LECTURAS DEL SÁBADO 15 FEBRERO

LECTURAS DEL SÁBADO 15 DE FEBRERO

PRIMERA LECTURA:

Ko’ágä   ñahendúta Tupã Ñandejára ñe’ẽ Reyes arandukápe oĩ háicha         

                12, 26-32; 13, 34

Jeroboám opensa ha he’i ijupe: “David rogagua ikatu oñemomba’e jevy ko tetãre, ko’apegua oho ramo Jerusalénpe omymbajuka haguã tupaópe. Ohayhu jevýne hikuái Judá pegua ruvicha guasu Roboámpe ha upérõ che jukáne oho jevy haguã hendive.”

Ojepy’a mongeta rire, Jeroboam ojapouka mokõi tóro ra’y ra’ãnga óro, ha he’i hetã guápe: “Peẽ Israelgua, natekotevẽi pehove Jerusalénpe. Kóina ápe pene tupãnguéra pene renohẽ va’ekue Egíptogui.” Upérõ omoĩ peteĩ Betélpe ha ambue Dánpe. Ha péicha rupi Israelgua oñepyrũ iñangaipa, oĩgui ohóva Betel ha Dánpe omomba’e guasu haguã ichupe kuéra.

Omopu’ã avei Tekoha ijyvateha rupi ha oiporavo pa’irã kuimaba’e kuéra apytégui umi levita’ỹvape. Upéva ári omoĩ arete ramo, ára 15, mes 8hápe, upe Judá pegua aretéicha, ha ha’e voi oikuave’ẽ mymbajuka altar ári. Kóva ojapo Betélpe, oikuave’ẽvo mymbajuka umi tóro ra’y ra’ãnga ha’e ojapo va’ekuépe, ha omoĩvo pa’i kuerarã umi Tekohápe ha’e omopu’ã va’ekue.

Upéicha ramo jepe, Jeroboam ndopoíri hembiapo vaígui, ha omoingo jevy pa’i kuéra, levita’ỹva añónte, tupã nguéra tekoha peguarã. Oimeraẽ oñekuãvape Jeroboam omoingo umíva umi tekoha pegua pa’i ramo. Ko’ã mba’e vai Jeroboam ojapóva rupi, iñemoñare iñangaipa, ha upe haguére oñehundi ete ha ndo pytái ichuguikuéra mba’eve.

Tupã Ñandejára Ñe’ẽ

SALMO ÑEMBOHOVÁI        105, 6-7a. 19-22

R. Tupä Ñandejára aníkena nderesarái nde pokatúgui.

Ore niko ore rembiapo vai ore ru ypykuéicha, tuicha rojavy ha ore ky’a ne renondépe.

Egíptope oiko ramo guare ore ru kuéra ypykue, ndohecha kuaái va’ekue umi hechapyrãva rejapóva. R.

Yvyty Horébpe ojapouka hikuái tóro ra’ãnga, ha pe ta’ãnga órogui ijejapo pyre omomba’e hikuái,

upéicha omyengovia hikuái Tupãme, heko mimbipávape, tóro kapi’i ho’úva ra’ãngáre. R.

Hesarái Tupãgui, oguenohẽ va’ekue ichupekuéra jejopy vaígui, tuicha ite mba’e ojapo va’ekue Egíptope,

mba’e hechapyrãva ojapo va’ekue Canaánpe ha mba’e ojehecha’ỹva Mar Rójope. R.

ALELUIA        Mt 4, 4b

Aleluia.

Yvypóra ndoikovéi mbuja año rehe,

opavave ñe’ë rehe uvei osëva Tupä Ñandejára jurúgui.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Marcos omombe’u háicha. Pejapysaka porãtapa hese?                                                       8, 1-10

Peteĩ ára ijaty jevy heta eterei ha ndaipóri hi’upyrã, Jesús ohenói hemimbo’e kuérape ha he’i ichupe kuéra: Aiporiahuvereko niko ko’ãvape. Ojapóma niko mbohapy ára oĩha ko’ápe che ndive, ha ndo guereko véima mba’eve ho’u va’erã. Amondo ramo hógape ñembyahýireve, tapére ipy’a mano mba’éne. Oĩ niko mombyrýgui oúva. Hemimbo’e kuéra he’i ichupe: Máva piko ojuhúta tembi’u omongaru haguã opavavépe? Ko’a rupi niko ndaipóri avave oikóva.

Jesús oporandu ichupekuéra: Mboy mbuja piko pereko?

-7, he’i hikuái.

Upépe Jesús omboguapy yvýpe opavavépe. Ha ojapyhy ipópe umi 7 mbuja ha umi pira, ha oñembo’e Tupã Ñandejárape ohovasa haguã. Upéi oipehe’ã umi mbuja ha ome’ẽ hemimbo’e kuérape, ha ha’e kuéra ome’ẽ opavavépe. Oguereko avei hikuái mbovymi pira mimi ha umívare avei oñembo’e Tupã Ñandejárape ohovasa haguã, ha he’i oñemboja’o haguã. Ha okaru hikuái hyvatã meve. Ha umi hembývagui omboaty 7 ajaka renyhẽ. Umi okarúva niko amo 4.000 rupi. Upéi Jesús omondo opavavépe hógape. Ha’e katu ojupi kanóape hemimbo’e kuéra ndive, ha oho Dalmanuta gotyo.

Ñandejára Jesucristo Ñe’ẽ