LECTURAS DEL 3 ENERO: FERIA DE NAVIDAD

LECTURAS DEL 3 ENERO: FERIA DE NAVIDAD

LECTURA PETEÎHA:

Ñahendúta Tupã Ñandejára Ñe’ẽ San Juan ohai va’ekue  1 Jn 2, 29 – 3, 6

Che ra’ykuéra pohayhuetéva: Peikuaáma Cristo imarangatuha, peikuaa va’erã avei aipórõ, opa umi oikóva tekojojápe, Tupã Ñandejára ra’yha.

Pema’ẽmi mba’éichapa ñande rayhu Tupã pe Túva, ikatu haguã ñañembohéra Tupã ra’y, ha ñande ha’e. Upévare yvypóra reko rayhuha na ñande kuaái, ndoikuaái haguére Tupãme.

Che pehẽnguekuéra pohayhúva, ñande ha’éma Tupã ra’y, ha jepe ndojekuaáirõ gueteri mba’éichaguátapa ñande, jaikuaa, Jesucristo ojechaukávo, ha’eichaguátaha ñande jahechátagui ichupe ha’e háichaite. Ha opa ojeroviáva hese oñemopotĩ, Jesucristo ipotĩ háicha.

Ha iñangaipáva opu’ã Tupãre, pe angaipa niko ñepu’ã Tupãre. Peẽ peikuaáma Jesucristo ou hague yvy ári oipe’a haguã ñane angaipa, ha ha’e ndojapói hague mba’eveichagua angaipa. Aipórõ opa oĩva hendive peteĩ py’ápe ndoikovéi angaipa apópe, ha umi ojapo va’ekue angaipa ndohechái ha ndoikuaái ichupe.

Tupã Ñandejára Ñe’ẽ.

SALMO ÑEMBOHOVÁI 97, 1. 3cd-6

Opavave: Repurahéi Tupã Ñandejárape purahéi pyahu

Pepurahéi Tupã Ñandejárape purahéi pyahu,

mba’e hechapyrãva ojapógui ha’e.

Ipyapy mbarete ha imarangatúgui ipu’aka opa mba’ére. O.

Yvy jerekuévo ojehecha

Tupã ipu’akaha opa mba’ére.

To jererohory Ñandejára yvy jerekuévo,

purahéi rory to soro ha to jevy’a. O.

Árpa púpe Tupã Ñandejárape to jepurahéi,

mbaraka púpe ichupe to jepurahéi.

Turu ha trompéta púpe to jepurahéi Ñandejára,

ñande ruvicha guasu renondépe. O.

ALELUIA

Aleluia.

Pe Ñe’ẽgui oiko kuimba’e ha oikove va’ekue ñande apytépe.

Maymave ichupe omoguahẽvape

ome’ë pokatu oiko haguä ichuguikuéra Tupã Ñandejára ra’y.

Aleluia.

EVANGELIO

Marandu porã Ñandejára Jesucristo rekove ha hemimbo’e San Juan omombe’u háicha   1, 29-34

Upe ára ambuépe, Juan ohecha Jesús oñembojaha ohóvo hendápe, ha he’i: “Péina ápe, Tupã Ñandejára ovecha ra’y oheja reíva iñangaipa opavavépe ko yvy ári. Ha’e hína upe che mandu’a hague ha’e ramo: ‘Che rire oúta peteĩ tuichavéva che hegui, ha’e oikove haguére che aikove mboyve. Chete voi, ndaikuaái va’ekue mávanepa ha’e. Péicharõ jepe, aporomongarai aikóvo ýpe, maymáva Israelgua oikuaa haguã mávapa ha’e.’”

Ha Juan voi he’í va’ekue kóicha: “Ahecha Espíritu Santo yvágagui oguejýva, ha pykasúicha opyta hi’ári. Upérõ, che ndaikuaái va’ekue mávanepa ha’e. Upe che mbou va’ekue aporomongarai haguã ýpe, he’i chéve: ‘Upe nde rehecháva Espíritu Santo oguejyha hi’ári, upéva hína upe oporomongaraíva Espíritu Sántope. Chete voi ahecha va’ekue, ha aikuaa porã Tupã Ra’yha ha’e.”

Ñandejára Jesucristo Ñe’ẽ.