JUEVES XX DEL TIEMPO ORDINARIO

Ko’ágã ñahendúta Tupã Ñandejára ñe’ẽ Jueces arandukápe oĩ háicha 11, 29-39a

Tupã Ñandejára pu’aka katu omoenyhẽ Jeftépe. Ojapi oho Galaad ha Manasés yvy rupi. Upégui oho Mispá gotyo oĩva Galaad yvýpe oike haguã Amón retãme. Jefté he’i Tupã Ñandejárape: Amongua reity ramo che pópe, ndéve aikuave’ẽ ha ahapýta upe osẽva che rógagui che ruguãtĩ ñorairõhágui aguahẽvo.

Jefté oho oñorairõ umi Amongua ndive ha Tupã Ñandejára oity ichupe kuéra Jefté pópe. Sarambi ojapo ichugui kuéra Jefté ha 20 táva ho’a ipo guýpe oĩva táva Aroer guive táva Minit ha Abel-Queramim peve. Upe guive Amongua opyta Israel ñemoñare po guýpe.

Jefté ojevy hógape Mispápe. Ha oguahẽvo ohóvo tajýra peteĩ ete osë ha’eño túva ruguãitĩvo opurahéi ha jerokyhápe. Ohechávo tajýrape, Jefté omondoro ijao ohechaukávo ipy’a rasy ha he’i ichupe: Háa, che rajy. Péicha ite peve piko che mbopy’a rasy. Ndéta piko upe che reja vai etétáva? Tupã Ñandejárape niko ame’ẽ che ñe’ẽ ha ajapo mante va’erã niko upe ichupe ha’e haguéicha.

He’i ichupe tajýra: Che ru, oime rire reme’ẽ ra’e ne ñe’ẽ Tupã Ñandejárape ha ere ra’e ichupe péicha rejapotaha che rehe, ejapo upéicha. Tupã Ñandejára niko ojapo upe ha’e he’i va’ekue ohejávo ndéve rehundi Amongua, umi nde rayhu’ỹvape. Peteĩ mba’énte aipota reheja chéve ajapo. Ndaikatu mo’ãigui che memby che irũ kuña kuéra ndive ahase umi yvytýre añembyasy mokõi mése rupi.

Jefté oheja tajýrape oho. Ha upe kuñataĩ hasẽ oikóvo umi yvytýre omanóta haguére omenda mboyve. Umi mokõi mése ohasa rire upe kuñataĩ ojevy hógape ha Jefté ojapo upe Tupã Ñandejárape he’i haguéicha.

Tupã Ñandejára Ñe’ẽ.

SALMO ÑEMBOHOVÁI 39, 5. 7-10

Opavave: Tupã che Jára, nde reipotávante niko che aipota

Ovy’a rasa upe Tupä Ñandejára
rehe onónte ojeroviáva,
ojehe’a’ỹva hembiapo vaíva ndive,
ha mba’e japúpe oñeme’ẽ’ỹva. O.

Rejerure rangue mymba juka ha mba’e kuave’ẽ,
térã mymba hapy tembiapo vai jeheja reirã,
hendaguépe reju che resape’a.
Upévare ha’e ndéve: “Nde pópe añemoĩ.” O.

Upévare ha’e ndéve: “Nde pópe añemoĩ.”
Ne rembiapoukapýpe he’íma voi umi mba’e che ajapo va’erã.
Tupã che Jára, nde reipotávante niko che aipota,
ne rembiapoukapy areko che ánga ruguápe. O.

Tupã Ñandejára, nde reikuaa akirirĩ rangue,
opavavépe aikuaauka hague nde reko joja,
nambotýi che juru araka’eve
nde reikuaa porã Tupã Ñandejára. O.

ALELUIA Cf. Sal 94, 7d. 8a

Aleluia.
Pe hendu ramo Tupã Ñandejára ñe’ẽ, ani pe mohatä pene korasö.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha 22, 1-14

Upe ramo Jesús oiporu jevy ñe’ẽ mbojoja oñe’ẽ haguã opavavépe. He’i ichupekuéra: Tupã Ñandejára sãmbyhy yvágape oĩva niko kóicha. Oĩ va’ekue peteĩ mburuvicha guasu ojapo va’ekue karu guasu ta’ýra omendáta haguére.

Omondo hembiguái kuérape ohenói haguã umi ojejerure va’ekuépe ou haguã. Ha’ekuéra katu ndouséi. Omondove jevy upéi hembiguái kuérape, he’ívo ichupe kuéra: “Peje umi ojejerure va’ekuépe ou haguã, oĩmbamaha tembi’u ojekaru haguã. Peje ichupe kuéra ajukaukáma hague che rymba kuéra ikyravéva, ha oĩmba itemaha ha’ekuéra ou haguãicha karu guasuhápe.”

Umi ojejerure va’ekuépe ou haguã katu mba’eve ndoikuaaséi. Peteĩva oho ohecha ijyvy, ambue katu oho iñemuháme, ha umi hembýva katu ojeity umi mburuvicha guasu rembiguái ári, ha oinupã ojuka peve. Upérõ pe mburuvicha guasu ipochy eterei.

Omondo iñorairõhára kuéra ojuka haguã umi hembiguái jukaharépe ha ohapypa hagua itávakuéra. Upéi katu he’i hembiguái kuérape: “Oĩmbaitéma karu guasu che ra’y mendarã. Umi ajerure va’ekuépe ou haguã niko ndaijái voi kuri che rógape ou haguã. Tapeho aipo ramo umi okáre ha peje pejuhúvape ou haguã ko karu guasuhápe. Umi hembiguái osẽ pe okáre ha omboaty opa ojuhúvape. Heko potĩ ha heko vaíva peteĩcha oho, ha péicha ou omoenyhẽ hikuái pe óga.

Upéi katu pe mburuvicha guasu oike ohecha haguã umi ou va’ekuépe, ha ohecha peteĩ kuimba’épe omonde’ỹ va’ekue mendahápe guarã ao. He’i ichupe: “Che irũ, mba’éicha piko reike ko’ápe remonde’ỹre mendahápe guarã ao?” Pe kuimba’e katu okirirĩnte. Upérõ pe mburuvicha guasu he’i hembiguái kuérape: “Peipykua ha peipokua, ha pemombo okápe iñypytũháme. Upépe ta hasẽ ha hãi to mopururũ.” Ha Jesús oñe’ẽmbávo he’i: Hetápe niko ojejerure ou haguã, ha mbovýpe ojeporavo.

Ñandejára Jesucristo Ñe’ẽ.