MIÉRCOLES XXII DEL TIEMPO ORDINARIO

LECTURA PETEÎHA:

Ñahendúta Tupã Ñandejára Ñe’ẽ San Pablo ohai va’ekue Colosas guápe 1, 1-8

Che Pablo, Jesucristo apóstol Tupã Ñandejára oipota rupi, ñane pehẽngue Timoteo ndive, romomaitei umi Tupã Ñandejára mba’éva Colosas guápe, ore pehẽngue Cristo reroviaha oikóva hekópe. Tupã ñande Ru to hekuavo pende ári ipytyvõ ha ipy’a guapy.

Roñembo’évo, ore mandu’a mantéva pende rehe ha rome’ẽ ore aguyje Tupã Ñandejára, Jesucristo Túvape. Ojekuaauka oréve mba’éicha ite pevépa perovia Cristo Jesúspe, ha pehayhu opa Tupã Ñandejára mba’évape. Ako pehendu ramo marandu pyahu peikuaa va’ekue mba’épa pe ha’arõ kuaa ichugui.

Upévare peikuaa pende jerovia ha pende mborayhu ipyendaha ipype, ha oime oñeñongatu peẽme guarã yvágape. Ko marandu pyahu okakuaa ha hi’a hína yvy jerekuévo, ojehu haguéicha pende apytépe pehendu guive oñeñe’ẽ Tupã Ñandejára py’a porãre, ha pehecha kuaa añetegua he’íva.

Kóva pene mbo’e va’ekue Epafras ku jahayhu etéva, omba’apo va’ekue ore rekovia, ha peẽ perekóva Cristo rembiguái añeteguáva ramo. Ha’e omombe’u va’ekue oréve pende rehegua, ha mba’éichapa pejoayhu Espíritu Santo rupi.

Tupã Ñandejára Ñe’ẽ.

SALMO ÑEMBOHOVÁI 51, 10-11

Opavave: Tupã Ñandejára nde rehente rojerovia

Che katu peteĩ olivo máta kakuaáicha,
Tupã Ñandejára rehe ajeroviágui,
ku yvyra opu’ãva tupao korapy péicha,
che rovyũ asýta, opa ára. O.

Tupã Ñandejára, nde niko ne mba’e porã.
A aguyjeve me’ëta ndéve opa árape
Che romoherakuãne nde Réra imba’e porãha
nde rehe ojeroviáva apytépe. O.

ALELUIA Lc 4, 18

Aleluia.
Tupã Ñandejára Espíritu oï che ári; ha’e che mbou amoerakuã haguã Marandu porã umi imboriahúvape.
Aleluia.

EVANGELIO

Ñahendúta Ñandejára Jesucristo rekove ha hemimbo’e San Lucas omombe’u háicha 4, 38-44

Upe ramo Jesús osẽ pe judíokuéra tupaógui ha oike Simón rógape. Simón sy hasy hína ra’e ha tuicha iñakãnundu. Ha ojerure hikuái Jesúspe oipohano haguã ichupe. Jesús ojayvy hi’ári ha oja’o pe akãnundúpe, ha upe akãnundu opi ichugui . Upepete voi ha’e opu’ã ha ohecha mba’épa ha’ekuéra oikotevẽ.

Ka’aru ete, oikévo kuarahy, umi oguerekóva opaichagua hasýva ogueraha hikuái Jesúspe ohecha haguã. Ha ha’e omoĩ ipo peteĩ teĩre ha omonguera. Heta hasývagui avei osẽ mba’epochy, osapukáiva: Nde ha’e Tupã ra’y!

Jesús katu oja’o umi mba’epochýpe ha ndohejái oñe’ẽ, ha’e kuéra oikuaágui ha’eha upe Mesías.

Ko’ẽmba rupi Jesús osẽ upe távagui ha oho peteĩ avave oĩ’ỹ háme. Umi távagua katu oheka ichupe ha oguahẽ hendápe. Ojokose hikuái ichupe ani haguã oho. Jesús katu he’i ichupekuéra Aikuaauka va’erã aveíko ko marandu porã Tupã sãmbyhy rehegua umi ambue táva guápe. Upevarã niko añembou va’ekue . Ha péicha, Jesús oiko omombe’úvo iñe’ẽ umi judío kuéra tupao rupi, judío retã tuichakue.

Ñandejára Jesucristo Ñe’ẽ