LECTURAS DEL 01 DE ENERO

DÍA 01 DE ENERO TUPÃSY SANTA MARÍA ÁRA

Ko’ágä ñahendúta Tupä Ñandejára ñe’ẽ Números arandukápe oĩ háicha                                                            

               6, 22-27

Tupä Ñandejára he’i Moiséspe he’i haguã Aarón ha ita’ýra kuérape oipuru haguä ko’ã ñe’ẽ ohovasa ramo Israel guápe:

“Tupä Ñandejára ta nde rovasa ha to ñangareko nde rehe.

Ñandejára ta hory nde rechavo ha to hechauka ndéve py’a porã.

Tupä Ñandejára ta nde rayhu ha to me’ẽ ndéve py’a guapy”.

 “Ha’ekuéra ohenói ramo che réra ohovasávo Israel guápe, che ahovasáta ichupekuéra”.

Tupä Ñandejára Ñe’ẽ.

SALMO ÑEMBOHOVÁI                                     66, 2-3. 5-6.8

R. Tupä Nadejára ta ñande poriahuvereko ha ta ñande rovasa.

Tupä Ñandejára ta ñande poriahuvereko, ha ta ñande rovasa,

to ma’ẽ ñande rehe,

To jekuaa  opa rupi hembipota,

ha opa tetã rupi ha’e oporope’aha jejopy vaígui. R.

Opa tetä to aguyjeve me’ë ndéve. To purahéi vy’a pópe tetãnguéra,

resaimbyhýgui opavave teko jojápe,

hekopete remboguata tetã nguéra yvy ári. R.

Opa tetä to aguyjeve me’ë ndéve

Maymáva ta ne momba’e guasu,

Tupä Ñandejára, ñande ru, ñande rovasa.

Ha toiko ipoguýpe mamo mombyryve. R.

Segunda lectura:

Ñahendúta Tupä Ñandejára Ñe’ẽ San Pablo ohai va’ekue Galacia guápe                                 

  4,4-7

Che pehenguekuéra:

     Oguahévo ára oñemoĩ va’ekue katu, Tupä Ñandejára ombou ita’ýrape, ou ypy va’ekue ko yvy ári peteï kuñágui, Moisés rembiapoukapy poguýpe, ñande pe’a haguã upe tembiapoukapýgui, ha jajerereko Tupä ra’y ramo. Ha ta’ýrama hague rehe, Tupä Ñandejára ombou ita’ýra Espíritu ñande py’ápe. Ha upe Espíritu osapukái: “Abba”, he’iséva “Che Ru”. Aipo ramo, ñande ndaha’e véima tembiguái, ñande Tupä Ñandejára ra’ýma. Ha ñande ita’ýra hague rehe, Tupä oipota ñande avei jaiko mba’e jára ramo.

Tupä Ñandejára Ñe’ẽ.

ALELUIA              Cfr Heb 1,1-2

Aleluia.

Ymaite Tupä Ñandejára oñe’ẽva’ekue ñande ru ypykuérape heta jevy ha heta hendáicha, umi maranduhára rupi.

Ko’ágä katu. Ko’ã ipahavevogua árape, oñe’ẽ ñandéve ita’ýra rupi.

Aleluia.

EVANGELIO

Ko’ágä ñahendúta Ñandejára Jesucrísto  rekove ha hemimbo’e San Lucas omombe’u háicha.

Pejapysaka porãtapa hese?                                                      2, 16-21

Upe ramo umi Ovecha rerekua oho pya’ete hikuái pe Ángel he’i haguépe ichupe kuéra ha ojuhu María ha Josépe, ha pe mitãme oñeno hína pe mymba karuhápe. Ohechávo ichupe, oñemoĩ omombe’u hikuái mba’épa he’i ra’e ichupe kuéra Tupä Ñandejára remimbou, pe mitã rehe. Ha opa ohendúva ijurujái opytávo umi ovecha rerekua he’íva rehe. María oñongatu opa mba’e ipy’apýpe ha ojepy’a mongeta. Ovecha rerekuakuéra katu oje’ói jevy oguerohory ha omomba’e guasúvo Tupä Ñandejárape opa mba’e ohendu ha ohecha va’ekue rehe. Ojehupa ite niko oje’e haguéicha ichupekuéra.

Ha 8 ára haguépe ombyapi’o hikuái pe mitã, ha ombohéra Jesús, pe téra he’i va’ekue Tupä remimbou Maríape hye guasu mboyve.

Ñandejára Jesucrísto  Ñe’ẽ.