SÁBADO XX DEL TIEMPO ORDINARIO

Ko’ágã ñahendúta Tupã Ñandejára ñe’ẽ Rut arandukápe oĩ háicha 2, 1-3. 8-11; 4, 13-17

Noemí oguereko va’ekue iména Elimélec guio peteĩ karai ipehẽnguéva, imba’e reko hetáva, hérava Booz. Peteĩ jevy Rut he’i Noemíme: Ehejána taha kokuépe seváda mono’õháme. Oĩ va’erã niko peteĩva jepe ohejáva chéve aha hapykuéri koga’a amono’õ haguã.

He’i ichupe Noemí: Tereho che memby. Ha oho Rut ohupi yvýgui umi seváda ho’áva omono’õva pógui. Ha mba’éicha haguã nimbo oho omono’õ Booz, upe Elimélec pehẽngue kokuépe.

Booz he’i Rútpe: Natekotevẽi reho ambue kokuépe. Epyta ápe che rembiguái kuéra apytépe. Ha’ekuéra ohohápe tereho hapykuérikuéra. Ha’éma ichupe kuéra ani haguã iñe’ẽ vai ndéve. Nde y’uhéi ramo tereho hey’u umi kambuchi ha’ekuéra omoenyhẽ va’ekuégui. Rehendúpa che rajy!

Oñakãity ichupe Rut, ha he’i: Che niko ndaha’éi arupigua. Mba’ére piko péicha ite peve che rerohory, ha rehechakuaa ite chéve? Booz he’i ichupe: Aikuaapa umi mba’e rejapo va’ekue ne ména sýre, ne ména omano rire. Aikuaa reheja hague nde sy, nde ru ha ne retã, ha reju reiko ko tetã reikuaa’ÿvape.

Omenda Booz Rut rehe. Ha oiko rire oñondive Tupã Ñandejára rupi ae Rut ou hye guasu ha imemby peteĩ mitã kuimba’e. Umi kuña he’i Noemíme: Tupä Ñandejára to ñemomba’e guasu. Ome’ẽ niko ndéve peteĩ oñangarekótava nde rehe. Héra ta herakuã Israel retã tuichakue javeve. Rut, upe nde rayhúva 7 ne memby nde rayhu ramo guáicha imemby, ha upe imemby ne moangapyhýta ha oñangarekóta nde rehe ne guãiguĩ vove.

Noemí ohupi pe mitã ha ojopy ipyti’áre. Upe ára guive ha’ete voi omongakuaa pe mitã. Umi kuña Noemí róga jerére oikóva he’i: “Oúma Noemíme imembyrã”, ha ombohéra hikuái upe mitã Obed. Kóva ha’e hína Jesé ypykue. Jesé katu David ypykue.

Tupã Ñandejára Ñe’ẽ.

SALMO ÑEMBOHOVÁI 127, 1-5

Opavave: Revy’a va’erã Tupã Ñandejára rehe rejerovia ramo.

Revy’a va’erã Tupä Ñandejára rehe rejerovia ramo,
ha reiko ramo ha’e oipota háicha.
Nde ry’ái repykuégui rekarúne,
revy’áne, ha opa mba’épe resẽ porãne. O.

Nde róga pýpe ne rembireko ojoguáta
ku parral hi’a hetávape.
Ne mesa jerére katu nde ra’y ha nde rajykuéra
ojoguáta umi yvyra roky pyahúpe. O.

Kóicha ojehovasáta upe Tupã Ñandejára rehe ojeroviáva.
TupänÑandejára ta nde rovasa
Sión guive reikove aja pukukue.
Reikovéta rehecha haguã mba’éichapa Jerusalén opu’ã. O.

ALELUIA Mt 23, 9b. 10b

Aleluia.
Peẽ niko peguereko peteï túva añónte: Pe Túva yvágapegua; peguereko peteï pohanohára añónte, pe Mesías.
Aleluia.

EVANGELIO

Ñahendúta Ñandejára Jesucristo rekove ha hemimbo’e San Mateo omombe’u háicha 23, 1-12

Upe ramo Ñandejára he´i opavavépe ha hemimbo’ekuérape: Umi Moisés rembiapoukapy mbo’eha ha umi fariséokuéra ári oĩ oikuaaukávo Moisés rembiapoukapy. Upévare, pene ñe’ẽ rendu va’erã ichupekuéra ha pejapo va’erã opa ha’ekuéra he’íva. Upe ha’e kuéra ojapóva katu ani peẽ pejapo. Ha’e kuéra niko he’i peteĩ mba’e ha ndojapói pe he’íva. Ha’ekuéra niko omoĩ opavave apére mba’e pohýi ikatu’ỹva jaropu’aka. Oity avei opavave apére mba’e pohýi, ha peteĩ ikuãme jepe ndopokoséi hese.

Opa umi mba’e ojapóva, ojechauka haguãnte ojapo. Oñapytĩ isyva ha ijyvakuérare Tupã Ñandejára Ñe’ẽ ryru tuicha tuicháva, ha ombopukuve ijao fléko. Oĩ porãvetahápe oguapy karu guasuhápe ha judíokuéra tupaópe. Tape rupi katu oipota oñemomaitei ichupe kuéra karai guasúicha ha opavave te’i ichupe kuéra “Mbo’ehára”.

Peẽ katu ani peheja avavépe pene renói mbo’ehára. Peĩ niko ojoryvy hína, ha peteĩnte pene Mbo’ehára. Ha ani avavépe peje ko yvy ári “Ore Túva”. Peteĩnte niko pende Túva, ha ha’e oĩ yvágape. Ani avei peheja avavépe he’i peẽme “Ore mbo’ehára”, peteĩnte niko pene mbo’ehára ha upéva pe Mesías. Pe mba’e guasuvéva pende apytépe, tembiguáicha ojejokuaiuka va’erã. Tupã oitýta yvýre pe oñemomba’e guasusévape, ha upe oñemomichĩvape katu omomba’e guasúta.

Ñandejára Jesucristo Ñe’ẽ