LECTURAS DE LA SOLEMNIDAD DE SANTA MARÍA, MADRE DE DIOS

LECTURAS DE LA SOLEMNIDAD DE SANTA MARÍA, MADRE DE DIOS

LECTURA PETEÎHA:

Ko’ágã ñahendúta Tupã Ñandejára ñe’ẽ Números arandukápe oĩ háicha 6, 22-27

Ñandejára he’i Moiséspe he’i haguã Aarón ha ita’ýrakuérape oipuru haguã ko’ã ñe’ẽ ohovasa ramo Israel guápe: “Ñandejára ta nde rovasa ha to ñangareko nde rehe. Ñandejára tahory nde rechavo ha tohechauka ndéve py’a porã. Ñandejára ta nde rayhu ha to me’ẽ ndéve py’a guapy”.

“Ha’ekuéra ohenói ramo che réra ohovasávo Israel guápe, che ahovasáta ichupekuéra”.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 66, 2-3. 5-6.8
Opavave: Ñandejára ta ñande poriahuvereko ha ta ñande rovasa.

Ñandejára ta ñande poriahuvereko,
ha ta ñande rovasa, to ma’ẽ ñande rehe,
tojekuaa opa rupi hembipota,
ha opa tetã rupi ha’e oporope’aha jejopy vaígui. O.

Opa tetã to aguyjeveme’ẽ ndéve
Topurahéi vy’a pópe tetãnguéra,
resaimbyhýgui opavave teko jojápe,
hekopete remboguata tetã nguéra yvy ári. O.

Opa tetã to aguyjeveme’ẽ ndéve
Maymáva ta ne momba’e guasu,
Ñandejára, ñande ru, ñande rovasa.
Ha toiko ipoguýpe mamo mombyryve. O.

LECTURA MOKÕIHA:
Ñahendúta Tupã Ñandejára Ñe’ẽ San Pablo ohai va’ekue Galacia guápe 4,4-7

Che pehenguekuéra: Oguahévo ára oñemoĩ va’ekue katu, Ñandejára ombou ita’ýrape, ou ypy va’ekue ko yvy ári peteĩ kuñágui, Moisés rembiapoukapy poguýpe, ñande pe’a haguã upe tembiapoukapýgui, ha jajerereko Tupã ra’y ramo. Ha ta’ýrama hague rehe, Ñandejára ombou ita’ýra Espíritu ñande py’ápe. Ha upe Espíritu osapukái: “Abba”, he’iséva “Che Ru”. Aipo ramo, ñande ndaha’evéima tembiguái, ñande Ñandejára ra’ýma. Ha ñande ita’ýra hague rehe, Tupã oipota ñande avei jaiko mba’e jára ramo.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Cfr Heb 1,1-2

Aleluia.
Ymaite Ñandejára oñe’ẽva’ekue ñande ru ypykuérape heta jevy ha heta hendáicha, umi maranduhára rupi. Ko’ágã katu, ko’ã ipahavevogua árape, oñe’ẽ ñandéve ita’ýra rupi.
Aleluia.

EVANGELIO
Marandu porã Ñandejára Jesucristo rekove ha hemimbo’e San Lucas omombe’u háicha 2, 16-21
Opavave: Romomba’e guasu ndéve, Ñandejára.

Upe ramo umi ovecha rerekua pya’ete oho, ha ojuhu María ha Josépe, ha pe mitãme oñenóva hína pe mymba karuhápe. Ha ojuhúvo hikuái Jesúspe, osẽ omombe’u mba’épa he’i ra’e chupe kuéra Ñandejára ángel pe mitãre. Ha umi ohendúva opondera joaite.

María katu oñongatúnte ko’ã mba’e ipy’apýpe, ha ojepy’a mongetámiva hese. Umi ovecha rerekua katu ojevy hymbakuéra oĩháme. Tapére oho kuévo hikuái katu, oguerohory ha omomba’e guasu ohóvo hikuái Ñandejárape. Ojuhu niko ojehu hague Ñandejára ángel he’i hagueichaite chupekuéra. Ha Jesús onase hague 8 árape, oñesirkunsida, ha ombohéra hikuái pe mitã Jesús.

Ñandejára ángel péicha voi ojerure vaekue Maríape hye guasu mboyve.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesucristo.