JUEVES VIGÉSIMO SÉPTIMO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Malaquías arandukápe oĩ háicha  3, 13-20a

Peẽ peje che rehe ivai etereíva ha upéi peporandu: “Ore piko mba’e ro’e nde rehe?” Kóva hína upe pejéva: “Jajapo ramo Tupã Ñandejára he’íva ndajahupitýi mba’eve. Mba’épa ñanohẽta jajapo ramo ha’e oipotáva ha ñañe monde ao vosakuépe Tupã Ñandejára ipu’akapáva renondépe? Jaikuaa porã rasa, umi hembiapo vaívante voi ovy’avaha. Opa mba’e osẽ porã umi oikóvape iñakãre ha mba’eve ichupekuéra ndojehúi!”

Umi omomba’éva Tupã Ñandejárape oñe’ẽ upéicha oñondive ha Tupã Ñandejára ohendu upe ha’e kuéra he’íva. Ha Tupã Ñandejára renondépe ojehai peteĩ kuatia oĩháme umi omomba’éva Tupã Ñandejárape ha ojapóva ha’e he’íva.

Tupã Ñandejára ipu’akapáva he’i: “Aha’arõ hína pe ára ha’ekuéra oiko jevy haguãme che retãgua ramo.” Pe túva oiporiahuvereko háicha ita’ýra ojapóvape ha’e he’íva, upéicha aiporiahuverekóta ichupekuéra. Upérõ pehecha kuaa jevýta  mba’éichapa oikoe ojuehegui imarangatúva ha iñañáva, pe Tupä Ñandejárape omomba’éva ha pe nomomba’éiva.

Tupã Ñandejára ipu’akapáva he’i: “Hi’aguĩma ára hendýva tatakuáicha ha opa umi ojejapóva ha heko añáva okáita ñana pirukuéicha. Upe ára oútava ohapýta opa mba’e ha mba’eve ndopyta mo’ãi ichuguikuéra. Peẽ che momba’évape katu che reko joja omimbíta kuarahýicha oguerúva tesãi imba’e rendýpe, ha peẽ vy’águi pepopóta vaka ra’ýicha osẽva ikorágui.

Tupã Ñandejára Ñe’ẽ.

SALMO ÑEMBOHOVÁI 1, 1-4. 6

Opavave: Ovy’a va’erã umi ojerovíava Tupã Ñandejárare.

Ovy’a umi ojapo’ỹva iñañáva ñe’ẽ,

ojehe’a’ỹva umi Tupã Ñandejárare oñembohorýva ndive.

Tupã Ñandejára rembiapoukapy ipy’a ombohory,

ha hese ojepy’a mongeta ára ha pyhare. O.

Ojogua ku yvyra mátape oñeñotỹva y rembe’ýpe,

ome’ëva hi’a hi’ára oguahëvo, ha araka’eve ndahoguekúiva.

Opa mba’e ojapóva osẽ porã ichupe. O.

Ndaupéichai umi hembiapo vaíva,

kapi’i piru kuéicha umívape yvytu omboveve.

Tupã Ñandejára oñangareko imarangatúva rapére.

Hembiapo vaíva rape katu opa vai. O.

ALELUIA Cf. Hech 16, 14b

Aleluia.

Tupã Ñandejára eipe’a ore korasö rokẽ, ikatu haguä rojapyhy nde ra’y Jesucristo ñe’ẽ.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Lucas omombe’u háicha 11, 5-13

Upe ramo Jesús he’i hemimbo’ekuérape:

Peteĩva peẽ gua’u ra’e oguereko peteĩ iñirũ, pyhare pyte ohóva hógape ha he’i ichupe: ‘Che irũ: eiporuka chéve mbohapy mbuja, peteĩ che irũ niko péina oguahẽ mombyrýgui che rógape, ha ndarekói mba’eve ame’ẽ va’erã ichupe. Añetehápe niko ha’e pe kotypy guive nde’i mo’ãi ichupe: ‘Ani che moangekói, che rokẽ oñemboty, ha che ra’y kuéra ha che roñeno hína. Ndaikatúi apu’ã ame’ẽvo ndéve mba’eve.’

Ha’e peẽme, nopu’ãi ramo jepe omba’e me’ẽvo ichupe, iñirũ haguére, ome’ẽne ichupe opa mba’e oikotevẽva anive haguã omoangekói ichupe. Upévare che ha’e peẽme: “Pejerure, ha Tupã Ñandejára ome’ẽta peẽme. Peheka ha ha’e ojuhukáta peẽme. Pembota Tupã Ñandejára rokẽ ha ha’e oipe’áta peẽme.”

Ojerurévape niko oñeme’ẽ, ohekáva katu ojuhu, ha pe okẽ ombotávape ojepe’a.

Máva peẽva piko, pende ra’y ojerure ramo peẽme pira, peme’ẽta ichupe mbói? Térã ñandu kavaju ojerure ramo ichupe ryguasu rupi’a? Peẽ, pene rembiapo vaíva Tupã Ñandejára renondépe, peme’ẽkuaa ramo iporãva pende ra’y kuérape, ko’yteve pende Ru yvágape oĩva ome’ẽta Espíritu Santo umi ichupe ojerurévape.

Ñandejára Jesucristo Ñe’ẽ.