LECTURAS DE LA PRESENTACIÓN DEL SEÑOR

LECTURAS DE LA PRESENTACIÓN DEL SEÑOR

Ko’ágã ñahendúta Tupã Ñandejára ñe’ẽ Malaquías arandukápe oĩ háicha  3, 1-4

Ñandejára ipu’akapáva he’i: “Amondóta che rembijokuái ombasako’i haguã che raperã. Pende Jára peẽ pehekáva oikéta itupaópe. Oguahẽma pe oñemboúva ha ogueru pe ñe’ẽ me’ẽ peẽ peipotáva!”

Ha mávapa ikatúne ogueropu’aka upe ára? Mávapa ikatúne opyta ñembo’yhápe? Oguahẽta tatáicha ñane mopotĩ haguã. Ha’éta havõicha oipe’áva ky’a ñande hegui. Ñandejára oguapýta omopotĩ haguã pa’i kuéra, Leví ñemoñare, oñemopotĩháicha pláta ha óro tatápe.

Upéi ha’ekuéra ikatúta omba’e kuave’ẽ hekópe Ñandejárape. Upéma ramo  Ñandejára oguerohorýta Judá ha Jerusalén mba’e kuave’ẽ oguerohory haguéicha ymave.

Tupã Ñandejára Ñe’ẽ.

SALMO ÑEMBOHOVÁI 23, 7-10

Opavave: Ñandejára ningo imbarete, ha’e hína upe mburuvicha guasu.

Peipe’a umi okẽnguéra, nandi topyta,

ha toike mburuvicha guasu tuichaitéva. O.

Máva piko aipo mburuvicha guasu?

Ñandejára hína upéva, upe ipu’akapáva,

upe ñorairõme imbaretetéva. O.

Peipe’a umi okẽnguéra, nandi topyta, ha toike mburuvicha guasu. O.

Máva piko aipo mburuvicha guasu?

Ñandejára ojajaipáva, ha’e hína upe mburuvicha tuichaitéva. O.

LECTURA MOKOIHA:

Ñahendúta Tupã Ñandejára ñe’ẽ ojehai va’ekue Hebreoskuérape    2, 14-18

Che pehenguekuéra:

Ta’ýrakuéra ha’eháicha peteĩ to’o ha peteĩ tuguýgui guare , upéicha avei Jesús oiko va’ekue yvypóraicha, ho’o ha huguy reheve, imano rupi ipu’aka haguã Aña, ikatúva oporojukáre. Ha péicha oipysyrõ opa umi oiko va’ekue kyhyje poguýpe oikove aja pukukue. Añetehápe niko ha’e ndoúi va’ekue oipytyvõvo umi Tupã remimboúpe, ha’e ou oipytyvõ haguã Abraham ñemoñarépe.

Upéva rehe, oiko va’erã va’ekue ipehẽnguekuéraicha opa mba’épe, oiko haguã ichugui peteĩ Pa’i Guasu heko jeroviahava ha oporoporiahuvereko kuaáva, omba’apóva Tupãme guarã, ha ojeheja rei haguã yvypórape iñangaipa. Ha ha’e voi ohasa asy ha ojepy’a ra’ã rupi, ko’ágã ikatu oipytyvõ umi ojepy’a ra’ãvape avei.

Tupä Ñandejára Ñe’ẽ.

ALELUIA      Lc 2, 32

Aleluia.

Pe tesakã ohesapepátavaopa tetãme, ha omomimbipátava

ne retã Israélpe.

Aleluia.

EVANGELIO

Marandu porã Ñandejára Jesucrísto  rekove ha hemimbo’e San Lucas omombe’u háicha 2, 22-40

Oguahẽvo ára oñemopotĩ haguã, he’i háicha  Moisés rembiapoukapy, ogueraha hikuái pe mitã Jerusalénpe omoĩvo Ñandejára renondépe. Ojapo hikuái upéva, upéicha oĩgui Ñandejára rembiapoukapýpe, he’íva: “Opa mitã kuimba’e ijypykuéva oñemboyke va’erã Ñandejára peguarã”. Aipo ramo oho hikuái omba’e kuave’ẽvo, he’i háicha  Ñandejára rembiapoukapy: mokõi jeruti, ỹrõ katu mokõi pykasu ra’y.

