LECTURAS DEL LUNES I DE CUARESMA

LECTURAS DEL LUNES I DE CUARESMA

PRIMERA LECTURA:

Ko’ágä   ñahendúta Tupã Ñandejára ñe’ẽ Levítico arandukápe oĩ háicha       19, 1-2. 11-18

Tupä Ñandejára he’i Moiséspe: Ere Israel guápe ko’ã mba’e ha’eukáva ichupekuéra: Ta pende reko marã’ỹ. Che hína opa mba’e Jára ha che reko marã’ỹ.

Ani pemonda. Ani pende japu térã peñombotavy.

Ani peme’ẽ pene ñe’ẽ che rérape japu reheve, péicha pemomarã peína che réra. Che hína pende Jára. Ani rejopy nde rapicha ndive térã reipe’a imba’éva. Ani reheja ko’ẽrõ guarã jehepy me’ẽ hembiapo kuére. Ani reñe’ẽ vai ohendu’ỹvare.

Ani remoñepysãnga ohecha’ỹvape. Ehechauka rejapoha che rembipota. Che hína pende Jára. Ta pende reko joja peporo mbojovake ramo. Ani pembojeroviave imboriahúvape térã pekyhyje imba’e rereko hetávagui.

Ani pemosarambi japu pene retã guáre. Ha ani peñemoĩ peteĩ ñe’ẽme pende rapichápe ojukáva ndive. Che hína pende Jára.

Ani pende py’aro pende rapicha ndive, ha oimérõ ojavy, peje ichupe upéva, ani oja pende rehe iñangaipa.

Ani pejapo ivaíva pene retãgua rehe ojapo va’ekue ivaíva pende rehe, térã pende py’aro hendive. Pehayhu pende rapichápe pende jupéicha. Che hína pende Jára.

Tupã Ñandejára Ñe’ẽ.

SALMO ÑEMBOHOVÁI     18, 8-10. 15

R. Tupã Ñandejára rembiapoukapy ndaijojahái.

Tupã Ñandejára rembiapoukapy

ndaijojahái, ñane mbopy’a rory.

Tupã Ñandejára rembiapoukapy ijeroviaha, omoarandu oikuaa’ỹvape. R.

Tupã Ñandejára rembiapoukapy oĩ hekoitépe, ñane mbovy’a.

Tupã Ñandejára rembiapoukapy hesakã, ñande resape’a.

Tupã Ñandejára Ñe’ẽ naimeguãi ha ndahekoviái. R.

Tupã rembiapoukapy ijeroviaha, opavave oĩ hekoitépe.

Toguahẽ porã ite ne rendápe, ñe’ẽ osẽva che jurúgui

ha arekóva che py’a pýpe, che Jára che mo’ã ha che renohẽva jejopy vaígui. R.

Nga’u ta nembohory ñe’ënguéra osëva che jurúgui,

ha to guahë ne rendapete umi aimo’äva,

Tupä che Jára, che pyenda ha che pysyröha. R.

VERSÍCULO ANTES DEL EVANGELIO 2 Cor 6, 2b

Kóva ko ára iporäveha,

kóva pysyröha ára.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?                                                       25, 31-46

Upe ramo Jesús he’i hemimbo’ekuérape: Che, yvypóraicha aju va’ekue, ajuha árape mburuvicha guasúicha umi Tupã remimbou kuéra ndive, ajúta aguapy che guapyha jeguápe.

Ha opa tetãgua nguéra oñemboatypáta che renondépe, ha che aipe’áta ojuehegui, ku ovecha rerekua oipe’a háicha ijovecha ha ikavara kuéra ojuehegui. Amoĩta umi ovecha che akatúa gotyo ha umi kavara katu che asu gotyo. Upépe che ha’éta umi che akatúa gotyo guápe: “Peju, peẽ che Túva pende rovasa va’ekue. Peju ha peñemomba’e Tupã sãmbyhýre ha’e voi ojapo va’ekue iñepyrũmbýpe peẽ guarã. Che ñembyahýi ramo guare, peẽ che mongaru va’ekue.

Che yuhéi ramo, peẽ che mboy’u va’ekue. Ha aiko ramo mombyrygua ramo, peẽ che moguahẽ va’ekue pende rógape. Che opívo ramo, peẽ che monde va’ekue. Che rasy ramo, peẽ che andu va’ekue. Ha añemyakãsã ramo, peẽ peju va’ekue che rendápe.”

Upépe umi heko potĩva he’íne: “Ore Jára, araka’e piko ndéve rohecha ne ñembyahýi ramo ha romongaru? Araka’e piko rohecha nde yuhéi ha romboy’u? Araka’e piko ndéve rohecha mombyrygua ramo, ha romoguahẽ ore rógape? Araka’e piko nde opívo ha romonde? Araka’e piko ndéve rohecha nde rasy ramo, térã reñemoakãsã ha roho roñandúvo?”

Ha che ha’éta ichupekuéra: “Añetehápe ha’e peẽme, pejapóva peteĩva ko’ã che ryvykuéra michĩvévare, che rehe pejapo ramo guáicha.” Upéi katu che ha’éta umi che asu gotyo guápe: “Pejei che ypýgui, pende rehe Tupã Ñandejára ojahéima. Tapeho pe tata ogue’ỹvape oñembosako’i va’ekue Aña ha iñirũ nguérape guarã.

Che ñembyahýi ramo guare, peẽ na che mongarúi va’ekue. Che yuhéi ramo, na che mboy’úi va’ekue. Aiko ramo mombyryguáva ramo, na che moguahẽi va’ekue pende rógape. Che opívo ramo, na che mondéi va’ekue. Che rasy ramo ha aime añemoakãsãhápe, ndache andúi va’ekue.”

Upépe ha’e kuéra he’íta chéve: “Ore Jára, araka’e piko ore rohecha ne ñembyahýi ramo, térã nde yuhéi, térã mombyrygua reiko ramo, térã nde opívo, térã nde rasy, térã reñemyakãsãhápe, ha ndéve noroipytyvõi?” Ha che ha’éta ichupe kuéra: “Añetehápe ha’e peẽme, opa mba’e ndapejapói va’ekue peteĩva umi michĩvévare, che rehe ndapejapói ramo guáicha.” Ha ko’ãva ohóta ñenupã opa’ÿháme, ha umi heko potĩva katu tekove opa’ỹháme.

Ñandejára Jesucristo Ñe’ẽ.