LECTURA DEL SÁBADO 12 DE OCTUBRE

LECTURA DEL SÁBADO 12 DE OCTUBRE 

Primera Lectura 

Ko’ágä   ñahendúta Tupã Ñandejára ñe’ẽ Joel arandukápe oĩ háicha                                                        4, 12-21

Péicha oñe’ẽ Tupã Ñandejára: Peñe mboaty tetã nguéra, Josafat ñúme tapeho. Upépe Tupä Ñandejára ombojovakéta opa tetãme. 

Peikytĩ umívape, iñaña itereígui, trígo aju rakãicha, oguahẽ ramo guáicha ñemono’õha ára. 

Peñami parral áicha, oĩma ramo guáicha vino ojejapo haguã, hyru rembére ta henyhẽ ha to ñehẽ. 

Heta eterei umi oĩva ñúme, hérava: “Toiko upe oje’éva”. Hi’aguĩma hína upépe Tupä Ñandejára ára. Kuarahy ha jasy iñypytũ, mbyja ita nomimbivéi. 

Tupä Ñandejára okororõ yvyty Sión guive, ohenduka iñe’ẽ Jerusalén guive, ha yvága ha yvy oryryipa. Tupä Ñandejára omo’ã hetã guápe, oñangareko Israel guáre. 

Peẽ pehecha kuaáta, che, Tupã pende Jára, aikoha Sión che yvyty marangatúpe. 

Jerusalén, táva marangatúta. Araka’eve noĩ mo’ã véima ambue tetãgua po guýpe. Upe árape vino ha kamby ýicha osyrýta umi yvytýre. Judá pegua ysyry kuéra hi’y hetáta, ha che tupaógui osẽta yvu omohe’õtava upe ñu Acacias pegua. Tapéicha Egipto opytáta ha Edómgui oikóta yvy ojeiko’ỹha. 

Upépe ondyry haguére Judagua rehe ha imarangatúva ruguy oñohẽ. Umíva manongue amoengoviáta, ijapoharépe ndaheja rei mo’ãi. Judá ha Jerusalénpe ojeikóta opa ára, ha che, opa mba’e Jára, aikóta yvyty Siónpe.” 

Tupã Ñandejára Ñe’ẽ.

SALMO ÑEMBOHOVÁI                       96, 1-2. 5-6. 11-12

R. Ñandejára rérape pevy’a peẽ pende reko jojáva, 

Tupä Ñandejára mburuvicha guasu hína. 

Ko yvy tuichakue tovy’a, umi  yvy y mbyte rupi oĩva tovy’a. 

Arai ypytũ oñuãmba ichupe, 

teko hekopegua ha teko joja  iguapyha ramo oguereko. R.

Umi yvyty araitýicha hykupa Tupä Ñandejára renondépe. 

Ha’e opa ko yvy Jára hína, 

yvága heko joja omoherakuã 

ha maymáva ohecha heko mimbipa. R.

Ko’ẽ pyahu iñapysẽ hekojojávape, 

vy’a katu heñói imarangatúvape. 

Tupä Ñandejára rérape pevy’a peẽ pende rekojojáva, 

ha pemomba’e guasu héra marangatu. R.

ALELUIA             Lc 11, 28

Aleluia. 

Ovy’a ite umi ohendu ha ojapóva Tupä Ñandejára ñe’ë.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?     

                                                            11, 27-28

Upe ramo Jesús oñe’ẽ aja hína ko’ã mba’ére, umi oĩva apytégui peteĩ kuña osapukái: 

Ovy’a iténepa pe kuña nde reru va’ekue  ko yvy ári ha ne mokambu va’ekue ! 

Ha’e katu he’i: Ovy’a iténe uvei umi ohendúva Tupä Ñandejára ñe’ẽ ha ojapo pe ha’e he’íva! 

Ñandejára Jesucristo Ñe’ẽ