LECTURAS DEL DOMINGO 8 DE AGOSTO

LECTURAS DEL DOMINGO 8 DE AGOSTO

Primera Lectura 

Ko’ágä ñahendúta Tupä Ñandejára ñe’ẽ Sabiduría arandukápe oĩháicha   

                                                                        9, 13-18

Máva piko ikatu oikuaa mba’épa ojapo TupäÑandejára, térã oimo’ã mba’e mba’épa oipota? 

Yvypóra remiandu niko, ndaha’epái jeroviaha, ha na’añetepái. 

Ñande rete ituju va’erãva ñane ángape ipohýi, ha ojopy ñane apytu’ũ hepy’apy opaichaguápe. 

Hasy jaikuaa haguã opa yvy ári oĩva, ha pe ikatúva jahupity hasýpe ñamoesakã, ha oimépa ohecha va’ekue mba’épa yvágape oĩ? 

Máva nga’úpa oikuaáta ne rembipota, nde voi nereme’ẽi rire, pe arandu ha rembou pe yvatégui ne espíritu marangatu? 

Péicha rupi naikarẽvéi yvypóra rape ha upéicha ha’e oikuaa ne rembipota, ha arandu rehe ae osẽ jejopy vaígui. 

Tupä Ñandejára Ñe’ẽ.

SALMO ÑEMBOHOVÁI                                        89, 3-6. 12-14. 17

R.Tupä Ñandejára, nde hína upe ore mo’ãva.

Nde upe yvypóragui rejapóva oiko haguã ichugui yvy 

ichupe kuéra erévo: “Ta peho  jevy yvýpe pepa”.

Mil áño niko ndéve guarã ku ára ohasa va’ekuéicha, 

opa jevýmava, térã ku pyhare mbykýicha, pya’e ohasáva. R.

Ku jake ramo guáicha sapy’a ite  reraha ichupe kuéra, 

ku ñana heñói vaicha, ko’ẽvove. 

Pyhare heñói ha ipoty, 

ka’aru haviru ha ipiru. R.

Ehechauka oréve ore rekove mbykyha 

ikatu haguã ore akã guapy. 

Ore Jára, eju ore rendápe! Araka’e peve piko reñeha’arõukáta? 

Ore poriahuverekóna ore niko ne rembiguái hína. R.

Ára ko’ẽrehe ore moenyhẽne mborayhúgui 

ikatu haguã ore py’a rory roikove aja pukukue. 

Tupä Ñandejára imba’e porãva 

ta ñande rovasa ha ta ñane pytyvõ 

ñasẽporã haguã opa mba’épe. R.

Segunda Lectura

Ñahendúta Tupä Ñandejára Ñe’ẽSan Pablo ohai va’ekue Filemonpe.      

                                  9b-10. 12-17

Che pehengue kuéra:

Che, Pablo, che tujámava, ha ko’ágã aiméva hína yvyrakuápe Cristo rehehápe, ajerure ndéve ejapomi techapyrä che ra’y Onésimo rehe, añeñandúgui itúva ramo, ñande jeroviápe, ko yvyrakuápe.

Amondo jevy ndéve, ha’e niko che ra’y ahayhúva. Che niko aipota va’erã mo’ã opyta ko’ápe che ndive, che pytyvõ haguã nde rangue, aime aja yvyrakuápe, Cristo marandu rehehápe. Ha niko ndajaposéi mba’eve nde remoneĩmboyve, ikatu haguãche pytyvõ, nda ha’éi che pytyvõva’erãgui, che pytyvõséguinte. Ikatu niko oime Onésimo ojei nde hegui ra’e sapy’ami, rereko haguã ichupe upe rire opa ára guarã, ndaha’e véima tembiguáicha, iporãvéva tembiguáiguima katu, peteï ne pehẽngue rehayhúvaicha. Che ahayhu eterei ichupe. Ha nde, rehayhuve va’erã katu ichupe, ha nda ha’éi yvypóraicha añónte. Ne pehẽngue Ñandejára reheguáva ramo katu avei. 

Aipo ramo, che rereko ramo ne pehẽngue ramo Cristo reroviaha reheguáva ramo, emoguahẽichupe, che moguahẽva ramo guáicha chéve voi.

Tupä Ñandejára Ñe’ẽ. 

ALELUIA                                                                 Sal 118, 135

Aleluia.

Ehecha kuaa kena chéve, 

ha ehechauka chéve ne rembipota.

Aleluia.

EVANGELIO

Ko’ágä ñahendúta Ñandejára Jesucrísto  rekove ha hemimbo’e San Lucas omombe’u háicha. 

Pejapysaka porãtapa hese?                                                    14, 25-33

Upe ramo heta tapicha oho Jesús rapykuéri, ha ha’e ojere he’i ichupe kuéra: “Oime ramo oúva che ndive, ha ohayhuve che hegui itúvape, isy, hembireko, ita’ýra kuéra, ityke’ýra ha ityvýra kuéra, heindy kuérape, ha ijupe voi, ndaikatu mo’ãi oiko che remimbo’e ramo.Ha pe ohupi’ỹva ikurusu ijape rehe che moirũhaguã, upéva ndaikatúi oiko che remimbo’érõ. Peteïva peë ojapose ramopeteï óga yvate, ndoguapy raẽi nga’úpa ohecha mbovýpa ohupytýta ichupe, ohecha haguã oguerekótapa ojapopa haguã? Upeicha’ỹramo, omoĩramo hopytarãnte ha upéi naikatúi ojapopa, ohecháva guive oñepyrũne oñembohory hese. He’íne hikuái: ‘Ko kuimba’e oñepyrũhóga ha ndaikatúi ojapopa.’Térãpeteï mburuvicha guasu ohóta ramo oñorairõambue mburuvicha guasu ndive, ndoguapýi nga’úpa ohecha 10.000 ñorairõhára  rehevépa ikatúne ombohovái pe hi’ári oúvape 20.000 reheve? Ha ndaikatu mo’ãi ramo ombohovái ichupe, pe ambue mburuvicha guasu oĩvo gueteri mombyry, omondóne hendápe hembijokuái ojerurévo oñorairõ’ỹhaguã. Aipo ramo, oimeraẽva peë ndohejapáiva opa oguerekóva, ndaikatúi oiko che remimbo’e ramo”. 

Ñandejára Jesucrísto  Ñe’ẽ.