LECTURAS DOMINGO VIGÉSIMO PRIMERO

LECTURAS DOMINGO VIGÉSIMO PRIMERO

LECTURA PETEÎHA:

Ko’ágã ñahendúta Tupã Ñandejára ñe’ẽ Isaías arandukápe oĩ háicha 66, 18-21

Péicha he’i Ñandejára: Che voi ajúta ambyatývo opa yvypóra ha tetã, ou haguã ohecha che reko mimbipa. Che amoĩta mba’e rechaukaha. Ahejáta okañy mbovymi ha amondóta chupekuéra umi tetã rupi: Tarsis, Libia, Lidia, tetã hu’y ojeporuhápe,

Tubal, Grecia ha yguasu pegua tetã mombyry, nohendúi va’ekue araka’eve che hegui ha ndohechái vaekue che reko mimbipa. Ha’ekuéra omyerakuãta tetãnguéra rupi che reko mimbipa.

Opa tetãgui omboúta hikuái pene retã guápe, kavaju ári, kárrope, guapyha, mburika ha kaméllo ári. Umíva ha’éta mba’e kuave’ẽ ramo chéve guarã che yvyty marangatu Jerusalénpe, umi mba’e kuave’ẽicha oguerúva Israelgua, mba’yru potĩme che tupaópe.” Che,
opa mba’e Jára, upéicha ha’e. “Ha ijapytéguikuéra avei aiporavóta che pa’i ha levitarã. Che, opa mba’e Jára, ha’e upéicha.”

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI (116, 1-2)
Opavave: Tapeho ha pemoherakuã marandu pyahu yvy apére.

Tomomba’e guasu Ñandejárape tetãnguéra, maymáva tombotuicha ichupe. O.

Ñande rayhueterei niko ha’e, ha heko jeroviaha opa ára guarã. O.

LECTURA MOKÕIHA:
Ko’ágã ñahendúta Tupã Ñandejára ñe’ẽ ojehai va’ekue Hebreoskuérape 12, 5-7 11-13

Che pehenguekuéra, pende resaráima piko Ñandejára oñemoñe’ẽ hague peẽme ita’ýrape ramo guáicha: “Ani rejahéi, che ra’y, pe Tupã rekombo’e rehe, ha ani nde py’a kangy nde ja’o hague rehe.

Ñandejára niko oheko mbo’e umi ohayhúvape, ha oinupã umi ta’ýraicha oguerekóvape”. Peẽ niko pehasa asy hína pejeheko mbo’e haguã. Tupã pende rereko ita’ýra ramo guáicha. Oĩ nga’u piko túva oinupã’ỹva ita’ýrape?

Añetehápe niko, mba’eveichagua ñenupã naiporãi pe jahupity jave, hasy. Ha jaikuaávo mba’épa he’ise, ogueru ñandéve py’a guapy ha ñane mboheko joja.

Aipo ramo taimbarete jevy pende po ikane’õva ha pene renypy’ã ikangýva, ha peheka tape ivai’ỹva, okuéra haguã umi ikarẽva ha ani osẽ tapégui.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA (Jn 14, 6)

Jesús he’i: Che hína upe tape, upe añete ha upe tekovete. Che rupi mante ikatu
oñeguahẽ che Ru rendápe.

EVANGELIO
Marandu porã Ñandejára Jesucrísto rekove ha hemimbo’e San Lucas omombe’u háicha (Lc.13, 22-30)
Opavave: Romomba’e guasu ndéve, Ñandejára.

Jesús oho jave hína Jerusalénpe, opyta puebloha rupi ha mba’e, ha upe rupi ombo’e. Peteĩ osẽ oporandu chupe: — Mbo’ehára, ndaheta mo’ãi umi ojesalvátava,
aje.
Osẽ he’i Jesús: Peñeha’ã peike pe okẽ pychi’ĩ rupi. Cháke hetáta hína umi oikeséva Ñandejára Rréinope, ndaikatu mo’ãi ramo jepe oike. Ágã Ñandejára ombotývo hokẽ, peẽ okápe pepytáva peñemoĩne pesapukái, “Karai, eipe’ána oréve ne rokẽ.”

Ha’e osẽne he’i peẽme, “Che ndapoikuaái.” Ha upépe pesẽne peje chupe, “Roguapy va’ekue niko rokaru ha mba’e ne ndive. Ha nde ore mbo’émi va’ekue ore puéblo rupi.”

Ha’e katu he’ita peẽme, “Che ndapoikuaái. Pe che reja, peẽ tekove ahẽ.” Ha okápe pepytávo, peñemoĩne pejahe’o ha pende pochy pehechávo Abraham, Isaac, Jacob ha opa umi profétakuéra oĩva hína Ñandejára Rréinope. Opáguio oĩta oúva oguapy
okaru haguã Ñandejára Rréinope. Ha upépe, umi ko’ágã itapykuéva, tenondete oguapýta. Ha umi ko’ágã itenondéva, itapykuéta.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.