LECTURAS JUEVES XII DEL TIEMPO ORDINARIO

LECTURAS JUEVES XII DEL TIEMPO ORDINARIO

Ko’ágã ñahendúta Tupã Ñandejára ñe’ẽ Génesis arandukápe oĩ háicha    16, 1-12. 15-16

Sarai, Abram rembireko, ndaikatúi imemby. Opáichavo oguereko hembiguái kuñáva Egiptogua, hérava Agar.

Ha Sarai he’i Abrámpe:  Tupã Ñandejára niko omboty che rye che memby’ỹ haguã. Eñenóna che rembiguái ndive, jahecha ndarekói mba’épa che membyrã ha’e rupi.

Abram ojapo hembireko he’íva.

Oiko rire 10 áño Canaánpe, Sarai ome’ẽ iménape hembiguái Agar ikuñarã. Abram oñeno Agar ndive ha ombohye guasu ichupe. Ha ha’e, ojechávo upéicha oñepyrũ oapo’i Saráipe.

Upérõ Sarai he’i Abrámpe: Nde ári ho’a jejahéi ha’e ojapóva che rehe. Ame’ẽ ndéve che rembiguái ne kuñarã, ha ágã ojechávo hye guasuha, oñembohory che rehe. Tupã Ñandejára te’i mávapa ojapo ivaíva, ndépa térãpa che.

Abram he’i ichupe: Ha’e hína ne rembiguái, eñeñanduka ichupe!

Aipo ramo Sarai ojopy hendive, ha upévare ha’e okañy ha oho mombyry. Tupã Ñandejára remimbou katu ojuhu ichupe yvy ojeiko’ỹ háme, peteĩ ykua ypýpe (upe ykua oĩva Sur rapépe) ha oporandu ichupe: Agar, Sarai rembiguái, mamóguipa reju ha mamópa reho?

Ha’e he’i ichupe: Akañy ajúvo che jára Saráigui.

Tupã Ñandejára remimbou he’i ichupe: Tereho jevy nde jára rendápe, ha eñemoĩ ipoguýpe rejejapo’ỹre.

Tupã Ñandejára remimbou he’ive: Che ambohetáta ne ñemoñare, ikatu’ỹ haguãicha ojepapa.

Upéi katu he’i ichupe: “Péina nde, ko’ágã   nde rye guasúma, kuimba’éta hína upe ne memby, Tupã Ñandejára ohendu rejepy’apy ramo, upévare embohéra ichupe Ismael.

Kavaju saitépe ha’e ojoguáta, opavavére oñemoĩta ha opavave hese.

Hóga vakapípe oñemohendáta, oñemoĩrõ jepe hese ityvýrakuéra.”

Agar imemby kuimba’e Abrámgui, ha Abram ombohéra ita’ýrape Ismael. Abram oguereko 86 áño upe Agar imemby ramo ichugui .

Tupã Ñandejára Ñe’ẽ.

SALMO ÑEMBOHOVÁI   105, 1-5

Opavave: Pe aguyjeve me’ẽ Tupã Ñandejárape ha’e imba’e porã rupi

Perohory Tupã Ñandejárape, imborayhu ijapyra’ÿva.

Mávapa ikatúne oikuaauka imombe’upyrãva

ojapo va’ekue Tupã Ñandejára?

Ha ohenduka hembiapo porã ita? O.

Ovy’a iténepa umi oporombojojáva ha hekopegua opa ára ojapóva.

Ne mandu’akena che rehe, che Jára, rajapóvo iporãva ne retã guápe. O.

Ehechakuaa kena chéve rejúvo reporope’a ivaívagui,

ahecha haguã mba’éichapa ovy’a umi nde reiporavo va’ekue,

avy’a haguã avei ne retãgua ndive, ha añeñandu porã haguã umi ne mba’éva apytépe.O.

ALELUIA Jn 14, 23

Aleluia.

Ñandejára Jesucristo he’i: “Pe che rayhúva nomboykemo’äi che ñe’ẽ,

che Ru ohayhúta ichupe rohóta hendápe”.

Aleluia.

EVANGELIO

Marandu pora Ñandejára Jesucristo rekove ha hemimbo’e San Mateo omombe’u háicha 7, 21-29

Upe ramo Jesús he’i hemimbo’ekuéra:

Ndaha’éiko umi chéve he’íva: “Karai, karai”, oikétava yvágape Tupã Ñandejára oporosãmbyhyhápe. Umi ojapóva che Ru yvágape oĩva rembipotánte oikéta.

Oguahẽvo pe ára heta umi he’ítava chéve: “Karai, karai, nde rérape niko roñemoñe’ẽ va’ekue. Nde rérape roity va’ekue mba’epochy hetágui, ha nde rérape rojapo heta mba’e hechapyrãva”. Upévo ha’éta ichupe kuéra: “Araka’eve nda porokuaáiva. Pejei che ypýgui peẽ tekove ahẽ.” 

Upévare, pe ohendúva che ñe’ẽ ha ojapo upe ha’éva, ojogua ku karai iñakã porãvape hogarã omopu’ãva va’ekue ita ári. Upéi ou oky ha okakuaa umi ysyry.

Yvytu hatã oipeju ha ojejapipa pe ógare. Péicharõ jepe ndo’ái, oñemboguapýgui ita ári. Pe che rendúva ha ndojapóiva che ha’éva katu, ojogua ku tekove tavýpe, omopu’ã va’ekue hogarã yvyku’i ári. Upéi ou oky ha okakuaa umi ysyry. Yvytu hatã oipeju ha ojejapipa pe ógare ha upépe ho’a, oñembyaipaite.

Jesús oñe’ẽmba rire, opavave ohecha ramo joa ite mba’éichapa ha’e ombo’e ichupe kuéra. Jesús niko nombo’éi ombo’e háicha umi Moisés rembiapoukapy mbo’eha. Ha’e oporombo’e ku noikotevẽi ramo guáicha avavére oporombo’e haguã.

Ñandejára Jesucristo Ñe’ẽ