LECTURAS DEL JUEVES 20 FEBRERO

LECTURAS DEL JUEVES 20 DE FEBRERO

PRIMERA LECTURA:

Ñahendúta Tupã Ñandejára Ñe’ẽ Santiago ohai va’ekue                                   2, 1-9

Che pehẽngue kuéra: Peẽ pejeroviáva Ñandejára Jesucristo heko mimbipávare, naiporãi peporo mbojerovia joavy. Oike ramo pende tupaópe peteĩ ikuãirũ órova ha oñemonde porãva, ha upe jave oike avei peteĩ mboriahu ijao soropáva, ha perohoryvérõ upe oñemonde porãvape ha peje ichupe: “Eguapy ko iporãvehápe”, imboriahúvape katu peje: “Nde eñembo’y upépe”, térã: “Eguapy upe rupi”, peño mbojerovia joavýma hína peẽ voi, ha pe poro’apo hekope’ỹ.

Che pehẽngue  kuéra pohayhúva, pehendu kóva: Tupã Ñandejára oiporavo va’ekue yvy arigua mboriahúpe, imba’e reko haguã ijeroviápe, ha ohupity haguã pe isãmbyhy ha’e he’i va’ekue ome’ẽtaha umi ichupe ohayhúvape. Peẽ katu ndapejapói mba’evérõ imboriahúvape. Ndaha’éi nga’u piko mba’e reta rekoha umi pene momba’apo reíva, ha pende reraháva mburuvicha kuéra renondépe? Ndaha’e kuérai nga’u piko umi oñe’ẽ vaíva Jesucrístore, peẽ pejeroviaha?

Pejapóta iporãva pejapo ramo añetehápe upe tembiapoukapy tuichavéva, he’íva Tupä Ñandejára Ñe’ẽ: “Ehayhu nde rapichápe, rejehayhu háicha nde.” Pembojerovia joavy ramo pende rapicha kuérape katu, pene angaipa Tupã Ñandejára rembiapoukapy renondépe.

Tupã Ñandejára Ñe’ẽ.

SALMO ÑEMBOHOVÁI                          33, 2-7

R. Ñandejárape añembo’e, Ha’e, che rendu ha che pe’a jejopy vaígui.

Amomba’e guasúta opa ára Tupä Ñandejárape,

ichupe aropurahéita tapiaite.

Tupä Ñandejára ombovy’a che rekove. Imboriahúva tohendu ha tovy’a! R.

Oñondive ñamomba’e guasu Tupä Ñandejárape, héra jaropurahéi oñondivepa.

Tupä Ñandejárape añembo’e, ha’e che rendu, ha oipe’apa che hegui umi mba’e che mongyhyjéva. R.

Umi Tupä Ñandejára rehe ojeroviáva vy’águi ojajaipáne, ha hova noñomi chéne ñemotĩgui.

Che, tekove poriahu, Tupä Ñandejárape añembo’e. Ha’e, che rendu ha che pe’a jejopy vaígui. R.

ALELUIA        Cf. Jn 6, 63c. 68c

Aleluia.

Tupä Ñandejára ne Ñe’ë hína Añete ha Tekove;

Nde ereko ñe’ë orekóva Tekove opa ára guarä.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Marcos omombe’u háicha. Pejapysaka porãtapa hese?                                                       8, 27-33

Upe ramo Jesús ha hemimbo’ekuéra oho táva Cesarea Filípope. Tapére Jesús oporandu hemimbo’e kuérape: Mavaha che piko oje’e?

Ha’ekuéra he’i ichupe: Oĩ he’íva ndeha Juan Bautista, oĩ he’íva ndeha Elías ha oĩ he’íva ndeha umi maranduhára peteĩva. Jesús oporandu ichupe kuéra: Ha peẽ piko mba’e peje, mávapa che?

Pedro he’i ichupe: Nde hína upe Mesías.

Jesús katu he’i hemimbo’e kuérape ani haguã he’i hese mba’eve avavépe.

Jesús oñepyrũ ombo’e ichupe kuéra. He’i ha’e, yvypóraicha ou va’ekue, heta ohasa asytaha, ha ndoikuaase mo’ãiha ichugui  mba’eve moakãhára  kuéra, pa’i ruvicha kuéra ha umi Moisés rembiapoukapy mbo’eha. He’i ichupe kuéra ha’e ojejukataha ha oikove jevytaha mbohapy ára haguépe. Kóva ha’e omomarandu porã ichupe kuéra. Upépe Pedro ogueraha ichupe ha’eñoháme, ha he’i ichupe anive haguã péicha oñe’ẽ. Jesús katu oñembojere, oma’ẽ hemimbo’ekuérare ha oja’o Pédrope he’ívo ichupe: Ejei che ypýgui, Satana! Nde niko yvypóraicha reñandu ko’ã mba’e, ndaha’éi Tupã oñanduka háicha.

Ñandejára Jesucristo Ñe’ẽ