LECTURAS DEL DOMINGO 16 FEBRERO

LECTURAS DEL DOMINGO 16 DE FEBRERO

PRIMERA LECTURA:

Ko’ágä ñahendúta Tupä Ñandejára Ñe’ẽ Eclesiástico arandukápe oĩ háicha                      

                                                   15, 15-20

Reipota ramo, rejapokuaa hembiapoukapy ha rejapo hekópe upe ichupe ombovy’áva.

Ne renondépe ha’e omoĩ tata ha y reiporavo haguã pe reipotáva.

Yvypóra renondépe oĩ jeikove ha mano. Ichupe oñeme’ẽta pe ha’e oiporavóva.

Tupä Ñandejára iñarandu eterei, ha’e ipokatu ha ohechapa.

Tupä Ñandejára ohecha opa mba’e jajapóva, ha oikuaapa ñane rembiapokue.

Avavépe ndoje’éi iñaña haguã, avavépe ndoje’éi ikatuha ojapo ivaíva.

Tupä Ñandejára Ñe’ẽ.

SALMO ÑEMBOHOVÁI      119, 1-2. 4-5. 17-18. 33-34

R. Ovy’a umi oikóva Tupä Ñandejára rembiapoukapy he’i háicha.

Ovy’a umi imarangatúva, ha oikóva Tupä Ñandejára rembiapoukapy he’i háicha.

Ovy’a umi hembipota ojapóva haite guive ichupe omomba’éva. R.

Ne rembiapoukapy reme’ẽ va’ekue ipype he’i háicha  ojejapo haguã.

Ha nga’u apyta hatã upe ne rembiapoukapy apópe. R.

Nde py’a porã kena che ndive aikove haguã, ha ne ñe’ẽ ajapo haguã.

Che resape’a ikatu haguã ahecha iporã iteha umi ne rembiapoukapy. R.

Ore Jára, che moarandu ne rembiapoukapýpe, umíva he’i háicha  niko aikose.

Che mbo’e umi ne rembiapoukapy, che py’a ite  guive ajapo haguã upe he’i háicha . R.

Segunda lectura:

Ñahendúta Tupä Ñandejára Ñe’ẽ San Pablo ohai va’ekue ikuatia peteïhápe Corinto guápe      

                                          2, 6-10

Ha umi iñarandu añetéma va’ekue ndive katu, aiporu ñe’ẽ arandu. Jaikuaa va’erã jepe, ndaha’eiha  arandu ko yvy peguáva, térã umi isãmbyhyhara arandu, oñehundítava rehegua.

Péva katu hína Tupä Ñandejára arandu ñemi, hembipota ñemi, ha’e oguerekóva ñande vy’arã opa ára guive. Kóva ha’e peteï mba’e ikatu’ỹ va’ekue oikuaa umi tetã sãmbyhyhara ko’agãgua. Oikuaa rire niko ndo jukái va’erã mo’ã kurusu rehe pe teko mimbipa Járape. Ñandejára Ñe’ẽme he’i háicha :

“Hayhuha kuérape guarã oguereko Tupä Ñandejára, umi avave ohecha’ỹ, ohendu’ỹ ha oimo’ã’ỹ va’ekue “.

Ko’ãva hína umi mba’e Tupä Ñandejára oikuaaukáva ñandéve Espíritu Santo rupi. Espíritu niko oipyguara opa mba’e, umi mba’e pypukuvéva Tupä Ñandejára rehegua jepe.

Tupä Ñandejára Ñe’ẽ.

ALELUIA        Cf. Mt 11, 25

Aleluia.

Romomba’e guasu che Ru, yvága ha yvy Jára, reñomi hague rehe

ko’ã mba’e umi iñarandu ha imba’e kuaávagui, ha reikuaauka umi iñarandu’ỹvape.

Aleluia.

EVANGELIO

Ko’ágä ñahendúta Ñandejára Jesucrísto  rekove ha hemimbo’e San Mateo omombe’u háicha.

Pejapysaka porãtapa hese?                                                      5, 17-37

Upe ramo he’i Ñandejára Jesucristo: ani peimo’ã che aju hague amboyke haguã Moisés rembiapoukapy térã umi mba’e maranduhára kuéra oporombo’e va’ekue. Che ndajúi amboykévo umíva, aju umíva ojehupa haguã heko itépe. Añete ha’e peëme, yvága ha yvy oĩ aja, mba’evete asy ndojepe’a mo’ãi Moisés rembiapoukapýgui, ojehupa peve umi mba’e ipype oĩva. Upéva rehe, upe omboykéva Tupä rembiapoukapy ha ojapo’ỹva pe michĩvéva jepe, ha oporombo’éva péicha ojejapo haguã, upévata pe michĩvéva Tupä oporosãmbyhyhápe yvágape. Upe Tupä rembiapoukapy ojapo ha oporombo’éva katu, tuichata Tupä oporosãmbyhývo yvágape.

Che ha’e peëme ikatutaha peguahẽ yvágape Tupä oporosãmbyhyhápe, Peë peñeha’ãve ramo pejapo Tupä rembipota, umi Moisés rembiapoukapy rehe oporombo’évagui ha fariseokuéragui.

