LECTURAS DEL MARTES 04 DE FEBRERO

LECTURAS DEL MARTES 04 DE FEBRERO

PRIMERA LECTURA:

Ko’ágä   ñahendúta Tupã Ñandejára ñe’ẽ Samuel arandukápe oĩ háicha   

18, 9-10. 14ab. 24-26. 31-32 – 19, 1

Absalón oikóva peteĩ mburika ári ojetopa sapy’a David irũ nguéra renondépe. Upérõ pe mburika oike ohasa peteĩ yvyra mata guy rupi, ha Absalón opa’ã iñakãraguégui umi yvyra rakãre, ha opyta osãingo upépe imburika katu oho hapére ha’eño. Oĩ ohecháva ichupe ha oho he’i Joábpe: Ahecha Absalónpe osãingóva iñakãraguégui peteĩ yvyra mátagui.

Ndaikuaaséi mba’eve, he’i ichupe Joab; ha ojapyhy mbohapy kyse yvuku michĩva japoíva ñande pópe, ha ojakutu umíva Absalón py’a mbytetépe, oisãingóva gueteri hekove upe yvyra mátagui. Upe aja David oguapy hína umi mokõive táva rokẽ pa’ũme, ha pe mañahára ojupi ra’e upe táva korapy jere yvate mañaháme oĩva táva rokẽ ári. Pe mañahára ohecha pe kuimba’épe oñaníva oúvo ñu rupi ha’eño, ha omombe’u hatã mburuvicha guasúpe. David he’i: Ou ramo ha’eño, ogueru hína iporãva. Oñemboja aja pe kuimba’e,

Upérõ David he’i ichupe: Eñemoĩ che ykére ha epyta upépe. Ahimaas ojapo péicha.

Tupã Ñandejára Ñe’ẽ

SALMO ÑEMBOHOVÁI          85, 1-6

R. Che rendu kena Tupã Ñandejára.

Che rendukena Tupã Ñandejára, che mboriahu niko che ha vaípe ajecha,

eñangareko che rehe, nde rehe niko ajerovia.

Eipe’a jejopy vaígui ne rembiguái nde rehe ojeroviávape. R.

Che poriahuvereko kena Tupã Ñandejára, ndéve ajerure asy ára pukukue,

che mbopy’a rory Tupã Ñandejára, ne rendápe che ñembo’e amoguahẽ. R.

Tupã, nde niko ne mba’e porã ha reheja rei oréve ore rembiapo vaikue, ne renyhẽ mborayhúgui

ne momba’évape ndíve, háa Tupã, ehendu che ñembo’e, ejapysaka ko ndéve ajerure asývare. R.

ALELUIA     Mt 8,  17

Aleluia.

Cristo omoï ijapére ñande py’a kangykue ha ogueraha avei ñene mba’asy.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Marcos omombe’u háicha. Pejapysaka porãtapa hese?                                                       5, 21-43

Upe ramo Jesús oguahẽ jevývo kanóape yguasu mboypýrigui, heta eterei oĩ ijatýva hese, ha ha’e opyta yguasu rembe’ýpe. Upévo, oguahẽ Jairo. Ha’e niko umi judío kuéra tupao pegua ruvicha hína. Ha ohechávo Jesúspe oñesũ henondépe, ha ojerure asy ichupe he’ívo: Che rajy niko omano pota ite. Ejúna emoĩ nde po hi’ári okuera ha oikove haguã.

Jesús oho hendive, ha heta omoirũva ichupe kuéra ha ojopypáva ichupe. Umíva apytépe oĩ peteĩ kuña hasýva ojapóma 12 áño huguy mantéva. Heta ohasa asy va’ekue ha oiporupa opa oguerekóva okueraségui, ha ndaipóri pohãnohára ikatúva omonguera ichupe.

Ohendúvo pe Jesús rehe oje’éva, ko kuña omopa’ũ opavave apyte rupi, oñemboja hese hapykuéguio ha opoko ijaóre. Pe kuña niko he’i ipy’apýpe: “Ijao rehénte jepe apokórõ, akueráta.” Upe vove huguy syry opyta, ha oñandu hetépe okuera hague imba’asýgui. Jesús oñandu osẽ hague ichugui  pokatu, oñembojere oma’ẽ opavavére ha oporandu: Mávapa opoko ra’e che aóre?

Hemimbo’e kuéra he’i ichupe: Rehecháma niko opavave nde jopyha opáguio, ha piko reporandu mávapa opoko nde rehe? Jesús katu akóinte oma’ẽ ijerekuévo, ohecha haguã mávapa opoko hese. Upérõ pe kuña oryryihápe kyhyjégui, ha oikuaa porãgui upe ojehu va’ekue, oñesũ henondépe ha omombe’upa ichupe. Jesús he’i ichupe: Che rajy, che rehe rejerovia haguére rekuera. Tereho katu rejepy’apy’ỹre. Rekueráma ne mba’asýgui.

Jesús oñe’ẽ jave gueteri hína, oguahẽ peteĩ tembijokuái ha he’i Jáirope: Nde rajy omanóma. Ma’erã piko remoangekoivéta Mbo’ehárape?

Jesús katu ojepy’apy’ỹre pe oje’évare, he’i pe judío kuéra tupao pegua mburuvichápe: Ani rekyhyje. Ejerovia che rehe.

Ha ndohejái avave omoirũ ichupe, Pedro, Santiago ha ityvýra Juánpe añónte. Oguahẽvo Jairo rógape ha ohechávo pe ayvu, tasẽ ha sapukái oikóva, oike ha he’i ichupe kuéra: Mba’ére piko pende ayvu ha pene rasẽ upéicha? Ko mitãkuña niko nomanói, okénte hína.

Ha opukapa hese hikuái. Ha’e katu omosẽ opavavépe, ha oike itúva, isy ha umi imoirũhára ndive upe mitãkuña oĩháme. Ipojái ipóre ha he’i ichupe: Talitá cum (he’iséva: “Mitãkuña, ndéve ha’e, epu’ã.”)

Upe vove pe mitãkuña, oguerekóva 12 áño, opu’ã ha oñemoĩ oguata. Ha opavave ijurujái opytávo. Jesús katu he’i ichupe kuéra ani haguã omombe’u avavetépe, ha he’i oñemongaru haguã upe mitã kuñáme.

Ñandejára Jesucristo Ñe’ẽ