Umi árape oiko va’ekue Jerusalénpe peteï kuimba’e hérava Simeón, heko joja ha iporiahuvereko katúva, ha oha’arõva osẽ Israel ñepysyrõva. Espíritu Santo oĩ Simeón ndive, ha oikuaauka ra’e ichupe nomano mo’ãiha ohecha mboyve pe Mesíaspe, Ñandejára omboútava. Espíritu Santo ogueraha Simeónpe Tupaópe ipógui, ha oguerahavo mitã Jesúspe itúva ha isy ojapo haguã Tupä rembiapoukapy he’íva, Simeón ohupi pe mitã ijyva ári ha omomba’e guasu Tupäme kóicha:

Ko’ágã, che Jára, rejapóma ne ñe’ẽ: ikatúma reheja omano ko ne rembiguái py’a guapýpe.

Ahechama reñepyrũha reporopysyrõ opa tetã renondépe, pe mba’e rendy ohesapepátava opa tetãme, ha omomimbipátava ne retã Israélpe.

Jesús ru, ha isy, opyta ijurujái ohendúvo Simeón he’íva pe mitã rehe. Aipo ramo Simeón ohovasa ichupekuéra, ha he’i María, Jesús sýpe:

Ema’ẽ, ko mitã heta Israel guápe oity térã omopu’ãta. Ha’éta peteĩ mba’e rechaukaha, ha hetáta ojahéiva hese ikatu haguã heta py’apy pegua ojekuaa. Ha opa ko’ã mba’e, peteĩ kyse pukúichata ndéve guarã, nde py’ápe voi nde kutútava.

Upe jave upépe oĩ avei hína peteï maranduhára kuñáva, Penuel rajy, hérava Ana, Aser ñemoñaréva. Iguãiguĩmava. Omenda ra’e imitãme gueteri, ha oiko iména ndive 7 áño; ojapóma hína 84 áño opyta hague mena’ỹ rehe. Araka’eve nosẽiva Tupaógui, ha omomba’e guasúva Ñandejárape ára ha pyhare okaru’ỹ rehe ha oñembo’ehápe. Ana oguahẽ upe jave ha oñepyrũ ome’ẽ ijaguyje Tupãme. Ha oñe’ẽ pe mitã Jesús rehe umi oha’arõvape Jerusalén ñepysyrõ.

Ojapopa rire Ñandejára rembiapoukapy he’íva, oho jevy hikuái Galiléape, itáva Nazarétpe voi. Ha pe mitã okakuaa ha ko’ẽ rehe imbareteve, henyhẽ arandúgui ha Tupä ohovasa ichupe.

Ñandejára Jesucrísto  Ñe’ẽ.

O bien más breve:

Marandu porã Ñandejára Jesucrísto rekove ha hemimbo’e San Lucas omombe’u háicha 2, 22-32

Oguahẽvo ára oñemopotĩ haguã, he’i háicha  Moisés rembiapoukapy, ogueraha hikuái pe mitã Jerusalénpe omoĩvo Ñandejára renondépe. Ojapo hikuái upéva, upéicha oĩgui Ñandejára rembiapoukapýpe, he’íva: “Opa mitã kuimba’e ijypykuéva oñemboyke va’erã Ñandejára peguarã”. Aipo ramo oho hikuái omba’e kuave’ẽvo, he’i háicha  Ñandejára rembiapoukapy: mokõi jeruti, ỹrõ katu mokõi pykasu ra’y.

Umi árape oiko va’ekue Jerusalénpe peteï kuimba’e hérava Simeón, heko joja ha iporiahuvereko katúva, ha oha’arõva osẽ Israel ñepysyrõva. Espíritu Santo oĩ Simeón ndive, ha oikuaauka ra’e ichupe nomano mo’ãiha ohecha mboyve pe Mesíaspe, Ñandejára omboútava. Espíritu Santo ogueraha Simeónpe Tupaópe ipógui, ha oguerahavo mitã Jesúspe itúva ha isy ojapo haguã Tupä rembiapoukapy he’íva, Simeón ohupi pe mitã ijyva ári ha omomba’e guasu Tupäme kóicha:

Ko’ágã, che Jára, rejapóma ne ñe’ẽ: ikatúma reheja omano ko ne rembiguái py’a guapýpe. Ahechama reñepyrũha

reporopysyrõ opa tetã renondépe, pe mba’e rendy ohesapepátava opa tetãme, ha omomimbipátava ne retã Israélpe.

Ñandejára Jesucrísto  Ñe’ẽ.