LECTURAS DEL DOMINGO II DE CUARESMA

LECTURAS DEL DOMINGO II DE CUARESMA

PRIMERA LECTURA

Ko’ágã ñahendúta Tupã Ñandejára ñe’ẽ Génesis arandukápe oĩ háicha 15, 5-12. 17-18

Upérõ Tupã he’i Abram pe osẽ haguã okápe ha oñe’ẽ ichupe kóicha: Ema’ẽ yvága rehe ha eñeha’ã eipapa mbyjaita, jahecha ikatúpa. Péicha hetáta ne ñemoñare.

Abram oguerovia Tupãme, ha upe guive Tupã oguereko ichupe imarangatúva ramo, ha he’i ichupe: Che hína nde Jára, romoirũ va’ekue táva Ur, caldeo retãgui, ko’ã peve, ame’ẽ haguã ndéve ko yvy ne mba’erã.

Abram oporandu ichupe: ¿Tupã che Jára, mba’éicha piko aikuaáta che mba’erãha?

Tupã he’i ichupe: Eru chéve ko’ápe peteï vakílla, peteï kavara kuña ha peteĩ ovecha mácho; opavave to guereko 3 áño; peteĩ jeruti ha peteĩ pykasu ra’y avei.

Abram ogueru umi mymba, omboja’o mbytépe ha omoĩ ojovái. Guyrakuéra katu nomboja’ói. Yryvukuéra oguejy mante umi mymba re’õnguére, ha Abram omondýi. Kuarahy oike potaite jave Abram opyta oke ha ojaho’i ichupe peteĩ pytũ ha kyhyje nde tuicháva.

Kuarahy oike ha pytũmba riréma, ojehecha peteĩ tatakua hatatĩmbáva. Ha peteĩ tata rendy ohasa sapy’a umi tymba ñemboja’o pyre pa’ũ rupi. Upérõ Ñandejára oñe’ẽ me’ẽ Abrámpe: Ne ñemoñarépe ame’ẽta ko yvy, ysyry Egipto guive, ysyry guasu Éufrates peve.

Tupã Ñandejára Ñe’ẽ

Opavave: Romomba’e guasu ndéve, Ñandejára.

SALMO ÑEMBOHOVÁI 26. 1. 7-9. 13-14
Opavave: Tupã upe che rekove ohesapéva ha che salváva.
Tupä upe che rekove ohesapéva, ha upe che salváva.

Mávagui piko akyhyjéta?
Tupã oñangareko che rehe,
Máva piko che mongyhyjéta? O.

Ndéve niko añembo’e Tupã,
che poriahuverekokena ha che rendu.
Che py’apýpe aikuaa ereha: “Peju che rendápe”. O.

Ne rendápe aguahẽ Tupã, ani reñemomombyry che hegui.
Ani nde pochy che ndive, nde añónte niko upe che pytyvõva.
Ani che reja reítei, nde niko che Jára ha jejopy vaígui che pe’áva. O.

Aikuaa Tupã imba’e porãtaha che ndive aikove aja pukukue.
Pejerovia Ñandejára rehe, pende py’a guasúke ha ani pene ate’ỹ.
Añetehápe ha’e peëme, pejerovia Tupã rehe. O.

LECTURA MOKÕIHA:
Ñahendúta Tupã Ñandejára Ñe’ẽ San Pablo ohai va’ekue Filipos guápe 3, 17 _4, 1

Che pehenguekuéra: Peikokena che aiko háicha ha pema’ẽ avei umi oikóva rehe ore rohechauka haguéicha peẽme. Ha’e haguéicha peëme heta jevy, ha ko’ágã ha’e che resay che rova rehe, heta oĩ oikóva ija’e’ỹ ramo guáicha Cristo kurusu rehe, ha umíva ipahápe oñehundíta.

Itupãnguéra hembipotánte, ha ojererovu umi mba’e oguerotĩ va’erã mo’ã rehe. Umi mba’e yvy ariguánte oheka. Ñande katu yvága ñane retã, ha ñaha’arõ upégui outaha ñande pe’ávo ivaívagui Ñandejára Jesucristo, omoambue haguã
ñande rete poriahu ojapóvo ichugui tete omimbipáva hete teéicha. Ha ojapóta, ipokatúgui omoĩ haguã ipo guýpe opa mba’e.

Upéva rehe, che pehẽnguekuéra pohayhuetéva ha pohechasetéva, peẽ che mbovy’aha ha jopóivaicha che rekovépe guarã, pepyta hatãkena Ñandejára ndive.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ACLAMACIÓN MT 17, 5
Pe araígui oñehendu peteĩ ñe’ẽ he’íva: Kóva hína che Ra’y ahayhu etéva,
che aiporavo va’ekue. Pehendu ichupe.

EVANGELIO
Marandu porã Ñandejára Jesucristo rekove ha hemimbo’e San Lucas omombe’u háicha 9, 28b-36

Opavave: Romomba’e guasu ndéve, Ñandejára.

Uperõ Jesús ogueraha Pedro, Santiago ha Juánpe peteĩ sérro ru’ãme oñembo’e haguã. Ha oñembo’e aja hína, Jesús rova iñambue ha ijao katu ojajái ha morotĩ sakã. Ha peichaháguinte katu, ojekuaa sapy’a Moisés ha Elías oñomongetáva hína Jesús ndive, ha pe ijere katu omimbipa.

Ha oñe’ẽ hikuái Jesús ndive, ijeho rehe Jerusalénpe ojehekýi haguã upépe. Ha hopehýi eterei ramo jepe, Pedro ha iñirũnguéra ndokéi. Ohecha hikuái mba’éichapa Jesús rete omimbipa ha umi mokõi oĩva hendive ave.

Moisés ha Elías ohótamavo, Pedro he’i Jesúspe:— Mbo’ehára, ajépa iporãite ikatúre roime ápe. Reipotárõ, na torojapo peẽme rrancho’imimi pene rendaguã. Peteĩ ne mba’erã, peteĩ Moiséspe guarã ha Elíaspe guarã avei.

Pedro katu he’ínte pe he’íva, ndoikuaáigui rei mba’épa he’íta. Ha Pedro oñe’ẽ jave gueteri hína, ohasa sapy’a peteĩ arai omo’ãmbáva chupe kuéra. Tuicha oñemondýi hikuái. Pe araígui katu oñehendu oñe’ẽva ha he’íva: “Kóva hína che Ra’y, che aiporavo vaekue. Pejapo upe ha’e he’íva peẽme.”

Ohendupávo upe oñe’ẽvape, Pedro, Juan ha Santiago ohecha Jesús ha’eñóntema oĩha. Ha are oguerokirirĩ hikuái pe ohecha vaekue, omombe’u’ỹre avavépe.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesukrísto.