LECTURAS DEL MIÉRCOLES DUODÉCIMO TIEMPO ORDINARIO

LECTURAS DEL MIÉRCOLES DUODÉCIMO TIEMPO ORDINARIO

Ko’ágã ñahendúta Tupã Ñandejára ñe’ẽ Génesis arandukápe oĩ háicha  15, 1-12. 17-18

Abram oñandu Tupã Ñandejárape he’i ramo ichupe: Ani rekyhyje Abram, che romo’ãta opa mba’evaígui ha ame’ẽta ndéve heta mba’e porã. Abram katu he’i ichupe: Nde Tupã che Jára, ma’erã rei piko reme’ẽta chéve mba’eve? Amanótama ha nda che ra’ýi. Umi mba’e arekóva opytáta Eliézer Damasco guápe. Na che moñemoñaréigui opa mba’e arekóva opytáta peteĩ che rembiguáipe.

Upérõ ohendu jevy Tupã Ñandejára he’i ramo ichupe: Opytáva ne rendaguépe ndaha’e mo’ãi Eliézer, peteĩ nde ra’y teéta.

Tupã Ñandejára he’i ichupe osẽ haguã okápe ha oñe’ẽ ichupe kóicha: Ema’ẽ yvágare ha eñeha’ã eipapa mbyja ita, jahecha ikatúpa. Péicha hetáta ne ñemoñare.

Abram oguerovia Tupã Ñandejárape, ha upe guive Tupã  Ñandejára oguereko ichupe imarangatúva ramo, ha he’i ichupe: Che hína nde Jára, romoirũ va’ekue táva Ur, caldéo retãgui, ko’a peve, ame’ẽ haguã ndéve ko yvy ne mba’erã.

Abram oporandu ichupe: Tupã che Jára, mba’éicha piko aikuaáta che mba’erãha?

Ha Tupä Ñandejára he’i ichupe: Eru chéve ko’ápe peteĩ vakílla, peteĩ kavara kuña ha peteĩ ovecha mácho; opavave toguereko 3 áño; peteĩ jeruti ha peteĩ pykasu ra’y avei.

Abram ogueru umi mymba, omboja’o mbytépe ha omoĩ ojovái. Guyra kuéra katu nomboja’ói. Yryvukuéra oguejy mante umi mymba re’õnguére, ha Abram omondýi. Kuarahy oike potaite jave Abram opyta oke ha ojaho’i ichupe peteĩ pytũ ha kyhyje nde tuicháva.

Kuarahy oike ha pytũmba riréma, ojehecha peteĩ tatakua hatatĩmbáva. Ha peteĩ tata rendy ohasa sapy’a umi tymba ñemboja’o pyre pa’ũ rupi.

Upérõ Tupã Ñandejára oñe’ẽ me’ẽ Abrámpe: Ne ñemoñarépe ame’ẽta ko yvy, ysyry Egipto guive, ysyry guasu Éufrates peve.

Tupã Ñandejára Ñe’ẽ.

SALMO ÑEMBOHOVÁI   104, 1-4. 6-9

Opavave: Tupä Ñandejára imandu’a mante iñe’ẽ ome’ẽ va’ekuére.

Pemomba’e guasu Tupã Ñandejárape, héra pemomba’e.

Opa tetãre pemoherakuã hechapyrãva ojapo va’ekue.

Ichupe peropurahéi árpa ha cítara reheve

ha pemoherakuã imombe’upyrãva ha’e ojapo va’ekue. O.

Héra marangatu pembotuicha.

Tupã Ñandejára rehe ojeroviáva tovy’a.

Peguahë Tupã Ñandejára rendápe pytyvõ rekávo.

Opa ára peñemboja hendápe. O.

Peẽ hembiguái kuéra Abraham ñemoñaréva,

peẽ hembiporavo Jacob ra’ykuérava,

Tupã niko Ñandejára hína,

ha’e oisãmbyhy ko yvy tuichakue. O.

Ha’e imandu’a manté iñe’ẽ ome’ẽ va’ekuére.

Iñe’ẽ ome’ẽ va’ekuére opa árape guarã,

Ha’ete voi ome’ẽ va’ekue iñe’ẽ Abrahámpe,

héra tee rehe ome’ẽ va’ekue iñe’ẽ Isaácpe. O.

EVANGELIO

Ñahendúta Ñandejára Jesucristo rekove ha hemimbo’e San Mateo omombe’u háicha  7, 15-20

Upe ramo Jesús he’i hemimbo’ekuérape:

Peñe ñangarekóke maranduhára japu pene rendápe oúvagui. Ijape guio ojogua ovechápe, ipy’apýpe katu aguara guasu ñarõ. Hembiapo kuére peikuaáta ichupe kuéra. Ndo jepo’ói niko úva ñuatĩ mátagui, térã ígo ñuatĩ pytãgui. Ha péicha, yvyra iporãva hi’a porã.

Umi yvyra ivaíva katu hi’a vai. Ndaikatúi pe yvyra iporãva hi’a vaívo, térã pe yvyra ivaíva hi’a porãvo. Opa yvyra ndahi’a porãiva oñekytĩva ha oñemombo tatápe. Ha péicha, hembiapokuére peẽ pehecha kuaáta mávapa umi maranduhára japu.

Ñandejára Jesucristo Ñe’ẽ