LECTURAS DEL JUEVES 31 DE OCTUBRE

LECTURAS DEL JUEVES 31 DE OCTUBRE

Primera lectura:

Ñahendúta Tupã Ñandejára Ñe’ẽ San Pablo ohai va’ekue Roma guápe

                                                                              8, 31b-39

Che pehẽnguekuéra:

Mba’épa ikatuve ja’e? Tupã Ñandejára oĩ ramo ñane ndive, piko máva oñemoĩta ñande rehe? Tupã Ñandejára ome’ẽ rire ñandéve Ta’ýra tee jepe, ha oheja katu omano ñande rehe, mba’éicha piko nome’ẽ mo’ãi ñandéve, Ita’ýra ndive, opa mba’e? Oiméta piko oñe’ẽ vaíva umi Tupã Ñandejára oiporavo va’ekuére? Tupã Ñandejára niko pe omboheko jojáva ichupe kuéra. Mávapa ikatúne omboja hese kuéra angaipa? Avave. Jesucristo niko pe omano va’ekue. Ha oimeve katu, ha’e niko pe oikove jevy va’ekue  ha oime ko’ágä  Tupã Ñandejára akatúape, oñembo’e hína ñande rehe. Máva piko ikatúta ñande pe’a Jesucristo mborayhúgui? Jehasa asy piko, mba’e mbyasy, ñemuña, ñembyahýi, opívo térã ñemano vai piko? He’i háicha Ñandejára ñe’ẽ: “Nde rehehápe opa ára roĩ rojejuka haguãicha.

Rojerereko ovecháicha, ojereraháva ojejukávo.”

Opa ko’ã mba’épe katu ñasẽ porã upe ñande rayhu va’ekue  rupi. Arovia che py’a ite guive mba’eve na ñande pe’a mo’ãiha Tupã Ñandejára mborayhúgui: ñemano, jeikove, Tupã Ñandejára remimbou kuéra, mba’eveichagua pokatu ha pu’aka, ko’ágä gua térã oú va’erãva, pu’aka yvategua ha yvy pegua, mba’eve Tupã Ñandejára rembiapokuéva. Mba’eve ndaikatu mo’ãi ñande pe’a pe mborayhu Tupã Ñandejára ohechauka va’ekuégui ñandéve, Ñandejára Cristo Jesús rupi.

Tupã Ñandejára Ñe’ẽ.

SALMO ÑEMBOHOVÁI 108, 21-22. 26-27. 30-31

R. Tupä Ñandejára che renohë jejopy vaígui.

Nde katu Tupã che Jára, nde rérape ehecha kuaa chéve.

Nde py’a porãgui ha che poriahuverekógui,

 che renohẽ jejopy vaígui.

Che mboriahu niko ha aiko asy, añandu che py’a karãiva. R.

Tupã che Jára, che pytyvõ kena.

Nde che rayhúgui che renohẽ jejopy vaígui.

Toikuaa hikuái nde po oĩha ko’ã mba’épe,

ndeha, ore Jára, upe rejapóva ko’ã mba’e. R.

Sapukái sorópe amomba’e guasúta Tupä Ñandejárape,

maymáva apytépe ichupe aropurahéita.

Ha’éko oñemoĩ imboriahúva ykére

ani haguã ojuka ichupe umi oñemoĩva hese. R.

ALELUIA Cf. Lc 19, 38; 2. 14

Aleluia.

¡Jehovasapyre Mburuvicha guasu oúva Tupä Ñandejára rérape! ¡Py’aguapy yvágape ha terakuä porä amo yvate!.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                                                                 

13. 31-35

Upe ramo oguahẽ umi fariséo ha he’i Jesúspe: Tereho ko’águi, Herodes nde jukaukase.

Ha’e he’i ichupekuéra: Ta peho ha peje pe aguarápe: ‘Ma’ẽ, ko ára ha ko’ẽrõ amosẽ aikóvo mba’epochy kuérape ha amonguera hasývape, ha ko’ẽ ambuérõ ae ajapopáta. Aha mante va’erã che rapére ko ára, ko’ẽrõ ha upe rire. Maranduhára niko ndaikatúi omanóvo mombyry Jerusaléngui.

“Jerusalén, Jerusalén, rejukáva maranduhára kuéra ha rejapíva itápe umi ñe’ë  reruha Tupã Ñandejára omboúva ndéve! Heta itéma niko amboatyse va’ekue  ne memby kuéra, ryguasu omboaty háicha ita’ýra ipepoguýpe, ha nde reipotái! Upévare, nde róga opytáta nandi ha itaperéta. Ha ha’e ndéve nda che recha mo’ã veimaha, oguahẽ peve ára erévo: ‘To jehovasa pe oúva Ñandejára rérape!’”

Ñandejára Jesucristo Ñe’ẽ.