Peë peikuaa yma oje’e hague pende ypy kuérape: “Aníke reporojuka. Pe oporojukáva oñembojovake va’erã”. Che katu ha’e peëme: Opavave oñembojovake va’erã ipochy hague rehe hapicha ndive. Ha oime ramo he’íva hapichápe ‘Nde výro’ upéva ojereraha va’erã karai kuéra renondépe. Ha pe he’íva hapicha rehe ‘Nde aña ra’y’ upéva ohóta ochyryry aña retãme.

Upéva rehe, rerahakuévo hína ne mba’e kuave’ẽ altárpe ha nemandu’a sapy’a nde rapicha ipy’a vaiha ne ndive, eheja ne mba’e kuave’ẽ pe altar renondépe ha Te reho  nde rapicha rendápe. Eñemoĩ porã raẽ hendive ha upéi katu eju altárpe ha eme’ẽ ne mba’e kuave’ẽ.

Oime ramo nde rerahaséva ñembojovakehápe, tape rehe ikatu aja gueteri, eñeha’ã eñemoĩ porã hendive. Upeicha’ỹ ramo, pe mbojovakehára ne me’ẽta mburuvichápe, ha mburuvicha ne moingéta yvyrakuápe. Añetehápe ha’e ndéve, upégui neresẽ mo’ãi neremoengoviapái peve viru pehẽngueminte jepe ndéve hembýva.

Peë peikuaa oje’e hague yma: “Ani reporomoakã ratĩ”. Che katu ha’e peëme: Oimeraẽ oma’ẽva peteï kuña rehe ha oguerekose ichupe, upéva ku oikóma ramo guáicha hendive ipy’apýpe.

Upéva rehe, nde resa nde reitýta ramo angaipápe, enohẽ ha mombyry emombo. Iporãve niko oñehundi nde rete michĩ ra’ymi, aña retãme rejeity rangue nde rekovete. Ha nde po nde reitýta ramo angaipápe katu eikytĩ, ha mombyry emombo. Iporãve niko oñehundi nde rete michĩ ra’ymi, aña retãme rejeity rangue nde rekovete.

Oje’e va’ekue avei: “Oimeraẽ opoíva hembirekógui, ome’ẽ va’erã ichupe kuatia he’íva opoiha ichugui”. Che katu ha’e peëme: “Peteï kuimba’e opoírõ hembirekógui, ha nda ha’éi  ramo omenda’ỹ va’erã hague rehe ojuehe hikuái, hese opẽta ágã hembirekore oporomoakã ratĩrõ omenda jevývo. Pe kuimba’e hese omendáva, oporomoakã ratĩta avei hína”.

Peikuaa avei oje’e hague pende ypy kuérape yma: “Ani repyrũ ne ñe’ẽ Ñandejára renondépe reme’ẽ va’ekue rehe”. Che katu ha’e peëme: Ani peme’ẽ pene ñe’ẽ Mba’eveichave ramo. Ani yvága rehe, Cháke upéva Ñandejára guapyha, térã yvy rehe, Cháke upéva ipyenda. Ani Jerusalén rehe, upévako mburuvicha guasu Tupä táva. Pene akã rehe jepe ani peme’ẽ pene ñe’ẽ. Peë niko ndaikatúi, peteï pene akãraguénte jepe pemyapatĩ térã pemohũ. Peje uvei ‘Hẽe’, térã ‘Nahániri’. Pejeve ramo, upéva ou Pe Ivaívagui.

Ñandejára Jesucrísto  Ñe’ẽ.

O bien más breve:

Ko’ágä ñahendúta Ñandejára Jesucrísto  rekove ha hemimbo’e San Mateo omombe’u háicha.

porãtapa hese?                                           5, 20-22a. 27-28. 33-34a. 37

Che ha’e peëme: ikatutaha peguahẽ yvágape Tupä oporosãmbyhyhápe, peë peñeha’ãve ramo pejapo Tupä rembipota, umi Moisés rembiapoukapy rehe oporombo’évagui ha fariseo kuéragui.

Peë peikuaa yma oje’e hague pende ypy kuérape: “Aníke reporojuka. Pe oporojukáva oñembojovake va’erã”. Che katu ha’e peëme: Opavave oñembojovake va’erã ipochy hague rehe hapicha ndive.

Peë peikuaa oje’e hague yma: “Ani reporomoakã ratĩ”. Che katu ha’e peëme: Oimeraẽ oma’ẽva peteï kuña rehe ha oguerekose ichupe, upéva ku oikóma ramo guáicha hendive ipy’apýpe.

Peikuaa avei oje’e hague pende ypy kuérape yma: “Ani repyrũ ne ñe’ẽ Ñandejára renondépe reme’ẽ va’ekue rehe”. Che katu ha’e peëme: Ani peme’ẽ pene ñe’ẽ Mba’eveichave ramo.

Peje uvei ‘Hẽe’, térã ‘Nahániri’. Pejeve ramo, upéva ou Pe Ivaívagui.

Ñandejára Jesucrísto  Ñe’ẽ.