LECTURAS DOMINGO I DE CUARESMA

LECTURAS DOMINGO I DE CUARESMA

LECTURA PETEÎHA:

Lectura peteîha Gn 2, 7-9; 3, 1-7

Ko’ágã ñahendúta Tupã Ñandejára ñe’ẽ Génesis arandukápe oĩ háicha

Upérõ Ñandejára ojapo ñai’ũgui kuimba’e ha oipeju itĩnguápe ipytu oporomoingovéva. Ha upe kuimba’e oñepyrũ oikove. Upéi Ñandejára oñotỹ peteĩ yvaty Edénpe, opytáva Israélgui kuarahy resẽ gotyo. Ha upépe omoĩ upe kuimba’e ha’e ojapo va’ekuépe.

Omoheñói upépe opaichagua yva neporãva ha hi’a héva, ha omoĩ upe yvyraty mbytépe yva oporomoingovéva ha ambue oporohesape’áva iporã ha ivaíva rehe.

Mbói va’ekue, opa tymba ñumegua Ñandejára ojapo va’ekuégui, upe oporombotavy kuaavéva. Ha’e he’i kuñáme: Añete piko Ñandejára he’i peẽme ani haguã pe’u mba’evéichagua yva ko’a pegua.

Kuña he’i ichupe: Ikatu ro’u yva ko’a pegua upe yva oĩva mbytépente ndaikatúi ro’u.

Ñandejára he’i oréve ani haguã ro’u ichugui térã ropokónte jepe hese. Ro’u ramo romanóta.
Mbói he’i ichupe: He’i reíko peẽme. Napemano mo’ãi. Ñandejára oikuaa porã, pe’u ramo upe yva pejesape’ataha ha peikuaáta iporãva ha ivaíva. Ha peẽta Tupãicha.

Kuña oma’ẽvo upe yva iporãitéva rehe, ojuhu iporã ho’u ha oikuaa haguã opa mba’e. Upéma ramo oipo’o hi’a ha ho’u. Upéi ome’ẽ iménape ha ha’e avei ho’u. Ho’upa vovénte ojesape’a hikuái ha ojecha opívo. Upéva rehe ojapo hikuái oñemo’ã haguã yvyra roguégui.

Tupã Ñandejára Ñe’ẽ.
O: Romomba’e guasu ndéve, Ñandejára.

Salmo Ñembohovái 50, 3-6a. 12-14. 17
O.: Tupã, eipe’a che árigui che rembiapo vaikue.

Ñandejára, che poriahuvereko, nde niko ne mba’e porã.
Che poriahuvereko ha eipe’a
che árigui che rembiapo vaikue.
Che johéi porã teko vaígui,
che mopotĩ che angaipágui. O.

Ahechakuaa niko ajavyha,
ha mba’e vaígui ndaikatúi apoi.
Nde rehe añónte ajapo ivaíva,
ha hendape’ỹva nde rovake ajapo. O.

Ñandejára, embopyahu che py’a ta imarane’ỹ, ha ta imbarete che pype nde pytu marangatu. Anítei che mosẽ ne renondégui, térã reipe’a che hegui nde pytu marangatu. O.

Embopyahu jevy chéve vy’a
jejopy vaihágui che renohẽvo,
ha nde pu’aka marangatu ta che mombarete. Ñandejára, che juru eipe’a ha ndéve
rogueropurahéine. O.

Lectura Mokõiha Rom 5, 12.19
Ñahendúta Tupã Ñandejára Ñe’ẽ San Pablo ohai va’ekue Roma guápe

Che pehenguekuéra: Peteĩ kuimba’e año rupi, niko oike pe angaipa apo ko yvy ári. Ha upe angaipa apo rape rupi, oike pe mano. Ha upéicha, mano ohasa opavavépe, opavave iñangaipa rupi.

Ñemano oike peteĩva rembiapo vaikue año rupi. Ha tuichave mba’e pe peteĩ, Ñandejára Jesucrísto, ojapo va’ekue.
Opa umi ohupity va’ekue Ñandejára mba’e porãngue reiete, umíva ohupitýta jeikove opa’ỹva Ñandejára Jesucrísto rupi.
Ha pe Adán rembiapo vaikue omoĩ haguéicha yvypórape oñehundi haguã, upéicha avei Ñandejára Jesucrísto rembiapokue hekopegua, omboheko joja opa yvypórape oikove haguã. He’ise, peteĩete iñe’ẽ rendu’ỹ hague rehe, maymáva iñangaipa. Ha upéicha avei, peteĩete iñe’ẽ rendu hague rehe, maymáva oñemboheko jojáta.

Tupã Ñandejára Ñe’ẽ.
O: Romomba’e guasu ndéve, Ñandejára.

Aclamación Mt 4, 4b
R. Romomba’e guasu ndéve Ñandejára Jesucrísto
Ndaha’éi tembi’u añónte oikotevẽva yvypóra oikove haguã; Opa ñe’ẽ Ñandejára jurúgui osẽva avei.
T. Romomba’e guasu ndéve Ñandejára Jesucrísto.

Evangelio Mt 4, 1-11

• Marandu porã Ñandejára Jesucrísto rekove ha hemimbo’e San Mateo omombe’u háicha
  Opavave: Romomba’e guasu ndéve, Ñandejára

Upérõ Espíritu Santo ogueraha Jesúspe desiértope. Upépe, Aña oipy’a ra’ãta hína chupe. Ohasa rire 40 ára ha pyhare ho’u’ỹre mba’eve, Jesús oñandu iñembyahýi.

Upépe Aña oñemboja Jesús rendápe oipy’a ra’ã hag̃ua chupe, ha he’i: — Nde ramo añete Ñandejára ra’y, ere ko’ã itágui toiko pan.
Jesús katu ombohovái chupe: — Ñandejára Ñe’ẽme niko he’i, “Ndaha’éiko tembi’úgui añónte yvypóra oikovéva. Oikotevẽ avéko hikuái Ñandejára Ñe’ẽ.”

Upéi katu Aña ogueraha chupe Jerusalénpe, ha ohupi chupe pe tupao ru’ãme.

He’i chupe: — Nde ramo añete Ñandejára ra’y, ejepoi oakãvo. Ñandejára Ñe’ẽme niko he’i: “Ñandejára omboúta hi’ángelkuéra oñangareko hag̃ua nde rehe. Ipópe nde rupíta hikuái ani hag̃ua reñepysãngánte jepe.”

Ojere Jesús he’i chupe: — Ñandejára Ñe’ẽme niko he’i avei, “Ani reipy’a ra’ã Tupã Ñandejárape.”

Ipahápe, Aña ogueraha chupe peteĩ sérro yvate ru’ãme. Upégui ohechauka chupe opa tetã yvy ári oĩva, ha mba’e-mba’épa oĩ pype.

Ha he’i chupe: — Ame’ẽmbáta ndéve umíva, reñesũ ramo che renondépe ha che momba’e guasu.

Jesús katu he’i chupe: — Eguata tereho ko’águi Sataná. Ñandejára Ñe’ẽme niko he’i, “Tupã Ñandejára año renondépente reñesũ va’erã, ha chupe añónte remomba’e va’erã”.

Upépe Aña oheja chupe. Ha og̃uahẽ Jesús rendápe Ñandejára ángelkuéra oipytyvõ chupe.

Ñandejára Jesucrísto Ñe’ẽ.
O: Romomba’e guasu ndéve, Ñandejára Jesucristo.