. Upépe ojejuhu peteĩ Israelguáva Aquila hérava ndive, Pontoguáva. Nda aréi ra’e Aquila ha hembireko Priscila oguahẽ hague Itáliagui. Upégui osẽ va’erã ra’e Roma ruvicha guasu Claudio he’i haguére opa Israelguáva osẽ va’erãha Rómagui.

Pablo oho hendapekuéra, ha omba’apógui avei Pábloicha óga ao apópe, opyta hendive kuéra omba’apo haguã oñondive. Oguahẽvo pytu’uha ára Pablo oho jepi judíokuéra tupaópe ha oñe’ẽ oñeha’ãvo ogueroviauka Israelgua ha Israelgua’ỹvape avei. Silas ha Timoteo oguahẽvo Macedóniagui, Pablo oñeme’ẽmba ite omoerakuãvo upe ñe’ẽ ha ohechaukávo Israelguávape Jesús ha’eha upe Mesías.

Ha’ekuéra katu oñemoĩ hese ha oñe’ẽ reity ichupe. Upérõ Pablo oityvyro ijao techaukahárõ, ha he’i ichupekuéra:

“Pende ári ho’áta peñehundi ramo. Upéva na che ndive véima. Águi ahátama Israelgua’ỹvape”. Osẽ pe judíokuéra tupãógui ha oho peteĩ kuimba’e Ticio Justo hérava, Tupãme omomba’e guasúva rógape, ha oĩva judío kuéra tupao ykére. Ha Crispo, upépe omyakãva, opa hogagua kuéra ndive oguerovia Ñandejárape. Ha heta Corintoguáva avei, ohendúvo pe Ñe’ẽ, oguerovia ha oñemongaraiuka.

Tupã Ñandejára Ñe’ẽ.

SALMO ÑEMBOHOVÁI    97, 1-4

Opavave: Tupã Ñandejára ohechauka ipokatu, tetãnguérape.

O bien:

Aleluia.

Pepurahéi Tupä Ñandejárape purahéi pyahu, mba’e hechapyrãva ojapógui ha’e.

Ipyapy mbarete ha imarangatúgui ipu’aka opa mba’ére. O.

Tupã Ñandejára ohechauka ipokatu, tetãnguérape ohechauka heko jojaha.

Imandu’a imborayhu ha heko jeroviaháre tetã Israel ndive guarã. O.

Yvy jerekuévo ojehecha

Tupã Ñandejára ipu’akaha opa mba’ére.

To jererohory Ñandejára yvy jerekuévo, purahéi rory to soro ha to jevy’a. O.

ALELUIA Cf. Jn 14, 18

Aleluia.

Ñandejára Jesucristo he’i: “ Nda poheja mo’äi pene año; che aháta ha aju jevýta pene rendápe,

ha ovy’áta pene korasõ”.

Aleluia.

EVANGELIO

Ñahendúta Ñandejára Jesucristo rekove ha hemimbo’e San Juan omombe’u háicha 16, 16-20

Upe ramo ohasa mboyvemi Tupã Ñandejára ykére, Jesús he’i hemimbo’ekuérape: “Ko’ẽrõ ite, peë nda che recha mo’ã véima. Upe riremínte katu che recha jevýta”.

Upépe, oĩ Jesús remimbo’ekuéra oporandúva ojupe: Mba’éiko pe he’iséva? He’i ñandéve ko’ẽrõite ndajahecha mo’ã veimaha ichupe, ha upe riremínte jahecha jevytaha ichupe, ohótagui Túva rendápe. Mba’éiko he’ise he’i ramo ‘ko’ẽrõite’? Ndajaikuaái niko mba’e rehépa oñe’ẽ?

Jesús ohecha kuaa ha’ekuéra oguerekoha oporanduséva ichupe, ha he’i ichupekuéra: “Ha’e niko peẽme kuri ko’ẽrõ ite nda che recha mo’ã veimaha, ha upe riremínte che recha jevytaha. Upévare piko peporandu peína ojupe?”

“Añetehápe ha’e peẽme: Pene rasẽ ha peñe mbyasýta yvypóra kuéra ovy’a aja. Peẽ peñe mbyasy ramo jepe, upéi pene ñembyasy hendaguéta vy’ápe”.

Ñandejára Jesucristo Ñe’ẽ.