LECTURAS DEL DOMINGO 09 FEBRERO

LECTURAS DEL DOMINGO 09 DE FEBRERO

PRIMERA LECTURA:

Ko’ágä ñahendúta Tupä Ñandejára ñe’ẽ Isaías arandukápe oĩ háicha                                                58, 7-10

Pemboja’o pene rembi’u iñembyahýivape hoga’ỹvape pende rógape pemoguahẽ, ijopívova pemonde ha ani peñemboyke pene pehẽnguégui. Upéma ramo  che pohesapéta ko’ẽjúicha ha pya’e eterei pekueráta pende aígui, pende reko joja ohóta pene renonderã ha Tupä Ñandejára reko mimbipa pende rapykuéri.

Upéma ramo  pesapukáita ha Tupä Ñandejára pene rendúta, pejeruréta pytyvõ ha he’íta: “Ápe aime”. Peipe’a ramo mba’e pohýi oporojopýva, ndapeporoguerekói ramo tesápe ha na pende juru pochýi ramo, pemboja’o ramo pene rembi’u Iñembyahýivape ha pejehu ramo ikotevẽvape, pene mba’e resapeha hendýta pytũmbýpe, ha nde pype iñypytũva asaje pytéicha hesakãta.

Tupä Ñandejára Ñe’ẽ.

SALMO ÑEMBOHOVÁI     112, 4-9

R. Heko potĩvape pytũmbýpe jepe oĩ ohesapéva.

O bien:

Aleluia.

Pytũmbýpe jepe oĩ ohesapéva heko potĩvape, ha upéva ipy’a porã, oporo poriahuvereko ha heko joja. Ovy’a upe ipy’a ite  guive oiporukáva hapichápe, ha opa oguerekóva ogueroguata hekópe. R.

Heko jojáva ndojecha vai chéne, opa ára oikóne hese mandu’a. Ha’e ndokyhyjéi oñehenduka ramo guarã ichupe ivaíva, ha’e ojerovia mbarete Tupä  Ñandejára rehe. R.

Nda ipy’a mokõiri ha mba’evégui ndo kyhyjéi, ha oikuaa porã umi hese ija’e’ỹva oñehunditaha.

Imba’évagui ome’ẽ imboriahúvape, ha ipo jera opa ára tuicha ha herakuã porãne. R.

SEGUNDA LECTURA:

Ñahendúta Tupä Ñandejára Ñe’ẽ San Pablo ohai va’ekue ikuatia peteïhápe Corinto guápe                                          

         2, 1-5

Che pehẽngue kuéra, ku aha ramo guare  añe’ẽ pene ndive Tupä Ñandejára rembipota rehe, nda hechaukái va’ekue che arandu ha che ñe’ẽ kuaaha. Ha aimévo pende apytépe daikuaaséi va’ekue mba’eve nda ha’éi ramo Jesucrísto  rehegua. Ha ja’e porãse ramo guarã, Jesucrísto  ojehupi va’ekue kurusu rehe reheguánte aikuaase.

Añemoĩ va’ekue pene renondépe che kangy ha aryrýi kyhyjégui, ha añe’ẽvo ha amombe’úvo peëme upe marandu, ndaiporúi ñe’ẽ arandu ajereroviauka haguã. Nahániri. Peë che guerovia ahechaukávo peëme Espíritu Santo ha Tupä Ñandejára pokatu, pende jerovia oĩ haguã Tupä Ñandejára pokatu rehe, ha ani yvypóra arandúre.

Tupä Ñandejára Ñe’ẽ

ALELUIA                Jn 8, 12

Aleluia.

Jesús oñe’ẽ jevy opavavépe, ha he’i ichupekuéra:

Che hína yvypóra resapehára. Pe che moirũva oguerekóta

pe tesape oporo moingovéva, ha ndoiko mo’ã véima pytũmbýpe.

Aleluia.

EVANGELIO

Ko’ágä ñahendúta Ñandejára Jesucrísto  rekove ha hemimbo’e San Mateo omombe’u háicha.

Pejapysaka porãtapa hese?                                                      5, 13-16

Upe ramo Ñandejára Jesucristo he’i:  Peë niko jukýicha hína ko yvy ári. Juky nahe’ẽvéi ramo niko ndaikatu véima oñemohe’ẽ jevy, naiporã véima mba’everã. Upéva rehe, okápe oñemombo ha oñepyrũmba hese.

Peë niko mba’e rendýicha hína ko yvy ári. Peteï táva oĩva yvyty ru’ãme niko ndaikatúi ndo jehecháivo. Avave niko nomoendýi mba’e rendy ha upéi omoĩ mbayru guýpe térã tupa guýpe. Yvate katu oñemoĩ, ohesape haguã óga ryepýpe oĩvape. Péicha aveíke, peñeha’ã peë pehesape opavave renondépe. Ha ha’e kuéra ohechávo pene rembiapo porãngue, omomba’e guasúta pende Ru, yvágape oĩvape.

Ñandejára Jesucrísto  Ñe’ẽ.