LECTURAS DOMINGO VIGÉSIMA SÉPTIMA SEMANA

LECTURAS DOMINGO VIGÉSIMA SÉPTIMA SEMANA

Primera Lectura 

Ko’ágã ñahendúta Tupã Ñandejára ñe’ẽ Habacuc arandukápe oĩ háicha  1, 2-3; 2, 2-4

Che Jára, araka’e peve piko asapukáita ndéve che pytyvõ haguã ha na che rendu mo’ãi? 

Araka’e peve piko asapukáita oĩgui jejuka ha ndereju mo’ãi ore pe’a jejopy vaígui? 

Maerã piko rehechauka chéve jeiko asy ha ñaña? 

Monda ha jejuka opa rupi ahecha, ñorairõ opaichagua opa rupi oiko. Ha he’i chéve Tupä Ñandejára: 

“Tuju pehẽnguépe ehai ko ndéve ahechaukátava, ikatu haguã oñemoñe’ẽ syry. 

Noguahẽi gueteri ára oiko haguã ko rehechava, katu ete oikóta ramo jepe. 

Hi’are ramo eha’arõnte, ágã hi’árape oguahẽta. Ehai umi heko añáva oñehunditaha, marangatúva katu oikovéta ojerovia rupi Tupä Ñandejára rehe”.

Tupã Ñandejára Ñe’ẽ.

SALMO ÑEMBOHOVÁI    94, 1-2. 6-9

Opavave: Pehendunga’u he’i ramo: “Ani pende py’a hatã.

Peju japurahéi Tupä Ñandejárape vy’a pópe. 

Japurahéi upe jejopy vaígui ñane renohẽvape. 

Ñaguahẽ hendápe ha ichupe ñamomba’e, 

ichupe japurahéi. R.

Peju ñañesũ ha ñamomba’e guasu ichupe. 

Ñañesũ ñande apohare, Tupä Ñandejára renondépe. 

Ha’e hína Tupä Ñandejára, ñande katu hetãgua 

ha ijovecha ñu. R.

Pehendu nga’u ra’e he’i ramo: “Ani pende py’a hatã 

Meribápe guaréicha, 

Masápe pejapo haguéicha, yvy ojeiko’ỹháme. 

Upe ramo  pende ru kuéra ypykue opu’ã va’ekue che rehe 

ohecha ramo jepe umi mba’e ajapo va’ekue. R.

Segunda Lectura 

Ñahendúta Tupã Ñandejára Ñe’ẽ San Pablo ohai va’ekue ikuatia mokõiháme Timotéope                     

     1, 6-8. 13-14

Che ra’y rohayhu etéva:

Upéva rehe ha’e ndéve, remombáy jevy haguã pe ne rembiaporã Tupä Ñandejára ome’ẽ va’ekue ndéve che rupi, amoĩ ramo guare  che po nde rehe. Pe Espíritu Tupä Ñandejára ome’ẽva ñandéve niko nda ha’éi  jakyhyje haguãavavégui, ñande py’a ñamo mbarete haguã katu, ha japoro hayhu ha ñane akã guapy haguã. 

Ani retĩ reñe’ẽ haguã Ñandejára Jesucrísto  rehe, ha ani che rerotĩ añemo akãsã hague rehe Cristo rehehápe. Nde aveíkena ehasa asy remo herakuã hague rehe pe marandu porã. Tupä Ñandejára ne mombaretéta upéva reropu’aka haguã.

Eiko kena che rombo’e haguéicha, ha aheja haguéicha ndéve reiko haguã. Ani reheja pe jerovia ha mborayhu jarekóva Cristo Jesús ndive. Ha Espíritu Santo ñande pype oikóva rupi kena, eñangareko porã umi mba’e nde pópe ojeheja va’ekue rehe. 

Tupä Ñandejára Ñe’ẽ.

ALELUIA      1Ped 1, 25

Aleluia.

Tupã Ñandejára ñe’ẽ katu opa ára guarã opyta”. 

Kóva ko ñe’ẽ hína pe marandu pyahu

oñemoguahẽ va’ekue peëme. 

Aleluia.

EVANGELIO

Marandu porã Ñandejára Jesucrísto  rekove ha hemimbo’e San Lucas omombe’u háicha  17, 3b-10

Upe ramo Ñandejára Jesucristo he’i:

Nde rapicha heko vai ramo, emongavaju ichupe. Oheja ramo heko vaikue katu, eheja rei ichupe. Ta hembiapo vai jepe ra’e nde rehe 7 jevy peteï árape. Ha 7 jevy oho ramo he’i ndéve reheja rei haguã ichupe, reheja rei va’erã. 

Umi apóstol ojerure Tupä Ñandejárape: 

Eme’ẽve oréve pe jerovia. 

Ñandejára he’i ichupe kuéra: 

Pende jerovia michĩ ramo jepe oimeraẽ mba’e ra’ỹi michĩve vaicha, pejéta peteï yvyra mátape: “Ejehapo’o upégui ha eñemohenda yguasúpe”. ha ojapóne pejéva. 

“Pe oguerekóva hembiguái oguahẽva oyvyjokahágui ha oñangarekohágui hymba kuéra rehe, he’i nga’úpa ichupe: ‘Ehasa ha eguapy ekaru?’ Ahaniri, he’i katu ichupe: Ejapo chéve che karurã, ha eñemoĩ eñangareko che rehe che akaru ha amboy’u aja. Upéi nde ikatúne rekaru ha remboy’u.’ Ha upéi ave, ndojeaguyjeme’ẽi upe tembiguáipe ojapo hague rehe umi he’i va’ekue ichupe. Péicha avei peë, ágã pejapopávo umi Tupä Ñandejára he’i va’ekue peëme, peje va’erã: ‘Ore tembiguái ipituáva, rojapónte rojapo va’erã”. 

Ñandejára Jesucrísto  Ñe’ẽ.