LECTURAS DEL 05 DE ENERO

LECTURAS DEL 05 DE ENERO

Ñahendúta Tupã Ñandejára Ñe’ẽ San Juan ohai va’ekue     1 Jn 4, 7-10

Che pehẽngue kuéra pohayhúva, jajoayhu va’erã, pe mborayhu oúre Tupã Ñandejáragui. Opa oporohayhúva, Tupã Ñandejára ra’y ha oikuaa Tupãme. Pe oporohayhu’ỹva ndoikuaái Tupãme, Tupã Ñandejára niko mborayhu.

Tupã ohechauka ñandéve imborayhu omboúvo Ita’ýra peteĩ ete yvy ári, jaikove haguã ha’e rupi. Pe mborayhu hína kóva: ndaha’éi ñande jahayhu hague Tupã Ñandejárape, ha’e uvei ñande rayhu ha ombou Ita’ýra, ha’e omano rupi ojeheja rei haguã ñandéve ñane angaipa.

Tupã Ñandejára Ñe’ẽ.

SALMO ÑEMBOHOVÁI    71, 1-4ab. 7-8

R. Tupã Ñandejára, eme’ẽ mburuvicha guasúpe teko joja

Tupã Ñandejára, eme’ẽ mburuvichaguasúpe teko joja ha mburuvicha guasu

ra’ýpe teko potĩ ikatu haguãicha ne retã

oisãmbyhy hekopete ha imboriahúvape ohecha kuaa. R.

Py’aguapy ha teko joja yvytýgui to guejy ne retãgua ári.

Mburuvicha guasu to ñangareko imboriahúvare,

tohecha kuaa imboriahúva mitã nguéra. R.

Hetãme to jeiko hendapete ha hetã toisãmbyhy jasy oñehundi peve.

Peteĩ yguasúgui ambue peve upe yvy toĩ ipo guýpe,

Éufrates ysyry guive yvy opaha peve. R.

ALELUIA

Aleluia.

Tupä Ñandejára che mbou va’ekue omombe’u haguä  Marandu Porä imboriahúvape ha amombe’u haguä

ojepoítaha umi oikóva ñapytïmbýpegui.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Marcos omombe’u háicha. Pejapysaka porãtapa hese?                                                            6, 34-44

Upe ramo oguejývo Jesús pe kanóagui, ha ohechávo hetaha umi ijatýva, oiporiahuvereko ichupe kuéra, oĩgui ovecha herekua’ỹ vaicha. Ha oñepyrũ ombo’e ichupe kuéra heta mba’ére. Ka’aru pytũma ramo hemimbo’e kuéra ou hendápe, ha he’i ichupe: Ka’aru etéma niko, ha ko’arupi ndaipóri avave oikóva. Emondómana opavavépe to ho umi táva rupi, to jogua hembi’urã. Jesús katu he’i ichupe kuéra: Peẽ voi pemongaru ichupe kuéra.

Ha’e kuéra katu he’i ichupe: Reipota piko roho rojogua 200 pláta pehẽngue repy pan, romongaru haguã ichupekuéra?

Jesús he’i: Mbovy pan piko pereko? Ta peho pehecha.

Oikuaa vove he’i ichupe: 5 pan ha mokõi pira. Ha omboguapy opavavépe aty atýpe, kapi’ipépe. Ha oguapy hikuái peteĩ atýpe 100 ha ambuépe 50. Upéi katu ojapyhy ipópe umi 5 pan ha mokõi pira ha oma’ẽvo yvága gotyo ohovasa.

Upéi oipehe’ã umi pan ha ome’ẽ ohóvo hemimbo’ekuérape, ha ha’e kuéra ome’ẽ opavavépe. Oipehe’ã avei umi pira opavavépe.

Opavave ho’u hyvatã meve. Omboaty hikuái umi pan ha pira pehẽngue hembývagui, ha omoenyhẽ  12 ajaka. Umi ho’u va’ekue pe pan niko hína 5.000 kuimba’e rupi.

Ñandejára Jesucristo Ñe’ẽ.