LECTURAS DEL LUNES 2 DE SEPTIEMBRE

LECTURAS DEL LUNES 2 DE SEPTIEMBRE 

Primera Lectura 

Ñahendúta Tupã Ñandejára Ñe’ẽSan Pablo ohai va’ekue Tesalónica guápe                       

4, 13-18

Ore pehẽngue, ndoroipotái pepyta peikuaa’ỹre mba’épa oiko umi omanóvagui, ani haguã pejepy’apy umi ambue oha’arõ’ỹva mba’evéicha. Roguerovia háicha Jesús omano ha oikove jevy hague, upéicha avei roguerovia, Jesús ndive Tupã Ñandejára omoingovepa jevytaha umi heroviaha omano va’ekuépe. 

Upévare ro’e peẽme, Ñandejára Jesucristo ombo’e va’ekue ramo guáicha, japytáva guive jaikove ou peve Ñandejára Jesucristo, na ñane tenonde mo’ãi umi omano va’ekuére. Oñehendúta peteĩñe’ẽhatã, peteẽArcángel ñe’ẽha Tupã turupu, ha Ñandejara ite voi oguejýta yvágagui. Ha umi omano va’ekue ogueroviáva Crístope, umíva raẽte oikove jevýta; upéi, umi jaikovéva gueteri, jajereraháne hendive kuéra araíre, jajojuhu haguã Ñandejára Jesucristo ndive amo yvate, ha upéicha ñaiméta Ñandejára Jesucristo ndive opa ára guarã. Peñomoakã rakúke aipórõ ko’ãva ko’ã ñe’ẽme. 

Tupã Ñandejára Ñe’ẽ.

SALMO ÑEMBOHOVÁI              95, 1. 3-5. 11-13

R.Tekojojápe Tupä Ñandejára oisãmbyhýta ko yvy

Peropurahéi Tupä Ñandejárape purahéi pyahu. 

To purahéi Tupä Ñandejárape opa ko yvy. 

Pemoerakuä héra opa ite tetä rupi

ha umi imba’e porä ngue hetäguápe. R.

Tupä Ñandejára tuicha hína, ichupe ñamomba’e guasu va’erã, 

ichugui  jakyhyjeve va’erã opa tupãgui. 

Umi tetã nguéra oguerekóva tupã ramo, umíva ta’ãnga reínte. 

Tupä Ñandejára katu yvága apohare hína. R.

To vy’a yvága ha yvy. 

To sununu pe yguasu ha opa ipype oĩva. 

To vy’a umi ñu ha opa mba’e ipype oĩva. 

Vy’águi to sapukái umi yvyra ka’aguy pegua. R.

To jepurahéi Tupä Ñandejára renondépe, 

ha’e ou ko yvy oisãmbyhy haguã. 

Tekojojápe ko yvy oisãmbyhýta, 

ha añetépe tetã nguéra. R.

ALELUIA

Lc 4, 18

Aleluia. 

Tupä Ñandejára Espíritu oï che ári;

ha’e che mbou amoerakuä haguä Marandu porä umi imboriahúvape. 

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?          

                                   4, 16-30

Upe ramo Jesús oho Nazarétpe, táva ha’e okakuaa hague. Pytu’uha ára jave oike upe judío kuéra tupaópe, ojapo tapia háicha, ha oñembo’y omoñe’ẽhaguã Ñandejára ñe’ẽ. Ome’ẽichupe hikuái omoñe’ẽhaguã maranduhára Isaías kuatia. Ha oipekávo ojuhu péicha he’ihápe: 

Ñandejára Espíritu oĩche ári, chéve niko che poravo araha haguã marandu porã opa imboriahúvape, che mbou aipe’ávo jejopýgui umi ijyvyrakuávape ha ame’ẽvo techa ohecha’ỹvape; apoívo opa ojejopývagui, amoerakuãvo áño Tupä Ñandejára hetã guápe oipysyrõta.

Upéi, Jesús omboty pe kuatia, ome’ẽpe oñeñemboatyha pytyvõháme ha oguapy. Opavave oĩva upépe ojesa reko hese. Ha’e oñepyrũoñe’ẽha he’i: 

Ko árape voi oiko pe Tupä Ñandejára Ñe’ë  pehendúva ko’ágä . 

Opavave oñe’ẽporã Jesús rehe ha oguerohory umi mba’e porã he’íva. Oporandu joa hikuái ojupe kuéra: Ndaha’éi piko kóva José ra’y? 

Jesús he’i ichupe kuéra: Oiméne peẽpejéta chéve hína ko Ñe’ënga: “Pohãnohára: eñemonguera nde voi”. Ha upéi ave pejéne chéve: “Umi rohendu va’ekue  rejapo hague Cafarnaúmpe, ejapo avei ko’ápe, nde yvy teépe”. 

Ha he’ive ohóvo: Añetehápe ha’e peẽme ndaiporiha maranduhára ojererohorýva ijyvy teépe. Añetehápe niko, heta va’ekue  kuña imenave’ỹva Israélpe, maranduhára Elías oikoveha árape, ndokyvéi ramo guare mbohapy áño rasa rupi ha tuicha ñembyahýi tetã tuichakue. Ha Elías noñemondói va’ekue  mavavéva umi kuña imenave’ỹva Israelgua rendápe. 

Ha oñemondo peteĩkuña Sareptagua rendápe, táva Sidón ypýpe. Oĩva’ekue  avei Israélpe heta hasýva ai pochýgui, maranduhára Eliseo oikoveha árape, ha mavavéva noñemonguerái, Naamán, Siria guápe año ite. 

Ohendúvo upéva, umi oĩva’ekue  upe judío kuéra tupaópe ipochy joa. Opu’ã ha omosẽhikuái Jesúspe upe távagui, ogueraha ichupe yvate pe yvyty itáva kuéra opu’ãha ru’ãme, upe guive oity haguã ichupe yvýpe. Jesús katu ohasa ipa’ũrupi kuéra ha oho. 

Ñandejára Jesucristo Ñe’ẽ