LECTURAS DEL DOMINGO 4º TIEMPO ORDINARIO

LECTURAS DEL DOMINGO 4º TIEMPO ORDINARIO

LECTURA PETEÎHA:
Ko’ágã ñahendúta Tupã Ñandejára ñe’ẽ Sofonías arandukápe oĩ háicha 2, 3; 3,12-13

Pehekáke Ñandejárape peë ko yvy ári pejejapo’ỹva, ha pejapóva opa mba’e ha’e oipotáva. Peikóke hekópe pejejapo’ỹ rehe, ha upéicha ramo ikatúne pejuhu ñemo’ã Ñandejára ipochytaha árape.

Ahejáta nde pype umi imirĩva ojejapo’ỹvape. Che rehénte ojeroviáta ha’ekuéra. Umi Israelgua hembýva ndojapo mo’ãi heko joja’ỹva, ndaijapu mo’ãi. Nomyenyhẽ mo’ãi ijuru ñe’ẽ reígui, ikatúta okaru ha opytu’u kyhyje’ỹ rehe”.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 146, 7-10
Opavave: Ovy’a va’erã umi ohecha kuaáva imboriahuha ipy’apýpe.

Ñandejára ndopíairi iñe’ẽ gui oñemoĩ uvei ojejopy vaíva yke rehe,
ha omongaru iñembyahýivape.
Ñandejára opoi umi iñapytĩmby ojererekóvagui. O.

Ñandejára oheja umi ohecha’ỹvape ohecha jevy,
Ñandejára omopu’ã umi ikangývape,
Tupã ohayhu umi heko jojávape.
Ñandejára oñangareko umi mombyry guáre. O.

Ityre’ỹ ha iména manóvape ha’e oipytyvõ.
Heko vaíva rape katu ha’e ohundi.
Ñandejára niko mburuvicha guasu opa ára guarã.
Táva Sión! Ñandejára ne sãmbyhýta tapiaite. O.

LECTURA MOKÕIHA:
Ñahendúta Tupã Ñandejára Ñe’ẽ San Pablo ohai va’ekue ikuatia peteĩhápe Corinto guápe 1, 26-31

Che pehẽnguekuéra, pene mandu’áke mba’épa raka’e peẽ Ñandejára pene renói ramo guare. Yvypóra ohecha háicha mbovy pende apytépe iñarandúva, mburuvicháva, térã umi oñemomba’e va’ekue ñemoñare.

Ñandejára niko, omotĩ umi iñarandúvape, ha oiporavo umi itavýva ramo ojererekóvape. Ha omotĩ haguã umi imbaretévape, oiporavo umi ikangýva ramo ojererekóvape. Ñandejára oiporavo umi ojejahéiva ha umi nda ha’éivape mba’eve ko yvy ári, he’ise, umi ndaha’éi etéva mba’eve, ombotapykue haguã umi tuichávape.

Upéicha ramo avave ndo jejapo mo’ãi Ñandejára renondépe. Ha Tupã voi katu pene mbojoaju va’ekue Jesucrísto rehe, ha ojapo avei Crístogui ñane arandu, ñande reko joja, ñande reko marangatu ha ñañe salvación. Ha upéicha, he’i háicha Ñandejára Ñe’ẽ: “Oime ramo ojejaposéva, to jejapo Ñandejára rérape”.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Mt 5, 12a
Aleluia.
Pevy’a ha pende py’a rorýke, tuicha jopói oñeme’ẽtagui peẽme yvágape.
Aleluia.

EVANGELIO
Marandu porã Ñandejára Jesucristo rekove ha hemimbo’e San Mateo omombe’u háicha 4, 25 __ 5, 12
Opavave: Romomba’e guasu ndéve, Ñandejára.

Upe ramo heta oĩ ohóva Jesús rapykuéri Galiléagui, Decápolis, Jerusalén, Judea ha Jordán mboypýrigui. Ha Jesús ohechávo hetaha umi ijatýva, ojupi peteĩ sérro akãme ha oguapy oñe’ẽ haguã. Idisípulo kuéra oñembyaty ijerére, ha Jesús oñepyrũ ombo’e chupekuéra.

“Ovy’a va’erã umi ohecha kuaáva imboriahuha, chupekuéra guarã niko Ñandejára Réino.
Ovy’a va’erã umi ohasa asýva, Ñandejára voi omyangapyhýta chupekuéra.
Ovy’a va’erã umi heko mirĩva, Ñandejára ome’ẽta chupe kuéra yvy imba’e teerã.

Ovy’a va’erã umi Ñandejára rembipotánte ojaposéva, ha’e voi ome’ẽta chupekuéra opa oikotevẽva.
Ovy’a va’erã umi ohecha kuaáva hapichápe, Ñandejára ohecha kuaáta chupekuéra.
Ovy’a va’erã umi ipy’a potĩva, ha’e kuéra ohechátagui Ñandejárape.

Ovy’a va’erã umi ñorãirõme oikose’ỹva, Ñandejára oguerekóta chupekuéra ita’ýra ha itajýra ramo.
Ovy’a va’erã umi ohasa asýva Ñandejára rembipota ojapógui, chupekuéra guarã niko hína Ñandejára Reino yvagapegua.
Pevy’áke pejeja’o ha pehasa asy ramo, ha oje’e ramo pende rehe opa mba’e vai, che ndive peiko haguére. Pevy’áke ha tapende py’a rory, tuicha mba’e niko oñeme’ẽta peẽme yvágape. Peẽicha avei, proféta kuéra ohasa asy va’ekue yma.”

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesucristo.