DOMINGO XXII DEL TIEMPO ORDINARIO

DOMINGO XXII DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Jeremías arandukápe oĩ háicha 20, 7-9

Che Jára, nde che mbotavy, ha che añembotavyuka. Ne mbareteve va’ekue ha nde pu’aka che rehe. Manterei ojepuka che rehe, opavave oñembohory che rehe. Añe’ẽ ramo, añe’ẽ amomarandu haguã ñendyry ha ñerundínte voi.

Manterei oñeñe’ẽ reity chéve ha oñeñembohory che rehe amyerakuãgui ne ñe’ẽ. Ha’e ramo: “Na che mandu’a mo’ãvéi Ñandejára rehe, na ñe’ẽ mo’ãvéi hérape”, upéro ne ñe’ẽ che pype oiko tata che mbokusuguéva ramo, oikéva che kãnguekua
peve. Ajokose ha ndaikatúi.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 63, 2-6. 8-9

Opavave: Che py’a nde hegui amyenyhẽse, che Jára.

Tupã, nde niko che Jára.
Opa rupi roheka che py’a nde hegui amyenyhẽségui.
Opa che rekove niko nde rehe oikotevẽ, ku yvy ndokyveiha y oikotevẽháicha. O.

Tupaópe rohechase, nde pu’aka ha nde reko mimbipa
Ne mborayhu niko tuichaiteve jeikovégui.
Ndéve rogueropurahéine, ha aikove aja pukukue romomba’éne. O.

Ndéve añembo’évo che po ahupíne.
Avy’aiténe apytávo ku so’o kyra ha karaku
ha’u ramo guáicha ha torypápe romomba’e guasúne. O.

Ndégui upe che pytyvõva.
Nde pepo guýpe aguapýne vy’águi apurahéi.
Che rekove nde rehe ojejopy, ha nde, nde pópe che rereko. O.

LECTURA MOKÕIHA:
Ñahendúta Tupã Ñandejára Ñe’ẽ San Pablo ohai va’ekue Roma guápe 12, 1-2

Upéva rehe, che pehẽnguekuéra, Tupã poriahuvereko rehe ajerure peẽme, peẽ voi peñemoĩ haguã Tupä renondépe, ime’ẽmby oikovéva, imarangatúva ha iporãva ramo. Upéva ha’e pe jererohory añete peikuave’ẽ va’erã.

Anivéma peiko oje’e háicha ko’ágã ojeiko va’erãha. Upéva rangue, pemoambue pende py’apy iñambue haguã avei pende rekove ha peikuaa Tupã Ñandejára rembipota, he’ise, pe iporãva, pe ombohorýva ichupe, pe mba’evépe ivai’ỹva.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Cf. Ef 1, 17-18
Aleluia.
Ajerure Tupã Ñandejárape omyesakã haguã peẽme pene akãme perekóva, peikuaa porã haguã mba’e peha’arõ haguãpa ha’e pene renói raka’e, ha mba’eicha itépa ha’e tuicha ohovasa opa mba’épe, umi imba’évape.
Aleluia.

EVANGELIO
Marandu porã Ñandejára Jesucristo rekove ha hemimbo’e San Mateo omombe’u háicha 16, 21-27

Opavave: Romomba’e guasu ndéve, Ñandejára.

Upérõ Jesús oñepyrũ omombe’u idisípulokuérape oho mante vaerãha Jerusalénpe.

Jesús he’i chupekuéra upépe mburuvichakuéra, pa’i ruvicha ha umi Moisés ley ombo’éva heta ombohasa asytaha chupe. He’i avei ojejukataha upépe, ha oikove jeytaha mbohapy ára haguépe.

Upépe Pedro ogueraha chupe ha’eñoháme, ha he’i chupe anive hag̃ua péicha oñe’ẽ.

He’i chupe: — Mba’éichata piko péva. Tupã ndohejái chéne ojehu ndéve mba’eve.

Jesús katu ojere ha he’i Pédrope: —Na che reja Sataná. Nde che reityse hína.

Ndereikuaái pe Tupã oipotáva. Nde niko rejogua opavavépe.

Upéi Jesús he’i discípulokuérape: — Peẽ che moirũsérõ, peñembyesarái umi mba’e peẽ pejaposévagui. Pehupi pende kurusu pende apére, ha peju che moirũ.

Umi hekovére hakate’ỹva, omanóta. Ha umi omanóva katu, oikovéta. Mba’eve niko nañanohẽi jarekopárõ opa mba’e, ha ipahápe ñañehundi. Mba’evéma niko ndaikatúi ñame’ẽ jaikove jey hag̃ua.

Ág̃a Che, kuimba’éicha aju vaekue, aju jeývo, ajúta hína che Ru pu’aka reheve ha hi’ángelkuéra ndive. Ág̃a upévo Tupã omyengoviáta peteĩ-teĩme hembiapokue ojerureháicha.

Tupã Ñandejára Ñe’ẽ.

Opavave: Romomba’e guasu ndéve, Ñandejára Jesucristo.