VIERNES VIGÉSIMO SÉPTIMO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Joel arandukápe oĩ háicha    1, 13-15; 2, 1-2

Peẽ pa’i, pemba’apóva altárpe, peñemonde ao vosakuépe, pejahe’o mba’e mbyasýgui, ndaipóri véigui tupaópe trígo ha vino oñekuave’ẽ haguã Tupã Ñandejárape. Pejapo aty guasu, pemoerakuã karu’ỹ, tupaópe pemboaty moakãhára kuéra ha opa Israel guápe, ha peñembo’e Tupã pende Járape.

Cháke, hi’aguĩma Tupä Ñandejára ára!

Ára jakyhyjeha, oguerúva ñerundi, omboúva Tupã Ñandejára ipu’akapáva!

Pembopu turu yvyty Siónpe, pembopu pe “cháke” Tupã Ñandejára yvyty marangatúpe, kyhyjégui toryrýi Judágua, hi’aguĩmbaitéma Tupã Ñandejára ára.

Upe ára, pyhare ha pytũ meméta, arai ha tatatĩnáme ojejaho’íta, ñorairõhára imbarete ha heta vaicha iñasãi ko’ẽjúicha umi yvyty rupi tuku. Araka’eve ndojehechái va’ekue  ha márõ ndojehecha mo’ãi, mba’eve upéichagua.

Tupã Ñandejára Ñe’ẽ.

SALMO ÑEMBOHOVÁI 9, 2-3. 6. 16. 8-9

Opavave: Tupã Ñandejára oisãmbyhy ko yvy teko jojápe

Tupã Ñandejára, che py’a ite guive romomba’e guasuse,

ne rembiapokuéra ita rehe che mandu’ase.

Nde, amo yvatete reiméva,

vy’águi roguerosapukái ha aropurahéi nde réra! O.

Heko vaívape remongavaju,

iñañávape rehundi, ha oiko ichugui  kuéra tesarái.

Heko vaíva ho’a yvykuápe ha’e voi ojo’o va’ekuépe,

ipy pa’ã upe ñuhãme ha’e omoĩ va’ekuépe. O.

Tupã Ñandejára niko mburuvicha guasu opa árape guarã,

oñemoĩma omohenda haguãicha opa mba’e,

oisãmbyhy ko yvy teko jojápe,

ha omoakã tetã nguéra heko itépe. O.

ALELUIA Jn 12, 31b. 32

Aleluia.

Ñandejára Jesucristo he’i: “Ko’ágã ko yvy Mburuvicha guasu oñemombóta okápe; ha Che ajehupívove yvate yvy ári,

amboatýta che jehe maymavépe.

Aleluia.

EVANGELIO

Ñahendúta Ñandejára Jesucristo rekove ha hemimbo’e San Lucas omombe’u háicha  11, 15-26

Upe ramo Ñandejára omosẽ rire añame, oime he’íva: “Beelzebú, Aña nguéra ruvicha voi niko hína pe ohejáva ichupe omosẽ umi mba’epochykuérape.” Ha oime avei umi, omoñuhãvo ichupe, ojeruréva Jesúspe ojapo haguã mba’e hechapyrãva ohechauka haguã Tupã Ñandejára oĩha hendive.

Ha’e katu, oikuaáva hína mba’épa oguereko hikuái iñakãme, he’i ichupekuéra: Peteĩ tetã oñemboja’opa ramo ha opu’ãmba ramo oñoakãre, oñehundi. Ha opa hóga kuéra ho’apa ojo’ári.

Péicha avei Satana voi opu’ã ramo ijehe, mba’éicha piko imbarete tapiáta? Kóicha ha’e, peẽ pejégui che amosẽha mba’epochykuérape, Beelzebú pokatu rupi. Péicharõ añete, máva piko ome’ẽ pene remimbo’ekuérape pokatu omosẽ haguã ichupekuéra? Pene remimbo’ekuéra ojapóva rupi voi, ojehecha peẽ pejavyha.

Che amosẽ ramo mba’epochykuérape Tupã Ñandejára po rupi, upéva he’ise Tupã Ñandejára sãmbyhy oguahẽmaha peẽme.

“Peteĩ kuimba’e mbarete ikyse porã ramo ha oñangareko hógare, umi mba’e oñongatúva ipype oĩ porã. Ha ou ramo ambue imbaretevéva ichugui  ha ipu’aka hese katu, oipe’a ichugui  pe kyse ojerovia hague, ha opa oguerekóva, ha ojapo umívagui ojaposéva.

Upe che ndive oĩ’ỹva, oñemoĩ che rehe. Ha upe che ndive omono’õ’ỹva, omosarambi.”

“Peteĩ mba’epochy osẽ ramo oimeraẽvagui, oho oiko umi oky’ỹha rupi ohekávo pytu’u. Ha ndojuhúi ramo he’i: ‘Aha jevýta che rógape, mamo asẽ haguégui.” Ha ou jeývo, ojuhu pe osẽ hague ojetypei ha ipotĩ porãha. Upéi, oho ha ogueru ambue 7 mba’epochy, heko añavéva ichugui, oike hikuái ipype, ha oiko upépe. Ha péicha, pe yvypóra rekove opyta vaive iñepyrũmbýgui.

Ñandejára Jesucristo Ñe’ẽ