JUEVES VIGÉSIMO SEXTO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽNehemías arandukápe oĩ háicha  8, 1-4a. 5-6. 7b-12

Opavave oñemboaty Jerusalénpe, pe plásape oĩva okẽ hérava Y rovái. Ojerure hikuái pa’i Ésdraspe ogueru haguã ichupe kuéra kuatia tembiapoukapy ryru Moisés rembiapokue, Tupä Ñandejára ome’ẽ va’ekue  Israélpe. Esdras ogueru pe kuatia tembiapoukapy ryru oñemboatyhápe opa karai, kuñakarai ha mitã guasu kuéra, ha pyhareve guive asaje peve ohenduka ichupe kuéra pe umi tembiapoukapy, pe plásape oĩva okẽ hérava Y rovái. Opavave ojapysaka porã umi mba’e ohendúvare.

Yvyrágui ojapo hikuái Ésdraspe ipyendarã, ha upéva ári ojupi oñe’ẽ haguã. Ijykére oñembo’y Matatías, Semá, Anías, Urías, Hilquías ha Maaseías. Ijasu gotyo katu oñembo’y Pedaías, Misael, Malquías, Hasum, Hasbadana, Zacarías ha Mesulam.

Esdras oĩ yvateve opavavégui. Ha oipe’ávo pe kuatia maymáva renondépe, opu’ãmba ite oñembo’y hikuái. Esdras omomba’e guasúvo Ñandejára, Tupã Ipu’akapávape maymáva ohupi ipo yvága gotyo he’ívo “Ta upéicha, ta upéicha”. Upéi oñesũ hikuái, omboja isyva yvýre, ha omomba’e guasu Tupä Ñandejárape.

Oñemohenda rire hikuái, levítakuéra Josué, Baní, Serebías, Jamín, Acub, Sabtai, Hodías, Maaseías, Quelitá, Azarías, Jozabad, Hanán ha Pelaías omoesakã maymávape Tupã Ñandejára rembiapoukapy. Opa mba’e oje’éva Tupã Ñandejára rembiapoukapýpe hatã he’i hikuái maymáva ohendu haguã ha upéi omoesakã ichupe kuéra iñe’ẽme.

Ohendúvo umi Tupã Ñandejára rembiapoukapy, hasẽmba hikuái. Upémarõ mburuvicha Nehemías, pa’i Esdras ha umi levíta omoesakãva ichupekuéra Tupã Ñandejára rembiapoukapy he’i ichupekuéra: “Kóva ko ára niko ñamboyke Tupã Ñandejárape guarã. Ani peñembyasy térã pene rasẽtei. Tapeho pende rógape pe’u so’o kyra ha vino porã, ha umi oguereko’ỹvape katu pehupityuka pene mba’évagui. Kóva ko ára niko Tupä Ñandejárape ñamboyke ñaína. Ani peñe mbyasýtei. Tupã Ñandejárape ñambovy’ávo ñande ñane mombarete.”

Levítakuéra avei he’i joa opavavépe ani haguãtei hasẽ upéva pe árape, oñemboykégui Tupã Ñandejárape guarã. Ha ohopa hógape hikuái ha tuicha vy’a reheve ojapo karu guasu. Umi oguereko’ỹvape ohupityuka avei hikuái ha tuicha ojevy’a, hesakã porãgui opavavépe umi mba’e ohendúva.

Tupã Ñandejára Ñe’ẽ.

SALMO ÑEMBOHOVÁI  18, 8-11

Opavave: Tupã Ñandejára rembiapoukapy oĩ heko itépe, ñane mbovy’a.

Tupã Ñandejára rembiapoukapy ndaijojahái,

ñane mbopy’a rory.

Tupã Ñandejára rembiapoukapy ijeroviaha,

omoarandu oikuaa’ỹvape. O.

Tupã Ñandejára rembiapoukapy oĩ

hekoitépe, ñane mbovy’a.

Tupã Ñandejára rembiapoukapy hesakã,

ñande resape’a. O.

Tupã Ñandejára ñe’ẽ naimeguãi ha ndahekoviái.

Tupã Ñandejára rembiapoukapy ijeroviaha,

opavave oĩ hekoitépe. O.

Iporã iteve óro ojajaipávagui,

umi óro ijoheipyrégui, he’ẽve eiretégui osyrýva káva raitýgui. O.

ALELUIA Mc 1, 15

Aleluia.

Tupã Ñandejára sambyhy hi’aguïma.

Pejevy pende rembiapo vaikuégui ha peguerovia Marandu porã.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Lucas omombe’u háicha   10, 1-12

Upe ramo Jesús oiporavo 72pe ha omondo henonderã, mokõi mokõi umi táva rupi ha mamo ha’e oho va’erãháme.

He’i ichupe kuéra: “Ajépa tuicha pe kokue ha heta hi’a, omono’õ va’erãnte mbovy. Upévare, pejerure pe kóga járape to mbou umi ou va’erãme omono’õ. Ta peho peẽ. Peikuaáke pomondoha hína ovecha ra’ýicha aguara guasu apytépe.

Ani peraha viru ha tembi’u ha pende py rehegua ave. Ha ani pepyta pe poromomaiteívo tapére. Peikévo peteĩ ógape, pemomaitei raẽ pejévo: ‘Py’aguapy ko ógape guarã.’ Ha upépe oĩ ramo yvypóra oipotáva py’a guapy, hembipota oikóne. Upéicha’ỹrõ katu, peẽme jeýnte opytáta. Pepyta upe óga upévape, ha pe’u ha pey’u umi ha’e kuéra oguerekóvagui. Opa omba’apóvape niko ojehepyme’ẽ va’erã voínte. Ani peva peva rei peteï ógagui ambuépe.

Peho ramo peteĩ táva peñe moguahẽháme, pe’u umi peẽme oñeme’ẽvagui. Pemonguera umi hasýva upépe oĩvape, ha peje ichupe kuéra: ‘Tupã Ñandejára sãmbyhy hi’aguĩma pende hegui.’ Ha pehórõ peteĩ táva peñe moguahẽ’ỹháme, pesẽ okápe ha peje: ‘Pende táva pegua yvytĩmbo oja va’ekue  ore pýre jepe, roityvyro ore pochýgui pende rehe. Ha peikuaáke kóva, Tupã Ñandejára sãmbyhy hi’aguĩma pende hegui.’

Ha’e peẽme, áçante ichupe kuéra oñenupã pohyivéta umi táva Sodómape oiko va’ekuégui.”

Ñandejára Jesucristo Ñe’ẽ.